އީރާން މައްސަލައިގައި ޓްރަމްޕް ބޭނުން ވަނީ ޗައިނާގެ ރައީސް އަށް ޕްރެޝަރު ކުރިމަތި ކުރުވަން

އެމެރިކާގެ ރައީސް ޑޮނަލްޑް ޓްރަމްޕް މި ހަފުތާގެ ތެރޭގައި ޗައިނާ އަށް ވަޑައިގެން އެ ޤައުމުގެ ރައީސް ޝީ ޖިންޕިންއާ ބައްދަލު ކުރައްވާއިރު، އީރާން މައްސަލައިގައި ޗައިނާގެ ރައީސް އަށް ޕްރެޝަރު ކުރަން ޓްރަމްޕް ބޭނުންވާ ކަމަށް މީޑިއާ ރިޕޯޓުތައް ބުނެފި އެވެ.

އެމެރިކާާގެ ބައެއް އިސް އޮފިޝަލުންނާ ހަވާލާދީ އާދީއްތަ ދުވަހު މި ވާހަކަ ރިޕޯޓު ކޮށްފައި ވީ ނަމަވެސް، ޓްރަމްޕް އާއި ޝީ ޖިންޕިންގެ ބައްދަލުވުމުގެ މައިގަނޑު މަޤުސަދަކީ ވިޔަފާރީގެ ދަތިތަކަށް ހައްލު ހޯދުން ކަމަށް އޮފިޝަލުން ވަނީ ހާމަ ކޮށްފަ އެވެ. 

މިއީ އެމެރިކާގެ ރައީސް ކަމުގެ ދެ ވަަނަ ދައުރަކަށް ޓްރަމްޕް ވަޑައިގެންނެވި ފަހުން، ޗައިނާ އަށް ކުރައްވާ ފުރަތަމަ ދަތުރުފުޅެވެ. މި ދަތުރުގައި ޗައިނާގެ ބެއިޖިންގައި ހުންނަ ޓެމްޕަލް އޮފް ހެވަން ބައްލަވާލެއްވުމުގެ އިތުރުން، ރަސްމީ ގޮތުން މަރުޙަބާ ދެންނެވުމަށް ވެސް ޚާއްސަ ރަސްމިއްޔާތު ތަކެއް އޮންނާނެ އެވެ.

ދުނިޔޭގެ އެންމެ ބޮޑު ދެ އިޤްތިޞާދުގެ ލީޑަރުންގެ މި ބައްދަލު ކުރުމުގައި ޓެރިފް އާއި، ތައިވާން، އާޓިފިޝަލް އިންޓެލިޖެންސް ޓެކްނޮލޮޖީ އަަދި މުހިންމު މައުދަންތައް ހޯދުމުގެ މައްސަލަ ތަކަށް ވެސް މަޝްވަރާ ކުރާނެ ކަމަށް ބެލެވެ އެވެ. 

ޕްރިންސިޕަލް ޑެޕިއުޓީ ޕްރެސް ސެކްރެޓަރީ އަންނާ ކެލީ ނޫސްވެރިންނަށް މައުލޫމާތު ދެއްވަމުން ވިދާޅުވީ، މިއީ ވަރަށް ބޮޑު މާނައެއް އޮތް ދަތުރުފުޅެއް ކަމަަށެވެ. ނަމަވެސް، ރައީސް ޓްރަމްޕް ދަތުރު ކުރައްވަނީ ހަމައެކަނި ރަމްޒީ ބޭނުމެއްގައި ނޫން ކަމަށާއި، އެމެރިކާގެ ރައްޔިތުންނަށް އުންމީދު ކުރެވޭނީ ރައީސް ޤައުމަށް ހެޔޮ އެއްބަސްވުންތައް ހޯދައި ދެއްވުން ކަމަށް ވެސް ކެލީ ވިދާޅުވި އެވެ. 

ކެލީ ވިދާޅުވީ ޓްރަމްޕްގެ ދަތުރުގެ އަަސާސީ މަޤުސަދަކީ ޗައިނާ އާއެކު އޮތް ގުޅުން ރަނގަޅު ކުރުމާއި، އެމެރިކާގެ އިޤްތިޞާދީ މިނިވަންކަން އަލުން ހޯދުން އަދި އިންސާފުވެރި ގޮތެއްގައި ކަންކަން ކުރިއަށް ގެންދިޔުން ކަމަށެވެ. 

ޓްރަމްޕް ޗައިނާ އަށް ވަޑައިގަންނަވާނީ ބުދަ ދުވަހު އެވެ. މިއީ މީގެ ކުރިން ވެސް ކުރެއްވުމަށް ރާވާފައި އޮތް ދަތުރުފުޅެކެވެ. ނަމަވެސް، އެމެރިކާ އިން އީރާންއާ ދެކޮޅަށް ފެށި ހަނގުރާމައިގެ ސަބަބުން ވަނީ މި ދަތުރުފުޅު ފަސް ކުރައްވައިފަ އެވެ.