ޕާކިސްތާން މެދުވެރިކޮށް، އީރާންގެ ހުށަހެޅުން އެމެރިކާއާ ހިއްސާ ކޮށްފި

މެދު އިރުމަތީގައި ހިނގަމުންދާ ހަނގުރާމަ ހުއްޓާލުމަށްޓަކައި އީރާން އިން ހުށަހަޅާފައިވާ އިސްލާހު ކުރެވިފައިވާ ހުށަހެޅުމެއް، ޕާކިސްތާން މެދުވެރިކޮށް އެމެރިކާއާ ހިއްސާ ކޮށްފައިވާ ކަމަށް ޕާކިސްތާންގެ މަސްދަރަކުން ހާމަ ކޮށްފި އެވެ. 

ރޮއިޓާސް ނިއުސް އެޖެންސީ އަށް މައުލޫމާތު ދެމުން ޕާކިސްތާންގެ މަސްދަރަކުން ހޯމަ ދުވަހު ބުނެފައި ވަނީ، ސުލްޙައިގެ ވާހަކަތައް މަޑު ޖެހިފައިވާ ދަނޑިވަޅެއްގައި މި ހުށަހެޅުން މިހާރު އެމެރިކާއާ ހިއްސާ ކޮށްފައިވާ ކަމަށެވެ. 

މިކަމާ ގުޅޭ ގޮތުން މައުލޫމާތު ދެމުން މަސްދަރުން ބުނެފައިވާ ގޮތުގައި، ދެ ޤައުމުގެ ދެ މެދުގައި ހުރި ޚިޔާލު ތަފާތުވުންތައް ނައްތާލުމަށްޓަަކައި ގިނަ ވަގުތު ތަކެއް ނެތް ކަމަށެވެ. އަދި ދެ ޤައުމުން ވެސް ދަނީ އެ ޤައުމަކުން ބޭނުންވާ ކަންކަމާއި، ޝަރުތު ތަކަށް ތަކުރާރުކޮށް ބަދަލު ގެންނަމުން ކަމަށް ވެސް އެ މަސްދަރުން ފާހަގަ ކޮށްފައިވެ އެވެ. މީގެ ސަބަބުން އެއްބަސްވުމަކަށް އައުމަށް އިތުރު ހުރަސް ތަކެއް ކުރިމަތި ވަމުންދާ ކަމަށް ބެލެވެ އެވެ. 

ހޯމަ ދުވަހު އީރާން އިން ބުނެފައި ވަނީ، ހަނގުރާމަ ހުއްޓާލުމަށް އެމެރިކާ އިން ހުށަހެޅި އައު ހުށަހެޅުމަކަށް އެ ޤައުމުން މިހާރު ޖަވާބު ދީފައިވާ ކަމަށެވެ. އީރާންގެ މީޑިއާ ތަކުން އެމެރިކާާގެ ޝަރުތު ތަކަކީ އިންސާފުން ބޭރު، ބޮޑެތި ޝަރުތު ތަކެއްގެ ގޮތުގައި ސިފަ ކުރަމުން ދިޔަ ނަމަވެސް، ދެ ޤައުމުގެ ދެ މެދުގައި މައުލޫމާތު ބަދަލު ކުރުމުގެ މަސައްކަތް މެދު ނުކެނޑި ކުރިއަށްދާ ކަމަށް އީރާން އިން ބުނެ އެވެ. 

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ނޫސްވެރިންނަށް މައުލޫމާތު ދެއްވަމުން ވިދާޅުވީ، އީރާންގެ ކަންބޮޑުވުންތައް އަދީއްތަ ދުވަހު އެމެރިކާގެ ފަރާތްތަަކަށް އަންގާފައިވާނެ ކަމަށެވެ. މި މުއާމަލާތް ކުރިއަށް ދަނީ ޕާކިސްތާން މެދުވެރިއެއްގެ ގޮތުގައި ބޭނުން ކޮށްގެން ކަމަށް އޭނާ ވިދާޅުވި އެވެ. ނަމަވެސް، އެ ހުށަހެޅުންތަކާ ގުޅޭ އިތުރު ތަފްސީލެއް އޭނާ ހާމަ ކޮށްފައި ނުވެ އެވެ. 

މެދުއިރުމަތީގެ މަސސްރަހު ގޯސްވެފައިވާ މި ދަނޑިވަޅުގައި، ޕާކިސްތާން އިން މެދުވެރިއެއްގެ ދައުރު އަދާ ކުރަމުންދާއިރު، އީރާން އާއި އެމެރިކާއާ ދެމެދު ސީދާ ސިޔާސީ ގުޅުމެއް ނޯވެ އެވެ. އެހެންކަމުން ދެ ޤައުމުގެ ދެ މެދުގައި ބަދަލު ކުރެވޭ މެސެޖު ތަކާއި، ހުށަހެޅުންތައް އާންމުކޮށް ބަދަލު ކުރަނީ ތިން ވަނަ ޤައުމެއް މެދުވެރި ކޮށްގެންނެވެ. މިފަހަރުގެ ހުށަހެޅުމަކީ ހަނގުރާމަ ހުއްޓާލުމަށް ކުރެވޭ މަސައްކަތުގައި ލިބޭނެ ކުރިއެރުމެއް ކަމަށް ބައިނަލްއަޤުވާމީ މުޖުތަމައުން އުންމީދު ކުރެ އެވެ.