އީރާންގެ މަޝްވަރާތައް ކާމިޔާބު، އެކަމަކު ހަމަލާ ދޭން މި ތިބީ ތައްޔާރަށް: އެމެރިކާގެ ނައިބު ރައީސް

އީރާން އާއެކު ކުރިއަށް ގެންދާ މަޝްވަރާތައް ކާމިޔާބު ކަމަށާއި، މަޝްވަރާ ތަކުން ކުރިއެރުން ތަކެއް ލިބެމުން އަންނަ ކަމަށް އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު، ވައިޓް ހައުސްގައި އޮތް ނޫސްވެރިންގެ ބައްދަލުވުމުގައި ވޭންސް ވިދާޅުވީ، އީރާން އާއެކު ކުރިއަށްދާ ވާހަކަ ތަކުން އުންމީދީ ނަތީޖާ ތަކެއް ފެންނަމުން އަންނަ ކަމަށެވެ. ނަމަވެސް، އެންމެ ފަހުން ކަންކަން ނިމިގެން ދާނީ އެއްބަސްވުމަކަށް އައިސްގެން، ނުވަތަ ނޫންކަން އޭނާ ފާހަގަ ކުރެއްވި އެވެ. 

ވޭންސް މިހެން ވިދާޅުވެފައި މި ވަނީ އަންގާރަ ދުވަަހު އީރާން އަށް އަލުން ހަމަލާތައް ދޭން ނިންމި ކަމަށާއި، ނަމަވެސް ގަލްފުގެ ޤައުމު ތަކުގެ ވެރިން އެދިވަޑައިގެންނެވުމުން އެ ހަމަލާތައް ދިނުން މަޑު ޖައްސާލީ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނިކޮށެވެ. ވޭންސް ވެސް ވިދާޅުވީ، އެއްބަސްވުމަކަށް ނާދެވިއްޖެ ނަމަ، އަލުން ހަމަލާ ދޭނެ ކަމަށެވެ.

އެމެރިކާ އާއި އީރާންއާ ދެމެދު އޮތް ނުތަނަވަސްކަން ބޮޑުވެފައިވާއިރު، ވޭންސް އަކީ އެމެރިކާގެ ފަރާތުން މަޝްވަރާ ތަކުގައި އިސްކޮށް ހުންނަވާ ބޭފުޅާ އެވެ. އެންމެ ފަހުން މިދިޔަ އޭޕްރީލް މަހު ޕާކިސްތާންގައި އޮތް މަޝްވަރާ ތަކަށް ވެސް ވަޑައިގެންނެވީ ވޭންސް އެވެ. ނަމަވެސް، އެ މަޝްވަރާ ތަކުގައި ވެސް އެއްވެސް ނަތީޖާއެއް ލިބިފައި ނުވެ އެވެ. ވޭންސް ވިދާޅުވީ، ނިއުކްލިއާ ހަތިޔާރު އުފެއްދުމުގެ ފުރުސަތު އީރާން އަށް ނުދެވޭނެކަން އެ ޤައުމުން ވެސް ޤަބޫލު ކުރަން ޖެހޭ ކަމަށެވެ. 

މިހާރުގެ ޙާލަތަށް ބަލާއިރު، ކަންކަން ދަނީ ރަނގަޅު މިސްރާބުގައި ކަމަށް ވީ ނަމަވެސް، އެމެރިކާގެ އަތުގައި "އޮޕްޝަން ބީ" އެއް އެބަ އޮތް ކަމަށް ވޭންސް ވިދާޅުވި އެވެ. އެއީ މަޝްވަރާތައް ނާކާމިޔާބު ވެއްޖެ ނަމަ، އަސްކަރީ ކެމްޕެއިން އަލުން ފެށުން ކަމަށް އޭނާ ވިދާޅުވި އެވެ.

މީގެ އިތުރުން ވޭންސް ވިދާޅުވީ، އެމެރިކާ އޮތީ "ލޮކްޑް އެންޑް ލޯޑަޑް" ނުވަތަ ކޮންމެ ވަގުތެއްގައި ވެސް ހަމަލާ ދޭން ތައްޔާރަށް ކަމަށެވެ. އެމެރިކާގެ ސަރުކާރުން އެ މަގުން ދާން ބޭނުން ނުވި ނަަމަވެސް، މަޖުބޫރު ވެއްޖެ ޙާލަތެއްގައި އެ ފިޔަވަޅު އެޅުމުގެ ޤާބިލުކަމާއި އިޚްތިޔާރު އެމެރިކާާގެ ރައީސް ޓްރަމްޕް އަށް އޮތް ކަމަށް ވޭންސް ވިދާޅުވި އެވެ.