އީރާން އިން ވޯލްޑް ކަޕްގައި ބައިވެރި ނުވާން ނިންމާފައިވާ ކަމަށް، އެ ޤައުމުގެ ކުޅިވަރު ވަޒީރު ވިދާޅުވެއްޖެ
12 މާރިޗު 2026 | ބުރާސްފަތި 05:34އީރާންގެ ކުޅިވަރު މިނިސްޓަރު ވިދާޅުވީ، އަނިޔާވެރި އަދި ކޮރަޕްޓުވެފައިވާ ސަރުކާރަކުން އީރާންގެ އެންމެ އިސް ލީޑަރު އަވަހާރަ ކޮށްލާފައިވާ ކަމަށް. އެމެރިކާ އިން އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލި ހާދިސާ އަށް އިޝާރާތް ކުރައްވައި އޭނާ ވިދާޅުވީ، މިވަގުތު އީރާންގެ ކުޅުންތެރިންނަށް ވެސް އެންމެ ރައްކާތެރިކަމުގެ އެއްވެސް ޔަގީން ކަމެއް ނެތް ކަމަށް.
ފީފާ ވޯލްޑް ކަޕްގެ ގުރު ނެގި ރަސްމިއްޔާތުގައި އީރާންގެ ދިދަ | ރޮއިޓާސް
އެމެރިކާ އާއި މެކްސިކޯ އަދި ކެނެޑާގައި މިއަހަރު އޮންނަ ފީފާ ވޯލްޑް ކަޕްގައި ބައިވެރި ނުވާާން އީރާން އިން ނިންމާފައިވާ ކަމަށް، އެ ޤައުމުގެ ކުޅިވަރު މިނިސްޓަރު އަޙުމަދު ޑޮންޔާމާލީ ވިދާޅުވެއްޖެ އެވެ.
ތިން ޤައުމު ގުޅިގެން މިއަހަރުގެ ވޯލްޑް ކަޕް ބާއްވާއިރު، މުބާރާތް ފެށުމަށް ހަމަޖެހިފައި ވަނީ ޖޫން މަހުގެ 11 ވަނަ ދުވަހު އެވެ. މުބާރާތުގެ ގްރޫޕް ސްޓޭޖުގައި އީރާން އިން ކުޅެން ޖެހޭ ތިން މެޗު ވެސް އޮތީ އެމެރިކާގަ އެވެ. އެގޮތުން ޖޫން މަހުގެ 15 ވަނަ ދުވަހު އީރާން އިން ނިއުޒިލެންޑާ ދެކޮޅަށް ކުޅޭނެ އެވެ. އެއަށް ފަހު ޖޫން މަހުގެ 21 ވަނަ ދުވަހު ބެލްޖިއަމްއާ ދެކޮޅަށް ކުޅުމަށް ފަހު، ޖޫން މަހުގެ 26 ވަނަ ދުވަހު ކުޅޭނީ މިޞްރާ ދެކޮޅަށެވެ.
ނަމަވެސް، އެމެރިކާާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފަށާފައިވާއިރު، އީރާން އިން މީގެ ކުރިން ވެސް ވަނީ ވޯލްޑް ކަޕްގައި ބައިވެރިވުމާ މެދު ގޮތެއް ނިންމާނެ ކަމަށް ހާމަ ކޮށްފަ އެވެ. އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި އީރާން އިން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ.
އީރާންގެ ކުޅިވަރު މިނިސްޓަރު ވިދާޅުވީ، އަނިޔާވެރި އަދި ކޮރަޕްޓުވެފައިވާ ސަރުކާރަކުން އީރާންގެ އެންމެ އިސް ލީޑަރު އަވަހާރަ ކޮށްލާފައިވާ ކަމަށެވެ. އެމެރިކާ އިން އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލި ހާދިސާ އަށް އިޝާރާތް ކުރައްވައި އޭނާ ވިދާޅުވީ، މިވަގުތު އީރާންގެ ކުޅުންތެރިންނަށް ވެސް އެންމެ ރައްކާތެރިކަމުގެ އެއްވެސް ޔަގީން ކަމެއް ނެތް ކަމަށެވެ.
އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ އަށް އިޝާރާތް ކުރައްވަމުން އޭނާ ވިދާޅުވީ، އެ ހަނގުރާމައިގެ ސަބަބުން އީރާން އަށް އެތައްް ގެއްލުން ތަކެއް ލިބިފައިވާ ކަމަށެވެ. އަދި އީރާންގެ ރައްޔިތުންގެ ތެރެއިން އެތައް ހާސް ބަޔަކު ޝަހީދުވެފައިވާ ކަމަށާއި، ވޯލްޑް ކަޕްގައި އީރާން އިން ބައިވެރިވުމުގެ އެއްވެސް ފުރުސަތެއް ނެތް ކަމަށް އޭނާ ވިދާޅުވި އެވެ.
ވޯލްޑް ކަޕްގައި ބައިވެރި ނުވާނެ ކަމަށް އީރާންގެ ކުޅިވަރު މިނިސްޓަރު ވިދާޅުވެފައި ވީ ނަމަވެސް، މިކަމުގައި ފީފާ އިން މިހާތަނަށް ވަކި އެއްޗެއް ބުނެފައި ނުވެ އެވެ. އީރާން އިން މުބާރާތުގައި ބައިވެރިނުވާން ނިންމި ނިންމުން، ރަސްމީކޮށް ފީފާ އަށް އަންގާފައިވާ ކަމެއް ކަށަވަރުވެފައި ނުވެ އެވެ.
