އީރާނުން ވޯލްޑް ކަޕް ނުކުޅެން ވިސްނަނީ، ޓްރަމްޕް ވިދާޅުވީ އެއީ އޭނާއާ ބެހޭ ކަމެެއް ނޫން ކަމަށް!

މިއަހަރު އެމެރިކާ އާއި، މެކްސިކޯ އަދި ކެނެޑާގައި އޮންނަ ފީފާ ވޯލްޑް ކަޕް ގައި ބައިވެރިވުމާ މެދު ދެ ވަނަ ވިސްނުމަކަށް ދާން އީރާން އިން ނިންމައިފި އެވެ.

އީރާނުން މިހެން ނިންމާފައި ވަނީ، މިދިޔަ ހޮނިހިރު ދުވަހު އެމެރިކާ އާއި އިޒްރޭލް އެކުވެގެން އީރާނަށް ހަަމަލާ ދޭން ފަށާފައި ވަނިކޮށެވެ. އެ ހަމަލާ ތަކުގައި އީރާންގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ އާއި، އެ ޤައުމުގެ އިސް ވެރިންތަކެއް ވެސް ވަނީ އަވަހާރަ ކޮށްލައިފަ އެވެ. 

އެކަމާ ގުޅޭ ގޮތުން އީރާންގެ ފުޓުބޯޅަ ފެޑެރޭޝަންގެ ރައީސް މަހުދީ ތާޖް ވިދާޅުވެފައި ވަނީ، އެމެރިކާ އާއި އިޒްރޭލް އިން މިހާރު ދެމުން އަންނަ ހަމަލާ ތަކަށް ފަހު، މިއަހަރު އޮންނަ ވޯލްޑް ކަޕްގައި އީރާން އިން ކުޅޭނެ ކަމުގެ އެއްވެސް އުންމީދެއް ނެތް ކަމަށެވެ. މީޑިއާ ތަކުގައި ބުނެފައި ވަނީ، އެކަމުގައި އީރާން އިން ފީފާގެ ލަފަޔަކަށް، ނުވަތަ އަމަލު ކުރާނެ ގޮތަކަށް ވެސް ވަނީ އެދިފަ އެވެ. 

އެއާ އެކު އެމެރިކާގެ ރައީސް ޑޮނަލްޑް ޓްރަމްޕް ޕޮލިޓިކޯ ނޫހަށް ވިދާޅުވެފައި ވަނީ، އީރާން އަކީ މިހާރު ވަރަށް ބޮޑަށް ބަލިކަށިވެފައިވާ ޤައުމެއް ކަމަށެވެ. އެހެންކަމުން، އީރާން އިން މުބާރާތުގައި ކުޅުނަސް، ނުވަތަ ނުކުޅުނަސް އެކަމާ އޭނާ އަޅާ ނުލާނެ ކަމަށް ޓްރަމްޕް ވިދާޅުވި އެވެ. ޓްރަމްޕް މިހެން ވިދާޅުވެފައިވާއިރު، މިދިޔަ އަހަރުގެ ޖޫން މަހުގެ ތެރޭގައި ޓްރަމްޕް ނެރުއްވާފައިވާ ދަތުރު ކުރުން މަނާ ކުރުމުގެ ޤަރާރުގައި ވެސް އީރާން ހިމެނެ އެވެ. 

އެކަމާ ގުޅޭ ގޮތުން، ވޯލްޑް ކަޕް ޓާސްކް ފޯހުގެ ވައިޓް ހައުސްގެ ޑިރެކްޓަރު އެންޑްރޫ ގިއުލިއާނީ ވިދާޅުވީ، ވިސާ ދިނުމުގައި އެންމެ ބޮޑަށް ބަލާނީ ސަލާމަތީ ކަންތައް ތަކަށް ކަމަށެވެ. އޭނާ ވިދާޅުވީ، އީރާންގައި މިހާރު އޮތް ޙާލަތަށް ބަލާއިރު، އެއްވެސް ބެލުމެއް ނެތި ބޯޑަރު ހުޅުވާލުމަކީ ބުއްދިވެރި ގޮތެއް ނޫން ކަމަށެވެ. އެއާ އެކު އޭނާ ވިދާޅުވީ، އީރާނާ ދެކޮޅަށް ޓްރަމްޕް އަޅުއްވާފައިވާ ފިޔަވަޅަކީ ދުނިޔެ ސަލާމަތްކޮށް، ވޯލްޑް ކަޕަށް ޒިޔާރަތް ކުރާ އެތައް މިލިއަން މީހުންނަށް ރައްކާތެެރިކަން ކަށަވަރު ކޮށްދޭނެ ކަމެއް ކަމަށެވެ. 

ވޯލްޑް ކަޕްގައި އީރާންގެ ފުރަތަމަ މެޗު އޮތީ ޖޫން މަހުގެ 15 ވަނަ ދުވަހު ނިއުޒިލެންޑާ ދެކޮޅަށެވެ. އެއަށް ފަހު ޖޫން މަހުގެ 21 ވަނަ ދުވަހު ބެލްޖިއަމްއާ ދެކޮޅަށް ކުޅުމަށް ފަހު، ޖޫން މަހުގެ 26 ވަނަ ދުވަހު ނިކުންނާނީ މިޞްރާ ދެކޮޅަށެވެ. މުބާރާތުގެ ގުރޫޕް ސްޓޭޖުގެ ނަތީޖާ ނިކުންނަ ގޮތުން، ޖުލައި ތިން ވަނަ ދުވަހު އޮންނަ ނޮކްއައުޓް މެޗެއްގައި އީރާން އާއި އެމެރިކާ ބައްދަލު ކުރުމުގެ ފުރުސަތު ވެސް އެބަ އޮތެވެ.