ޔޫކްރެއިން ހަނގުރާމަ ނިމެން ކައިރި ވެއްޖެ ކަމަށް ޕުޓިން ވިދާޅުވެއްޖެ

ރަޝިޔާ އިން ޔޫކްރެއިންއާ ދެކޮޅަށް ހިންގަމުން އަންނަ ހަނގުރާމަ ނިމެން ކައިރި ވެފައިވާ ކަމަށް ހިތަށް އަރާ ކަމުގައި، ރަޝިޔާގެ ރައީސް ވްލަޑިމިއަރ ޕުޓިން ވިދާޅުވެއްޖެ އެވެ. 

ހޮނިހިރު ދުވަހު ޕުޓިން ވިދާޅުވީ، ޔޫކްރެއިންގެ ހަނގުރާމަ ނިމެން ކައިރިވެފައިވާ ކަމަށް އޭނާގެ ހިތަށް އަރާ ކަމަށެވެ. ރަޝިޔާ އިން ޔޫކްރެއިންއާ ދެކޮޅަށް ހަނގުރާމަ ފަށާފައި ވަނީ 2022 ވަނަ އަހަރު އެވެ. މިއީ ދެ ވަަނ ބޮޑު ހަނގުރާމަ އަށް ފަހު، ޔޫރަޕުގައި ހިނގަމުން އަންނަ އެންމެ ބޮޑު ހަނގުރާމަ އެވެ.

ޕުޓިން މިހެން ވިދާޅުވީ ރަޝިޔާ އިން މިއަހަރު ބޭއްވި ވިކްޓްރީ ޑޭގެ ޕެރޭޑަށް ފަހު އެވެ. މެއި މަހުގެ ނުވަ ވަނަ ދުވަހު ފާހަގަ ކުރާ މި ޤައުމީ ބަންދު ދުވަހަކީ، ދެ ވަނަ ބޮޑު ހަނގުރާމައިގައި ނާޒީ ޖަރުމަނުގެ މައްޗަށް ސޯވިއެޓް ޔޫނިއަން އިން ހޯދި ނަސްރު ފާހަގަ ކުރާ ދުވަހެވެ. އަދި އެ ހަނގުރާމައިގައި މަރުވި 27 މިލިއަން ސޯވިއެޓް ރައްޔިތުންނަށް ޝުކުރު އަދާ ކުރުމުގެ ދުވަހެވެ. 

ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގައި އެތައް ހާސް ބަޔަކު މަރުވެފައިވާއިރު، ޔޫކްރެއިން އަށް ވަނީ ބޮޑެތި ގެއްލުން ތަކެއް ލިބިފަ އެވެ. އަދި މި ހަނގުރާމައިގެ ސަބަބުން ރަޝިޔާގެ އިޤްތިޞާދަށް ތިން ޓްރިލިއަން އެމެރިކާ ޑޮލަރުގެ ގެއްލުން ކޮށްފައިވާ ކަަމަށް ވަނީ އަންދާޒާ ކޮށްފަ އެވެ. މި ހަނގުރާމައިގެ ސަބަބުން، ރަޝިޔާ އާއި ޔޫރަޕުގެ ގުޅުން ވެސް ވަނީ ވަރަށް ބޮޑަށް ނުތަނަވަސްވެފަ އެވެ. 

ފައިނޭންޝަލް ޓައިމްސްގައި ބުރާސްފަތި ދުވަހު ރިޕޯޓު ކޮށްފައިވާ ގޮތުގައި، ޔޫރަޕިއަން ޔޫނިއަންގެ ލީޑަރުން ވާހަކަ ދައްކައި، މަޝްވަރާ ކުރުމަށް މިހާރު އަންނަނީ ތައްޔާރު ވަމުންނެވެ. ޔޫރަޕިއަން ޔޫނިއަން އާއެކު ވާހަކަ ދައްކަވަން ތައްޔާރަށް ހުންނެވިތޯ ނޫސްވެރިޔަކު ސުވާލު ކުރުމުން ޕުޓިން ވިދާޅުވީ، އޭނާ އަށް އެންމެ ރަނގަޅީ ޖަރުމަނުގެ ކުރީގެ ޗާންސެލަރު ގްރެގާޑް ޝްރޯޑާ ކަމަށެވެ. 

މިދިޔަ ހަފުތާގެ ތެރޭގައި ރަޝިޔާގެ ރިޔާސީ ގަނޑުވަރު، ކްރެމްލިން އިން ބުނެފައި ވަނީ 2022 ވަނަ އަހަރު ޔޫކްރެއިންގެ ހަނގުރާމަ ފެށުމާ އެކު ރަޝިޔާއާ ގުޅުން ކަނޑާލީ ޔޫރަޕުގެ ސަރުކާރު ތަކުން ކަމަށާއި، އެހެންކަމުން ފުރަތަމަ ފިޔަވަޅު އަޅަން ޖެހޭނީ އެ ސަރުކާރު ތަކަށް ކަމަށެވެ.