އީރާން ހަނގުރާމަ ހުއްޓާލުމަށް ޗައިނާގެ ރައީސް ޝީ ޖިންޕިން ގޮވާލައްވައިފި

އެމެރިކާާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން މެދު އިރުމަތީގައި އުފެދިފައިވާ ހަމަނުޖެހުންތައް ވަގުތުން ހުއްޓާލުމަށް ޗައިނާގެ ރައީސް ޝީ ޖިންޕިން ގޮވާލައްވައިފި އެވެ. 

ޗައިނާގެ ރައީސް ޝީ ޖިންޕިން މިހެން ގޮވާލައްވާފައި ވަނީ، ރަޝިޔާގެ ރައީސް ވްލަޑިމިއަރ ޕުޓިން މިހާރު އެ ޤައުމަށް ކުރައްވަމުން ގެންދަވާ ދަތުރުފުޅުގައި ކުރެއްވި ބައްދަލުވުމުގެ ތެރެއިންނެވެ. އެ ބައްދަލުވުމުގައި ޗައިނާގެ ރައީސް ވަނީ ސަރަހައްދީ ހަމަޖެހުމަށްޓަކައި ހަނގުރާމައިގެ އަމަލުތައް ހުއްޓާލުމުގެ މުހިންމުކަން ފާހަގަ ކުރައްވައިފަ އެވެ. 

ޗައިނާގެ ރަސްމީ ނޫސް އެޖެންސީ ކަމަށްވާ ޝިންހުއާ އިން ރިޕޯޓު ކޮށްފައިވާ ގޮތުގައި، ދެ ޤައުމުގެ ލީޑަރުންގެ މި ބައްދަލުވުމުގައި މެެދު އިރުމަތީގެ މަސްރަހާ ގުޅޭ ގޮތުން ފުޅާ ދާއިރާއެއްގައި ވަނީ މަޝްވަރާ ކުރައްވައިފަ އެވެ. އެ ބައްދަލުވުމުގައި ވާހަކަ ދައްކަވަމުން ޗައިނާގެ ރައީސް ވިދާޅުވޫ، ގަލްފު ސަރަހައްދުގެ މަސްރަހު މިހާރު އޮތީ ހަނގުރާމަ އާއި ސުލްޙައާ ދެމެދު ވަރަށް ނާޒުކު ފައްތަރެއްގައި ކަމަށެވެ. 

މެދު އިރުމަތީގައި އިތުރު ވަމުންދާ ނުތަނަވަސްކަމާ މެދު ކަންބޮޑުވުން ފާޅު ކުރައްވަމުން ޗައިނާގެ ރައީސް ވިދާޅުވީ، މިހާރުން މިހާރަށް ހަމަލާތައް ހުއްޓާލައި، މަޝްވަރާގެ މަގު އިޚްތިޔާރު ކުރުމަކީ ސަރަހައްދީ އަދި ބައިނަލްއަޤުވާމީ ސަލާމަތަށް ކޮންމެހެން ބޭނުންތެރި ކަމެއް ކަމަަށެވެ. އަދި މި ނާޒުކު ދަނޑި ވަޅުގައި ހުރިހާ ފަރާތް ތަކަކުން ވެސް ކެތްތެރިކަން އިސްކުރުމަށް ޗައިނާގެ ރައީސް ބާރު އެޅުއްވި އެވެ. 

ރަޝިޔާގެ ރައީސް ޕުޓިން ޗައިނާ އަށް ކުރައްވަމުން ގެންދަވާ މި ދަތުރުފުޅަކީ ދެ ޤައުމުގެ ދެ މެދުގައި އޮތް ގުޅުން އިތުރަށް ބަދަހިކޮށް، ދުނިޔޭގެ ސިޔާސީ މަސްރަހުގައި ހުރި މުހިންމު މައްސަލަތަކާ ގުޅޭ ގޮތުން އެއްގަލަކަށް އެރުމަށް ކުރައްވާ ދަތުރުފުޅެކެވެ. މެދު އިރުމަތީގެ މައްސަލައިގެ އިތުރުން، ދެ ޤައުމުގެ އިޤްތިޞާދީ އަދި އަސްކަރީ ގުޅުންތަކާ ގުޅޭ ގޮތުން ވެސް މި ބައްދަލުވުމުގައި މަޝްވަރާ ކުރެވުނު ކަމަށް ރިޕޯޓުތައް ބުނެ އެވެ.

ޗައިނާ އިން ވަނީ މީގެ ކުރިން ވެސް މެދު އިރުމަތީގެ ހަމަ ނުޖެހުން ތަކުގައި މެދުވެރިއެއްގެ ދައުރު އަދާ ކުރުމަށް ޝައުޤުވެރިކަން ފާޅު ކޮށްފަ އެވެ. ޗައިނާ ރައީސްގެ މި ގޮވާލެއްވުމަަކީ ބައިނަލްއަޤުވާމީ މައިދާނުގައި ޗައިނާގެ ނުފޫޒު ގަދަވަމުންދާކަން ހާމަ ކޮށްދޭ ކަމެއް ކަމަށް ތަޖުރިބާކާރުން ބުނެ އެވެ.