ޓްރަމްޕް އަށް ފަހު، ރަޝިޔާގެ ރައީސް ޕުޓިން ވެސް ޗައިނާ އަށް ވަޑައިގެންފި

ރަޝިޔާގެ ރައީސް ވްލަޑިމިއަރ ޕުޓިން، ރަސްމީ ދަތުރުފުޅެއްގައި ޗަައިނާ އަށް ވަޑައިގެންފި އެވެ.

އަންގާރަ ދުވަހުގެ ވަގުތެއްގައި ޕުޓިން ޗައިނާ އަށް ވަޑައިގެންފައިވާއިރު، އެ ޤައުމުން ވަނީ ޕުޓިން އަށް ހޫނު މަރުޙަބާއެއް ދަންނަވައިފަ އެވެ. އަދި ބުދަ ދުވަހު ޗައިނާގެ ރައީސް ޝީ ޖިންޕިން ވަނީ ޕުޓިން އަށް ރަސްމީކޮށް މަރުޙަބާ ދަންނަވައިފަ އެވެ. 

ރަޝިޔާގެ ވެރި ރަށް ބެއިޖިންގެ ގްރޭޓް ހޯލް އޮފް ދަ ޕީޕަލްގައި ވަނީ ޕުޓިން އަށް މަރުޙަބާ ދެންނެވުމަށްޓަަކައި ކުލަ ގަދަ އަދި ޝަރަފުވެރި ރަސްމިއްޔާތެއް ބާއްވައިފަ އެވެ. އެ ރަސްމިއްޔާތަށް ފަހު ވަނީ ދެ ޤައުމުގެ ދެ މެދުގައި ރަސްމީކޮށް މަޝްވަރާ ކޮށްފަ އެވެ.

ޕުޓިން އާއި ޝީ ޖިންޕިންގެ އިތުރުން، ދެ ޤައުމުގެ އިސްވެރިން ބައިވެރިވެ ވަޑައިގެންނެވި މި މަޝްވަރާ ތަކުގައި ވަނީ ދެ ޤައުމުގެ ދެ މެދުގައި އޮންނަ ގުޅުން އިތުރަށް ބަދަހި ކުރުމާ ގުޅޭ ގޮތުން މަޝްވަރާ ކޮށްފަ އެވެ. މި ބައްދަލުވުމަކީ ދުނިޔޭގެ ސިޔާސީ މަސްރަހަށް ބޮޑެތި ބަދަލު ތަކެއް އަންނަމުންދާ ދަނޑިވަޅެއްގައި ބާއްވާ މުހިންމު ބައްދަލުވުމެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ސިފަ ކުރެ އެވެ. 

މި މަޝްވަރާ ތަކުގެ ތެރޭގައި އީރާންއާ ދެކޮޅަށް ކުރަމުން އަންނަ ހަނގުރާމައާ ގުޅޭ ގޮތުންނާއި، އެ ސަރަހައްދުގައި ހިނގަމުންދާ ކަންތައްތަކާ ބެހޭ ގޮތުން ދެ ބޭފުޅުން ފުޅާ ދާއިރާއެއްގައި މަޝްވަރާ ކޮށްފައިވާ ކަމަށް ބެލެވެ އެވެ. 

ރަޝިޔާާ އާއި ޗައިނާ އަކީ ބައިނަލްއަޤުވާމީ މައިދާނުގައި އެކި ދާއިރާ ތަކުން ގާތް ގުޅުމެއް ބާއްވަމުން އަންނަ ދެ ޤައުމުވެ. މި ބައްދަލުވުމުގެ ސަބަބުން ދެ ޤައުމުގެ ދެ މެދުގައި އޮތް އިސްތިރާތީޖީ ގުޅުން އިތުރަށް ވަރުގަދަ ވެގެންދާނެ ކަމަށް ސިޔާސީ މާހިރުން ލަފާ ކުރެ އެވެ. ރަޝިޔާ އަދި ޗައިނާ އަކީ ވެސް އީރާންއާ ގާތް ގުޅުމެއް ވެސް އޮންނަ ދެ ޤައުމެވެ.

ޕުޓިން ޗައިނާ އަށް ވަޑައިގެންފައި މި ވަނީ، އެމެރިކާގެ ރައީސް ޑޮނަލްޑް ޓްރަމްޕް ޗައިނާ އަށް ދަތުރުފުޅެއް ކުރެއްވިތާ ކުޑަ ދުވަސް ކޮޅެއް ފަހުންނެވެ. ޓްރަމްޕް ޗައިނާ އަށް ވަޑައިގެންފައި ވަނީ މެއި މަހުގެ 13 ވަނަ ދުވަހުން ފެށިގެން، 15 ވަނަ ދުވަހުގެ ނިޔަލަށެވެ.