މެކްސިކޯގެ ހަމަނުޖެހުންތަކާ އެކު ވެސް، ކާމިޔާބުކަމާ އެކު ވޯލްޑް ކަޕް ބޭއްވޭނެ ކަމުގެ އިތުބާރު އިންފަންޓީނޯ އަށް އެބަ އޮތް

މެކްސިކޯގެ ޑްރަގް ކާޓެލް ލީޑަރަކު މަރާލުމާ ގުޅިގެން އެ ޤައުމުގައި ހަމަ ނުޖެހުންތަކެއް ހިނގި ނަމަވެސް، މިއަހަރު ބާއްވާ ފީފާ ވޯލްޑް ކަޕްގެ މެޗުތައް އެ ޤައުމުގައި ބޭއްވޭނެ ކަމުގެ ފުރިހަމަ އިތުބާރު އެބަ އޮތް ކަމަށް، ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ. 

މިއީ މެކްސިކޯގައި ހިނގި ކަންތައްތަކަށް ފަހު އިންފަންޓީނޯ އެ މައްސަލައިގައި ވާހަކަ ދެއްކެވި ފުރަތަމަ ފަހަރެވެ. އިންފަންޓީނޯ ވިދާޅުވީ، އެމެރިކާ އާއި ކެނެޑާ އަދި މެކްސިކޯ ގުޅިގެން ބާއްވާ ވޯލްޑް ކަޕްގެ މެޗުތައް، މެކްސިކޯގައި ބޭއްވުމާ މެދު އޭނާ ވަރަށް ބޮޑަށް ހިތްހަމަ ޖެހިވަޑައިގަންނަވާ ކަމަށެވެ. 

އަންގާރަ ދުވަހު އޭއެފްޕީއާ ވާހަކަ ދައްކަވަމުން އިންފަންޓީނޯ ވިދާޅުވީ، ކަންކަން ކުރިއަށް ދަނީ ވަރަށް ހިތްހަމަ ޖެހޭ ގޮތަށް ކަމަށާއި، ހުރިހާ ކަމެއް ވެސް އެންމެ ރަނގަޅު ގޮތުގައި ފެންނަ ކަމަށެވެ. އަދި މިއަހަރުގެ ވޯލްޑް ކަޕަކީ، ވަރަށް ތަފާތު އަދި އެހާމެ ހައިރާން ކުރުވަނިވި މުބާރާތަކަށް ވާނެ ކަމަށް ވެސް އިންފަންޓީނޯ ވަނީ ވިދާޅުވެފަ އެވެ. 

މެކްސިކޯގެ ކާޓެލް ލީޑަރެއް ކަމަށްވާ އެލް މެންޗޯ އޮސެގުއެރޯ މަރާމުލާ ގުޅިގެން، އެ ކާޓެލްގެ މެމްބަރުން ހިންގި ހަމަ ނުޖެހުން ތަކުގެ ސަބަބުން މެކްސިކޯގައި ވަނީ ނުތަނަވަސްކަން އުފެދިފަ އެވެ. ހަމަ ނުޖެހުން ހިންގި ސަރަހައްދު ތަކުގެ ތެރޭގައި ވޯލްޑް ކަޕް ބޭއްވުމަށް ހަމަޖެހިފައިވާ ގުއަޑަލަޖާރާ ސިޓީ ވެސް ހިމެނެ އެވެ. 

އިންފަންޓީނޯ ވިދާޅުވީ އެކަން ކަމުގެ ސަބަބުން ފުޓުބޯޅަ ސަޕޯޓަރުންނަށް އެއްވެސް ބިރުވެރި ކަމެއް، އަދި ނުރައްކާތެރި ކަމެއް ނެތް ކަމަށެވެ. އަދި މުބާާރާތް ކުރިއަށްދާއިރު، ސަލާމަތީ ގޮތުން އަޅަން ޖެހޭ ފިޔަވަޅު ތަކާއި، ރައްކާތެރި ކަމުގެ ކަންކަން ޔަޤީން ކުރެވޭނެ ކަމަށް ވެސް އިންފަންޓީނޯ ވަނީ ވިދާޅުވެފަ އެވެ. 

މިއަހަރުގެ ވޯލްޑް ކަޕް ކުރިއަށް ގެންދިޔުމަށް ހަމަޖެހިފައި ވަނީ ޖޫން މަހުގެ 11 ވަނަ ދުވަހުން ފެށިގެން، ޖުލައި މަހުގެ 19 ވަނަ ދުވަހުގެ ނިޔަލަށެވެ. އެމެރިކާ އާއި ކެނެޑާ އަދި މެކްސިކޯގައި މިއަހަރުގެ ވޯލްޑް ކަޕް ބޭއްވުމަށް ހަަމަޖެހިފައިވާއިރު، މުބާރާތަށް ތައްޔާރުވުމުގެ ގޮތުން ތިން ޤައުމުން ވެސް އަންނަނީ ގިނަ ކަންކަން ކުރިއަށް ގެންދަމުންނެވެ. 

ބާރު ގަދަ ޖަލިސްކޯ ނިއު ޖެނެރޭޝަން ކާޓެލްގެ ލީޑަރު މަރާލުމާ ގުޅިގެން މެކްސިކޯގެ އެކި ސަރަހައްދު ތަކުގައި ހިނގި ހަމަ ނުޖެހުންތައް މުޅި ޤައުމު ވަނީ ނުތަނަވަސް ކަމެއްގެ ތެރޭގަ އެވެ. ގުއަޑަލަޖާރާ ކައިރީގައި އޮންނަ ރާންޗެއްގައި އޭނާ ހައްޔަރު ކުރުމަށް ހިންގި އޮޕަރޭޝަންގައި، ސެކިއުރިޓީ ފޯސްތަކާއި ކާޓެލް މެމްބަރުންނާ ދެެމެދު ހިނގި ކުރިމަތިލުން ތަކުގައި މަދުވެގެން 74 މީހަކު މަރުވެފައިވެ އެވެ.