ރައީސް އޮފީހުގައި ހިނގާ ކަންކަން ރިޕޯޓްކުރާ ނޫސްވެރިން ކުރިމަތިލާންޖެހޭ ކޮންމެ ކަމެއްގައި އެކީގައި ތިބޭނަން: ރައީސް ސޯލިހު
ރައީސް އޮފީހުގައި ހިނގާ ކަންކަން ރައްޔިތުންނަށް ހާމަކުރާ ނޫސްވެރިންނާއެކު ދެމިތިބޭނެ ކަމުގެ ޔަޤީންކަން ކުރީގެ ރައީސް އިބްރާހިމް މުހައްމަދު ސޯލިހު ދެއްވައިފި. މި ސަރުކާރު ޖަވާބުދާރީ ކުރުވުމަށްޓަކައި ރައްޔިތުންގެ މަޖިލީހަށް ކެރޭ ބޭފުޅުން އިންތިޚާބު ކުރަންޖެހޭ ކަމަށާއި، މިހާރު އޮތް ސަރުކާރަކީ ވަގުތުން ބަދަލުކުރަންޖެހިފައިވާ ސަރުކާރެއް ކަމަށް އެމަނިކުފާނު ވިދާޅުވި. މީގެއިތުރުން ޚިޔާލު ފާޅުކުރުމުގެ މިނިވަންކަމަށް އޮތް ގޮންޖެހުންތައް ނައްތާލުމަށް މަސައްކަތް ކުރައްވާނެ ކަމަށްވެސް ރައީސް ސޯލިހު ފާހަގަކުރެއްވި.
ކުރީގެ ރައީސް އިބްރާހިމް މުހައްމަދު ސޯލިހު. | ރާއްޖެ އެމްވީ
ރައީސް އޮފީހުގައި ހިނގާ ހުރިހާކަމެއް ހާމަވާންޖެހޭ ކަމަށާއި އެކަން ރިޕޯޓްކުރާ ނޫސްވެރިން ކުރިމަތިލާންޖެހޭ ކޮންމެ ކަމެއްގައި އެކީގައި ތިއްބާވެނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އައްޑޫ ސިޓީގެ ހިތަދޫ އުތުރު ދާއިރާގެ މަޖިލިސް ބައި-އިލެކްޝަންގައި ވާދަކުރައްވާ ސޯބެގެ ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ރައީސް އޮފީހުގައި ހިނގާ ހުރިހާކަމެއް ސާފުކޮށް ރައްޔިތުންނާ ހިސާބަށް ހާމަވާންޖެހޭނެ ކަމަށެވެ. އެތަނުގައި ހުންނަ ސޯފާއެއް ކަމަށްވިޔަސް، ދިގު ގޮނޑިއެއް ކަމަށްވިޔަސް، ވަށްމޭޒެއް ކަމަށްވިޔަސް އެ ވާހަކަތައް ހާމަވާންޖެހޭނެ ކަމަށް އެމަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ މި ސަރުކާރަށް ދެ އަހަރު ބައި ވިއިރުގައި ރައްޔިތުން މިހާރު މި ސަރުކާރާ ދޭތެރޭގައި ގޮތް ނިންމައިފި ކަމަށެވެ. ލޯކަލް ކައުންސިލް އިންތިޚާބުގައާއި ރިފްރޭންޑަމްގައި ސާފުކޮށް ރައްޔިތުން ބުނީ މި ސަރުކާރު މިހާރު ތިމަންނަމެން ބޭނުމެއް ނޫން ކަމަށް އެމަނިކުފާނު ވިދާޅުވި އެވެ. މިއީ ބަދަލުކުރަންޖެހިފައި، ވަގުތުން ވަގުތަށް ބަދަލުކުރަންޖެހިފައި އޮތް ސަރުކާރެއް ކަމަށާއި އިތުރަށް ފުރުސަތު ދިންވަރަކަށް މި ޤައުމު ދާނީ ހަލާކުގެ ތެރެއިން ކަމަށް ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ޤައުމުގެ ޙާލަތު މިހާރު ގޮސްފައި އޮތް ހިސާބަކީ ރައީސް އޮފީހުގައި ހިނގާ އެއްވެސް ކަމެއްގެ ޚަބަރެއް ނުލިޔެވޭ ކަމަށެވެ. ރައީސް އޮފީސް ތެރޭގައި ރައީސުލްޖުމްހޫރިއްޔާ ކުރައްވާ އެއްވެސް ކަމެއްގެ ޚަބަރެއް ރައްޔިތުންނާ ހިސާބަށް ގެނައުން އެއީ ކުށަކަށްވާނެ ކަމަށެވެ. އެހެންނަމަވެސް، އެއީ އެކަން ހިނގަންޖެހޭނެ ގޮތެއް ނޫން ކަމަށް އެމަނިކުފާނު ވިދާޅުވި އެވެ.
ޤައުމުގެ ޙާލަތު މި ދެންނެވިހެން މިހާރު ގޮސްފައި އޮތް ހިސާބަކީ ރައީސް އޮފީހުގައި ހިނގާ އެއްވެސް ކަމެއްގެ ޚަބަރެއް ނުލިޔެވޭ. ރައީސް އޮފީސް ތެރޭގައި ރައީސުލްޖުމްހޫރިއްޔާ ކުރައްވާ އެއްވެސް ކަމެއްގެ ޚަބަރެއް ރައްޔިތުންނާ ހިސާބަށް ގެނައުން އެއީ ކުށަކަށްވާނީ. އެހެންނަމަވެސް، އެއީ އެކަން ހިނގަންޖެހޭނެ ގޮތެއް ނޫން. އެތާ ހިނގާ ހުރިހާ ކަމެއް، ސާފުކޮށް، ކުރާ ހުރިހާ ކަމެއް، ނިންމާ ހުރިހާ ނިމުމެއް ރައްޔިތުންނާ ހިސާބަށް ހާމަވާން ޖެހޭނެ. އެކަން މިއަދު ނޫސްވެރިން ކުރަމުންގެންދިޔައީ. އެއީ އެތާ ހުންނަ ސޯފާއެއް ކަމަށް ވިޔަސް، ދިގު ގޮނޑިއެއް ކަމަށް ވިޔަސް، ވަށްމޭޒެއް ކަމަށް ވިޔަސް، އެ ވާހަކަތައް ހާމަވާންޖެހޭނެ. އަޅުގަނޑުމެން އުޅެފައި އައިތަނެންހެން. އަޅުގަނޑުމެން އުޅެފައި އައިތަނެން އެއީ. އެ ވާހަކަތަކެއް އަޑެއް ނީވޭ. އެތާ ހިނގިއްޔާ ހިނގި ހުރިހާ ކަމެއް ގައިމުވެސް ހާމަވެފައި އޮންނާނެ. އެހެންވީމާ، މި ވާހަކަތައް ހާމަކުރުމަށް އެއްވެސް ހުރަހެއް އޮވެގެނެއް ނުވާނެ. ރައީސް އޮފީހުގައި ހިނގާ ހުރިހާ ކަމެއް ބަރާބަރަށް ހާމަކުރެވެން ޖެހޭނެ. އަޅުގަނޑުމެން މި ތިބީ އެ ނޫސްވެރިންނާއެކުގައި. އެކަން ހާމަކުރާ ނޫސްވެރިން ކުރިމަތިލާންޖެހޭ ކޮންމެ ކަމަކަށް، ކޮންމެ ކަމަކަށް އަޅުގަނޑުމެން އެ ބޭފުޅުންނާ އެކީގައި ތިބޭނެކަމުގެ ޔަޤީންކަން އަރުވަން.ކުރީގެ ރައީސް އިބްރާހިމް މުހައްމަދު ސޯލިހު
ސަރުކާރު މިހާލަތަށް އައިއިރުގައި، ސަރުކާރު ޖަވާބުދާރީ ކުރުވުމަށްޓަކައި، ހަމަމަގަށް އެޅުމަށްޓަކައި އެންމެ ބޮޑު މަސައްކަތެއް ކުރަންޖެހޭ ތަނަކީ، ކުރެވޭނެ ތަނަކީ ރައްޔިތުންގެ މަޖިލިސް ކަމަށް ރައީސް ސޯލިހު ވިދާޅުވި އެވެ. އެތާ ތިއްބަވަންޖެހޭނެ ކެރިގެން ޖަވާބުދާރީ ކުރެވޭ ވަރުގެ ބޭފުޅުން ކަމަށް އެމަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ ސޯބެ ރައްޔިތުންގެ މަޖިލީހުގައި ފަޚުރުވެރިވާވަރުގެ މަސައްކަތްތަކެއް ކުރައްވާނެ ކަމަށާއި ހިތަދޫ އުތުރު ދާއިރާގެ ހުރިހާ ބޭފުޅުން ނުކުމެވަޑައިގެން ސޯބެޔަށް ވޯޓުދެއްވަން އެދިވަޑައިގަންނަވާ ކަމަށެވެ. ލާމަރުކަޒީ ނިޒާމަށް މިހާރު ކުރިމަތިވެފައި އޮތް ހުރަސްތައް، ދަތިތައް ނައްތާލައި، އަލުން ފުރިހަމަ ލާމަރުކަޒީ ނިޒާމެއް ޤާއިމުކުރުމަށްޓަކައި ކުރެވެން އޮތް ހުރިހާ ކަމެއް މަޖިލީހުގެ ތެރެއިން ކޮށްދޭނެ ކަމަށް ސޯބެ ވިދާޅުވެފައިވާ ކަމަށް ރައީސް ސޯލިހު ފާހަގަކުރެއްވި އެވެ.
އަސާސީ ޙައްޤުތަކަށް އަރައިގެންފައި އޮތް އޮތުން ޚިޔާލު ފާޅުކުރުމުގެ މިނިވަންކަމަށް މިހާރު އޮތް ގޮންޖެހުން ނައްތާލުމަށްޓަކައި ކުރެވެން އޮތް ހުރިހާ ކަމެއް ކުރައްވާނެ ކަމަށް ސޯބެ ވިދާޅުވެފައިވާ ކަމަށް ރައީސް ސޯލިހު ވިދާޅުވި އެވެ.
