ސަރުކާރުގެ އިޤްތިސާދީ އިސްލާޙީ އެޖެންޑާގެ މަސައްކަތްތައް 2024 ވަނަ އަހަރުން ފެށިގެން ހުއްޓިފައިވާކަމަށް ރައީސް އޮފީހުން ބުނި، ނަމަވެސް ވަޒީރު ވިދާޅުވީ އެ މަސައްކަތް ކުރިއަށްދާކަމަށް!
ސަރުކާރުގެ އިޤްތިސާދީ އިސްލާޙީ އެޖެންޑާގެ މަސައްކަތްތައް ހުއްޓުމެއްނެތި ކުރިއަށްދާކަމަށާއި، އޭގެ ހެޔޮ ނަތީޖާ ފެންނަމުންދާކަމަށް މާލީ ވަޒީރު މޫސާ ޒަމީރު ވިދާޅުވެއްޖެ. ނޫސްވެރިންގެ ބައްދަލުވުމެއްގައި ވަޒީރު ވިދާޅުވީ، ދަރަނި ދެއްކުމާއި ކުންފުނިތައް އެއްކޮށްލުން ފަދަ މުހިންމު ފިޔަވަޅުތަކާއެކު ރާއްޖޭގެ މާލީ ނިޒާމަށް ހަރުދަނާ ބަދަލުތަކެއް އަންނަމުންދާ ކަމަށް. ނަމަވެސް، މި އެޖެންޑާގެ މަސައްކަތްތައް 2024 ވަނަ އަހަރުގެ ފަހުން ހުއްޓިފައިވާކަމަށް ރައީސް އޮފީހުން މީގެ ކުރިން އައިކޮމްގައި ބުނެފައިވާތީ އެކަމުގެ ކަންބޮޑުވުންތައް ވަނީ ފެންމަތިވެފައި.
ފިނޭންސް މިނިސްޓަރު މޫސާ ޒަމީރު. | ރައީސް އޮފީސް
ސަރުކާރުގެ އިޤްތިސާދީ އިސްލާޙީ އެޖެންޑާގެ މަސައްކަތްތައް 2024 ވަނަ އަހަރާ ހިސާބުން ހުއްޓިފައިވާކަމަށް ރައީސުލްޖުމްހޫރިއްޔާގެ އޮފީހުން މީގެ ކުރިން އެއްބަސްވެފައި އޮތްނަމަވެސް، އެ މަސައްކަތް ކުރިއަށްދާކަމަށް މި ސަރުކާރުގެ މާލީ ވަޒީރު ވިދާޅުވެއްޖެއެވެ.
މާލީ ވަޒީރު އެފަދައިން ވިދާޅުވީ އަންގާރަ ދުވަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ނޫސްވެރިންގެ މި ބައްދަލުވުމުގައި ނޫސްވެރިއަކު ވަނީ ސަރުކާރުގެ އިޤްތިސާދީ ރިފޯރމް އެޖެންޑާއާ ގުޅޭގޮތުން މައުލޫމާތު ހާމަ ނުކުރާތީ އާއި އެ މަސައްކަތް އޮތް ހިސާބެއް ސާފުނުވާތީ އެކަމާ ގުޅިގެން ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން ފިނޭންސް މިނިސްޓަރ މޫސާ ޒަމީރު ވިދާޅުވީ، މިހާރުވެސް މާލީ ނިޒާމު ވަރަށް ބޮޑަށް ރިފޯރމް ކޮށްފައިވާ ކަމަށާއި، އޭގެ ނަތިޖާ ވެސް ފެނިފައިވާ ކަމަށެވެ. އެގޮތުން 2023 އާ ހިސާބަށް އައިއިރު ދަރަނީގެ ރަނގަބީލުތައް އަޅަމުން ދިޔަނަމަވެސް، އިޤްތިސާދީ އެޖެންޑާއަކާއި ހަރުދަނާ ބަދަލުތަކަކާއެކު ދަރަނި ދައްކައި، ރައްޔިތުންނަށް ރަނގަޅު ޚިދުމަތްތަކެއް ވެސް ދެވިފައިވާކަމަށް މިނިސްޓަރ ވިދާޅުވިއެވެ.
އިޤްތިސާދީ ރިފޯމް އެޖެންޑާގެ ނަތީޖާ ފެންނަމުންދާކަމަށް މިނިސްޓަރ ވިދާޅުވި ނަމަވެސް، ސަރުކާރުގެ އިޤްތިސާދީ އިޞްލާޙީ އެޖެންޑާގެ މަސައްކަތްތައް 2024 ވަނަ އަހަރާ ހިސާބުން ހުއްޓިފައިވާކަމަށް ރައީސުލްޖުމްހޫރިއްޔާގެ އޮފީހުން ވަނީ އައިކޮމްގައި ބޭއްވި އަޑުއެހުމެއްގައި އެއްބަސްވެފައެވެ. އެއީ މިދިޔަ އޭޕްރީލް މަހު އޮތް އަޑުއެހުމެކެވެ.
އެހެންވެ އެކަން އިތުރަށް ސާފުކޮށްދިނުމަށް ރާއްޖެޓީވީން ސުވާލު ކުރުމުން މާލީ ވަޒީރު ވިދާޅުވީ، ކުންފުނިތައް އެއްކޮށްލުން ފަދަ ނިންމުންތަކަކީ ރިފޯރމް އެޖެންޑާގެ ދަށުން ކުރެވިފައިވާ މަސައްކަތްތައް ކަމަށާއި، ރާއްޖެ ބަނގުރޫޓު ނުވެ އޮތީ ސަރުކާރުން އެޅި ފިޔަވަޅުތަކުގެ ސަބަބުން ކަމަށެވެ.
އައިކޮމްއަށް ރައީސް އޮފީހުން ހިއްސާކުރި މައުލޫމާތަށް ބަލާއިރު، 2 ސެޕްޓެމްބަރު 2024 ގައި ރިފޯމް އެޖެންޑާގައިވާ ކަންކަން ޙާސިލު ކުރުމަށް ރައީސް ނިންމެވި ކަންކަމާ ގުޅޭ ޚަބަރެއްގެ ވާހަކައާއި، އޭގެ ފަހުން 23 އޮކްޓޯބަރުގެ ޚަބަރެއްގައި އިޤްތިސާދީ އިސްލާޙީ އެޖެންޑާގެ ދަށުން ރައީސް ނިންމެވި ނިންމެވުންތަކެއްގެ ވާހަކަ ހިމެނެއެވެ. ނަމަވެސް އޭގެ ފަހުން ކުރި އެއްވެސް މަސައްކަތެއް ފެންނަން ނެތުމުން އެ ސުވާލު އައިކޮމްއިން ވެސް ވަނީ އުފައްދާފައެވެ.
