އެމެރިކާގެ އަސްކަރީ ހަތިޔާރު ހިފައިގެން ދަތުރު ކުރި ބޯޓެއް އިޒްރޭލް އަށް ޖައްސައިފި

އީރާންއާ ދެކޮޅަށް އިޒްރޭލް އިން ވަރުގަދަކޮށް އަލުން ހަނގުރާމަ ފެށުމަށް ތައްޔާރުވަމުންދާ ދަނޑިވަޅެއްގައި، އެމެރިކާގެ އަސްކަރީ ގޮވާ ތަކެތި ހިފައިގެން ދަތުރު ކުރި އެތައް މަތިންދާ ބޯޓެއް އިޒްރޭލް އަށް ޖައްސާފައިވާ ކަމަށް މީޑިއާ ރިޕޯޓުތައް ބުނެފި އެވެ. 

އިޒްރޭލްގެ ޗެނަލް 13 އިން ރިޕޯޓު ކޮށްފައިވާ ގޮތުގައި، ޖަރުމަނުގައި ހުންނަ އެމެރިކާގެ އަސްކަރީ މަރުކަޒު ތަކުން ގޮވާ ތަކެއްޗާއި، ވަޒަން ވަޒަން ބަރުކޮށްގެން ދަތުރު ކުރި އެމެރިކާގެ އެތައް ކާގޯ މަތިންދާ ބޯޓެއް ފާއިތުވި 24 ގަޑިއިރުގެ ތެރޭގައި ވަނީ އިޒްރޭލްގެ ވެރި ރަށް ތެލް އަވީވް އަށް ޖައްސައިފަ އެވެ. 

މި މަތިންދާ ބޯޓު ތަކަކީ އިޒްރޭލް އަށް ބޭނުންވާ އަސްކަރީ އެހީތެރިކަން ފޯރުކޮށްދިނުމަށް އެމެރިކާ އިން ކުރަމުން އަންނަ މަަސައްކަތުގެ ދަށުން ފޮނުވި ބޯޓު ތަކެއް ކަމަށް މީޑިއާ ތަކުގައި ބުނެފައިވެ އެވެ. 

އިޒްރޭލްގެ މީޑިއާ ތަކުގައި ބުނެފައިވާ ގޮތުގައި، އެމެރިކާ އިން މިހާ ގިނަ އަދަދެއްގެ ގޮވާ ތަކެތި ކުއްލި ގޮތަކަށް ފޯރުކޮށްދީފައި ވަނީ، އީރާންއާ ދެކޮޅަށް ކުރަމުން އަންނަ ހަނގުރާމައިގެ އޮޕަރޭޝަންތައް އަލުން ފެށުމަށް އިޒްރޭލް އިން ވަމުން އަންނަ ތައްޔާރީ ތަކުގެ ބައެއްގެ ގޮތުގަ އެވެ. މީގެ އިތުރުން، މިއީ ސަރަހައްދީ މަސްލަހަތު ގޯސްވަމުން ދާ ދަނޑިވަޅެއްގައި، އިޒްރޭލްގެ ދިފާއީ ޤާބިލުކަން އިތުރު ކުރުމަށް އެޅި ފިޔަވަޅެއް ކަމަށް ވެސް ރިޕޯޓުތައް ބުނެ އެވެ. 

އިޒްރޭލް އާއި އީރާންއާ ދެމެދު އުފެދިފައިވާ ނުތަނަވަސްކަން އިންތިހާ އަށް ބޮޑުވެފައިވާ މި ދަނޑިވަޅުގައި، އެމެރިކާ އިން މެދު ނުކެނޑި އިޒްރޭލް އަށް އަސްކަރީ އެހީތެރިކަން ފޯރުކޮށްދެމުންދާ ދިޔުމަކީ ސަރަހައްދީ ހަނގުރާމައެއް ފެށިދާނެ ކަމުގެ ބިރު ބޮޑުވަމުންދާ ކަމެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ. ނަމަވެސް، މިކަމާ ގުޅޭ ގޮތުން އެމެރިކާގެ ސަރުކާރުން، ނުވަތަ އިޒްރޭލްގެ ޑިފެންސް މިނިސްޓްރީ އިން ރަސްމީކޮށް އެއްޗެއް ބުނެފައި ނުވެ އެވެ. 

ފާއިތުވި 24 ގަޑިއިރުގެ ތެރޭގައި ޖަރުމަނުން ފުރައިގެން، އިޒްރޭލްގެ ވެރި ރަށް ތެލް އަވީވް އަށް ޖެއްސި މި މަތިންދާ ބޯޓު ތަކުގައި ހުރި ގޮވާ ތަކެތީގެ ތަފްސީލެއް މިހާތަނަށް އާންމު ކޮށްފައި ނުވެ އެވެ. އެހެން ނަމަވެސް، މިއީ ކުރިއަަށް އޮތް ދުވަސް ތަކުގައި އިޒްރޭލް އިން ދޭން ރާވާފައިވާ ވަރުގަދަ ހަމަލާ ތަކަަކަށް ބޭނުންވާ މުހިންމު އަސްކަރީ ސާމާނު ކަމަށް ބެލެވެ އެވެ.