އީރާން ހަނގުރާމައިގެ މައްސަލައިގައި ޕުޓިން އާއި ޔޫއޭއީގެ ރައީސް މަޝްވަރާ ކުރައްވައިފި

އެމެރިކާ އިން އީރާންއާ ދެކޮޅަށް ކުރަމުން އަންނަ ހަނގުރާމައާ ގުޅޭ ގޮތުން ރަޝިޔާގެ ރައީސް ވްލަޑިމިއަރ ޕުޓިން އާއި، ޔުނައިޓެޑް އަރަބް އެމިރޭޓްސް (ޔޫއޭއީ)ގެ ރައީސް ޝައިޚް މުޙައްމަދު ބިން ޒައިދު އަލް ނަޙްޔާން މަޝްވަރާ ކުރައްވައިފި އެވެ. 

ރަޝިޔާގެ ރިޔާސީ ގަނޑުވަރު، ކްރެމްލިން އިން ހޮނިހިރު ދުވަހު ހާމަ ކޮށްފައިވާ ގޮތުގައި ދެ ޤައުމުގެ ރައީސުން މަޝްވަރާ ކުރައްވާފައި ވަނީ ފޯނުން ގުޅުއްވައިގެންނެވެ. އެ މަޝްވަރާގައި މެދު އިރުމަތީގެ މިހާރުގެ ޙާލަތާ ގުޅޭ ގޮތުން ފުޅާ ދާއިރާއެއްގައި ވާހަކަ ދައްކަވާފައިވާ ކަމަށް ބުނެފައިވެ އެވެ. 

ކްރެމްލިންގެ ބަޔާނުގައި ފާހަގަ ކޮށްފައިވާ ގޮތުގައި، ސަރަހައްދީ ހަމަޖެހުން ޤާއިމު ކުރުމަށްޓަކައި ދޫ ދިނުން ތަކެއްގެ މައްޗަށް ބިނާވެފައިވާ ސުލްޙަވެރި އެއްބަސްވުން ތަކަކަށް ވާސިލުވުމަށް، ސިޔާސީ އަދި ޑިޕްލޮމެޓިކް މަސައްކަތްތައް ކުރިއަށް ގެންދިޔުމުގެ މުހިންމުކަމާ ގުޅޭ ގޮތުން ދެ ރައީސުން ވެސް ވަނީ އެއްބަސްވެ ވަޑައިގެންފަ އެވެ. 

މީގެ އިތުރުން ރަޝިޔާ އިން ޔޫކްރެއިންއާ ދެކޮޅަށް ކުރަމުން އަންނަ ހަނގުރާމައާ ގުޅިގެން ކުރިމަތިވެފައިވާ އިންސާނީ އެހީތެރި ކަމުގެ ކަންކަމުގައި ޔޫއޭއީ އިން ދެމުންދާ އެއްބާރުލުން ފާހަގަ ކުރައްވަައި، ޕުޓިން ވަނީ ޔޫއޭއީގެ ރައީސް ޝައިޚް މުޙައްމަދަށް ޝުކުރު އަދާ ކުރައްވައިފަ އެވެ. 

ޔޫއޭއީގެ ރަސްމީ ނޫން އެޖެންސީ، "ވާމް" އިން ރިޕޯޓު ކޮށްފައިވާ ގޮތުގައި މި މަޝްވަރާ ތަކުގައި މެދު އިރުމަތީގައި ހިނގަމުންދާ އެންމެ ފަހުގެ ކަންތައްތަކާއި، އެ ކަންކަމުގެ ސަބަބުން ސަރަހައްދީ އަދި ބައިނަލްއަޤުވާމީ ސުލްޙަ އާއި ސަލާމަތަށް ކުރިމަތި ވެދާނެ ނުރައްކާތަކާ ބެހޭ ގޮތުން ވެސް ދެ ރައީސުން ވަނީ ވާހަކަ ދައްކަވައިފަ އެވެ. 

މީގެ އިތުރުން މި ހަަމަނުޖެހުން ތަކުގެ ސަބަބުން ބައިނަލްއަޤުވާމީ ކަނޑު ދަތުރު ފަތުރުގެ މިނިވަން ކަމާއި، ހަކަތައިގެ ރައްކާތެރި ކަމުގެ އިތުރުން، ދުނިޔޭގެ އިޤްތިޞާދަށް ކުރާނެ ނޭދެވޭ އަސަރުތަކާ މެދު ވެސް ދެ ރައީސުން ވަނީ ކަންބޮޑުވުން ފާޅު ކުރައްވައިފަ އެވެ. 

މި މަޝްވަރާ އަކީ މެދު އިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި، ސަރަހައްދީ ބާރުތަކާއި ދުނިޔޭގެ ބޮޑެތި ޤައުމު ތަކުން ގުޅިގެން ޙައްލެއް ހޯދުމަށް ކުރަމުންދާ މަސައްކަތް ތަކުގެ ތެރެއިން ކުރިއަށް ދިޔަ މުހިންމު މަޝްވަރާ އެކެވެ. ޚާއްސަކޮށް އީރާންއާ ގުޅުން ހުރި މައްސަލަ ތަކުގައި ރަޝިޔާ އާއި ޔޫއޭއީގެ ދައުރު ބޮޑުކަން މި މަޝްވަރާ ތަކުން ހާމަވެގެން ދެ އެވެ.