އަދީބު މިނިވަން ކުރި ނަމަވެސް ގެއްލުނު ފައިސާ ހޯދަން ރައީސް މުއިއްޒުގެ ސަރުކާރަށް ހުރަހެއް ނެތް: ކުރީގެ ރައީސް ސޯލިހު
އެމްއެމްޕީއާރްސީގެ ޚިޔާނާތުގެ މައްސަލައިގައި ކުރީގެ ނައިބު ރައީސް އަދީބަށް ލުއި ދެއްވީ ގާނޫނީ އިމުގެ ތެރެއިން ކަމަށާއި، ނަމަވެސް ދައުލަތަށް ގެއްލުނު ފައިސާ ހޯދުމަށް މި ސަރުކާރަށް އެއްވެސް ހުރަހެއް ނެތް ކަމަށް ކުރީގެ ރައީސް ސޯލިހު ވިދާޅުވި. އަދީބަށް ލުއި ދިނީ ހުކުމުގެ ބޮޑު ބައެއް ތަންފީޒުކޮށްފައިވުމާއި ކަރެކްޝަންސްގެ ލަފަޔަށް ބެލުމަށްފަހު ކަމަށް އެމަނިކުފާނު ވިދާޅުވި. އަދި ޚިޔާނާތުގެ ފައިސާ ހޯދުމުގެ މަދަނީ މަސައްކަތް މިހާރުގެ ސަރުކާރުން ކުރިއަށް ނުގެންދާތީ އެމަނިކުފާނު ވަނީ ސުވާލު އުފައްދަވާފައި.
ކުރީގެ ރައީސް އަބްދުﷲ ޔާމީން ސަރުކާރުގެ ނައިބު ރައީސްކަން ކުރެއްވި އަހުމަދު އަދީބު.
ކުރީގެ ރައީސް އަބްދުﷲ ޔާމީންގެ ސަރުކާރުގެ ނައިބު ރައީސްކަން ކުރެއްވި އަހުމަދު އަދީބަށް އެމްއެމްޕީއާރްސީގެ ހިޔާނާތުގެ މައްސަލާގައި މައާފު ދީ މިނިވަން ކުރި ނަމަވެސް، ދައުލަތަށް ގެއްލުނު ފައިސާ ހޯދުމަށް މި ސަރުކާރަށް އެއްވެސް ހުރަހެއް ނެތް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ހުކުރު ދުވަހުގެ ރޭ، ކުރީގެ ރައީސް މުހައްމަދު ނަޝީދު އާއި އަބްދުﷲ ޔާމީން އަދި އިބްރާހިމް މުހައްމަދު ސޯލިހު ބައްދަލު ކުރެއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ސޯލިހު ވިދާޅުވީ، އަދީބުގެ މައްސަލައިގައި މަސައްކަތް ކުރީ ގާނޫނީ އިމުގެ ތެރެއިން ކަމަށެވެ.
ރައީސް ސޯލިހު ވިދާޅުވީ އެމްއެމްޕީއާރުސީގެ މައްސަލަ ތަހުގީގު ކުރުމަށް ކޮމިޝަނެއް އުފައްދައި، ތަހުގީގުތައް ނިންމައި ބައެއް ފަރާތްތައް ޝަރީއަތަށް ފޮނުވި ކަމަށެވެ. އަދި އަދީބަށް ލުއި ދިނުމުގެ ކުރިން، އޭނާ ހުކުމުގެ ބޮޑު ބައެއް ތަންފީޒު ކޮށްފައިވޭތޯ އާއި ކަރެކްޝަންސްގެ ލަފަޔަށް ބަލާފައިވާ ކަމަށް އެމަނިކުފާނު ވިދާޅުވި އެވެ.
އަޅުގަނޑު ވެރިކަމަށް އައިސް ކޮމިޝަނެއް އުފައްދާ އެ ތަހުގީގުކޮށް އަޅުގަނޑަށް ނިންމާލެވުނީ. އަދި ބައެއް ފަރާތްތައް ޝަރީއަތާ ހިސާބަށް ފޮނުވުނީ. އަނެއްބައި މައްސަލަތައް ޕްރޮސެކިއުޓަރ ޖެނެރަލަށް (ޕީ.ޖީ) އޮފީހާ ހިސާބަށް ފޮނުވުނީ. އޭގެތެރެއިން އަހުމަދު އަދީބުގެ މައްސަލަ ޚާއްސަކޮށް ތި ނެންގެވި. ވެރިކަމުގައި މީހަކު ހުއްނައިރު އަދަބުލިބޭ ފަރާތްތަކުން ހުކުމަށް ލުއި ހޯދުމަށްޓަކައި ވެރިންނާ ހިސާބަށް މައްސަލަތައް ފޮނުވާ. އަޅުގަނޑާ ހިސާބަށް ވެސް އާދޭ. އަޅުގަނޑު ހިތުން މިއިން ކޮންމެ ބޭފުޅަކާ ހިސާބަށް ވެސް އެކަހަލަ ކިތަންމެ މައްސަލައެއް އައިސްސަ ހުންނާނެ. އެކަހަލަ މައްސަލައެއް އައިމާ އަޅުގަނޑުމެން ބަލަނީ އޭގެ ގާނޫނީ ގޮތުން އެ މީހަކަށް ލުޔެއް ދެވެން އޮތްތޯ ނޫންތޯ. ފުރަތަމަ އެޅީ އެ ހުކުމުގެ ތެރެއިން. އެ ހުކުމުގެ ތެރެއިން އަދަބު ލުއިކޮށްދިނުމަށް ބޭނުންވާ ވަރަށް ތަންފީޒުކޮށްފައި އޮތް ތަން. ދެން އެއާ ގުޅި އެއަށްފަހުގައި ކަރެކްޝަންސް އިން އެއީ ކުށްވެރިޔަކާ ދޭތެރޭގައި ދެކޭ ގޮތާއި، އެ މީހަކު ކުށަށް ލުއި ދިނުމާއި، މިނިވަންކުރުމުގައި ކަމެއް ކުރެވެން އެބައޮތްތޯ؟ އެ ހުރިހާ އެއްޗެއްގެ އަލީގައި އަޅުގަނޑާ ހިސާބަށް އައިއިރު ލިޔުމުގައި އޮންނަނީ އަހުމަދު އަދީބަށް ލުއިދިނުމަށް އެހެން މީހުންނެކޭ ވެސް އެފަދައިން، ހުކުމް އެވަރަށް ތަންފީޒު ކޮށްފައި އޮތީމަ ލުއިދިނުމުގެ ފުރުސަތު އޮތް ކަމަށް. މެޑިކަލް ރިޕޯޓުތައް ހުރީ އައިސްފައި. އަޅުގަނޑު ހަމައެކަނި ލުއި ދިނީ ޖިނާއީ މައްސަލައެއް.ކުރީގެ ރައީސް އިބްރާހިމް މުހައްމަދު ސޯލިހު
ރައީސް މުއިއްޒުގެ ސަރުކާރަށް އިޝާރާތް ކުރައްވައި ރައީސް ސޯލިހު ވިދާޅުވީ އެމްއެމްޕީއާރްސީ ހިޔާނާތުގެ އެ ފައިސާ ހޯދުމުގެ މައްސަލަ މި ސަރުކާރަށް ވެސް ކުރިއަށް ގެންދެވޭނެ ކަމަށެވެ. ނަމަވެސް މިސަރުކާރުން އެކަން ނުކުރާ ސަބަބާ ގުޅޭގޮތުން ރައީސް ސޯލިހު ސުވާލު އުފެއްދެވި އެވެ.
އޭގެ އަނެއް ފަޅިއަކީ، މަދަނީ. ފައިސާ ހޯދުމުގެ މައްސަލަ އެކަން ބަލައި ތަހުގީގުކޮށް ނިންމައި ޝަރީއަތްކުރުމާ ހިސާބުގައި އެ މައްސަލަތައް ހުންނާނެ. އަޅުގަނޑު ހިތަށް އަރަނީ އެކަން ކުރިއަށް ނުދަނީ ކީއްވެގެންތޯ މިހާރު؟ އޭގެ އެއްފަޅިއަކީ މި ދެންނެވިހެން ގެއްލުނު ފައިސާ ހޯދުމުގެ ބައެއް. އެހެންވީމާ، އެކަން ކުރިއަށް ގެންދަންވީ މިހާރުވެސް. ޖިނާއީ އަޅުގަނޑު މި ދެންނެވިހެން ޖިނާއީ ކުށަށް ލުއި އެހެން މީހުން ވެސް ދީފައި ހުންނާނެ. އެގޮތުން، އަހުމަދު އަދީބަށް ވެސް ދިން ލުއިއަކީ ގާނޫނީ އިމުގެ ތެރެއިން ގާނޫނު ލިބިދޭ ފުރުސަތެއްގެ ތެރެއިން ކޮށްފައި އޮތް ކަމެއްކުރީގެ ރައީސް އިބްރާހިމް މުހައްމަދު ސޯލިހު
މީގެ އިތުރުން ރައީސް ސޯލިހު ވިދާޅުވީ އަދީބުގެ އިތުރުން އެހެން މީހުންނަށް ވެސް ގާނޫނީ އިމުގެ ތެރެއިން ލުއިތައް ދީފައިވާނެ ކަމަށެވެ.
