ރައީސްގެ ނޫސްވެރިންގެ ބައްދަލުވުން ކުއްލި ގޮތަކަށް ކެންސަލްވީ މަސައްކަތްޕުޅު ހުރިގޮތުން: ތަރުޖަމާނު
މިއަދު ހެނދުނު 10:00 އަށް ތާވަލުކުރި މި ބައްދަލުވުން ކެންސަލްކުރީ ރައީސުލްޖުމްހޫރިއްޔާގެ މަސައްކަތްޕުޅުތައް ހުރިގޮތުން ކަމަށް ސަރުކާރުގެ ތަރުޖަމާނު ވިދާޅުވި. ކޮންމެ ހަފުތާއެއްގެ ހޯމަ ދުވަހު ނޫސްވެރިންނާ ބައްދަލުކުރައްވާނެ ކަމަށް ރައީސް މުއިއްޒު ކުރިން ވިދާޅުވެފައިވީ ނަމަވެސް، މިއަދުގެ ޕްރެސް ކެންސަލްކުރިކަން އެންގީ ބައްދަލުވުން ފެށެން ކުޑަވަގުތުކޮޅަކަށް ވެފައި ވަނިކޮށް. މިއީ މާޗު މަހުން ފެށިގެން ކޮންމެ ހަފުތާއަކު ނޫސްވެރިންނަށް ވަގުތު ދެއްވާނެ ކަމަށް ވެވަޑައިގެންފައިވާ ވަޢުދާ ގުޅިގެން ބާއްވަން އުޅުނު ބައްދަލުވުމެއް.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް ޑރ.މުހައްމަދު މުއިއްޒު ވާހަކަ ދައްކަވަނީ. | ރައީސް އޮފީސް
ރައީސް ޑރ. މުޙައްމަދު މުއިއްޒު ނޫސްވެރިންނާ ބައްދަލު ކުރެއްވުމަށް ހަމަޖެހިފައިވާ ބައްދަލުވުން ކުއްލި ގޮތަކަށް ކެންސަލްވީ އެމަނިކުފާނުގެ މަސައްކަތްޕުޅު ހުރި ގޮތުންކަމަށް ރައީސް އޮފީހުގެ ތަރުޖަމާނު މުޙައްމަދު ހުސައިން ޝަރީފް (މުންދު) ވިދާޅުވެއްޖެއެވެ.
ނޫސްވެރިންގެ މި ބައްދަލުވުން ތާވަލު ކުރެވިފައި އޮތީ ހޯމަ ދުވަހުގެ ހެނދުނު 10:00 އަށެވެ. އެހެންނަމަވެސް ޕްރެސެ ފެށެން ގާތްވެފައި ވަނިކޮށް ކުއްލި ގޮތަކަށް ރައީސް އޮފީހުން ވަނީ ނޫސްވެރިންގެ ބައްދަލުވުން ނޯންނާނެކަމަށް ނޫސްވެރިންނަށް އަންގާފައެވެ.
ކުއްލި ގޮތަކަށް ނޫސްވެރިންގެ ބައްދަލުވުން ކެންސަލް ކުރި ސަބަބާ ގުޅޭގޮތުން ރާއްޖެއެމްވީން ސުވާލު ކުރުމުން ސަރުކާރުގެ ތަރުޖަމާނު ވިދާޅުވީ، ރައީސްގެ މަސައްކަތްޕުޅު ހުރި ގޮތުން މިއަދު ޕްރެސް ނުދެއްވާނެ ކަމަށެވެ.
މާޗު މަހުން ފެށިގެން ކޮންމެ ހަފްތާއަކު އެއް ދުވަހުގެ އެއް ގަޑިއިރު ނޫސްވެރިންނާ ބައްދަލުކުރުމަށް ހާއްސަކުރާނެ ކަމަށް ރައީސް ވަނީ ވިދާޅުވެފައެވެ. އެގޮތުން ކޮންމެ ހަފްތާއަކު ހޯމަ ދުވަހުގެ ހެނދުނު 10:00 އިން 11:00 އަށް ނޫސްވެރިންނާ ބައްދަލު ކުރައްވާނެ ކަމަށާއި، ބަންދު ދުވަހެއް، ނުވަތަ ދަތުރެއް، ނުވަތަ އެފަދަ ކަމަކާ ގުޅިގެން ބައްދަލުވުން ނުބޭއްވޭ ކަހަލަ ކަމެއް ދިމާނުވާހާ ހިނދެއްގައި ނޫސްވެރިންނާ ބައްދަލު ކުރައްވާނެކަމަށް ވަނީ ވިދާޅުވެފައެވެ.
އެހެންނަމަވެސް ނޫސްވެރިންގެ ބައްދަލުވުން ފެށެން ގަޑިއިރަކަށްވެފައި ވަނިކޮށް މި ބައްދަލުވުން ކެންސަލްކުރީ ކުއްލި ގޮތަކަށް އައި ކޮން މަސައްކަތްޕުޅެއްގެ ސަބަބުންކަމެއް ސާފެއް ނޫނެވެ.
