ޓްރަމްޕް އަށް މެސެޖެއް ދިނުމުގެ ގޮތުން، ވާރލްޑް ކަޕް ބޮއިކޮޓް ކުރުމަށް ގެންގުޅުނު ވިސްނުން ޖަރުމަނުން ދޫކޮށްލައިފި

އެމެރިކާގެ ރައީސް ޑޮނަލްޑް ޓްރަމްޕް އަށް މެސެޖެއް ދިނުމުގެ ގޮތުން، ފީފާ ވާރލްޑް ކަޕް ބޮއިކޮޓް ކުރުމަށް ގެންގުޅުނު ވިސްނުން ދޫކޮށްލާފައިވާ ކަމަށް ޖަރުމަނުގެ ފުޓުބޯޅަ ފެޑެރޭޝަން އިން ބުނެފި އެވެ. 

ހުކުރު ދުވަހުގެ ރޭ ނެރުނު ބަޔާނެއްގައި ޖަރުމަނު ފުޓުބޯޅަ ފެޑެރޭޝަން އިން ބުނެފައި ވަނީ، ކުޅިވަރުގެ އެކުވެރި ކަމުގެ ބާރާއި، ވާރލްޑް ކަޕް އިން ދުނިޔެ އަށް ލިބިދޭ އަސަރު އެ މީހުން ޤަބޫލު ކުރާ ކަމަށެވެ. އެ ބަޔާނުގައި ބުނެފައި ވަނީ، އެ މީހުންގެ މަޤުސަދަކީ މި ހެޔޮ ބާރު ވަރުގަދަ ކުރުން ކަމަށާއި، އެކަން ހުއްޓުވަން ބޭނުން ނުވާ ކަމަށެވެ.

މީގެ އިތުރުން އެ ފެޑެރޭޝަން އިން ބުނީ، އެ ފެޑެރޭޝަންގެ ހިންގާ ކޮމެޓީގެ ބައްދަލުވުމެއް ބޭއްވުމަށް ފަހު، މިއަހަރު އެމެރިކާ އާއި، މެކްސިކޯ އަދި ކެނެޑާގައި ބާއްވާ ވާރލްޑް ކަޕް ބޮއިކޮޓް ކުރުމުގެ ޚިޔާލާ ގުޅޭ ގޮތުން މަޝްވަރާ ކޮށްފައިވާ ކަމަށެވެ. ޓްރަމްޕް އަށް މެސެޖެއް ދިނުމުގެ ގޮތުން ވާރލްޑް ކަޕް ބޮއިކޮޓް ކުރުމުގެ ޚިޔާލު ހުށަހެޅީ ޖަރުމަނު ފުޓުބޯޅަ ފެޑެރޭޝަންގެ ނައިބު ރައީސް އޯކޭ ގެޓޮލިޗް އެވެ. 

ޖަރުމަނު ލީގުގެ ކުލަބެއް ކަމަށްވާ ސެންޓް ޕައުލީގެ ރައީސްގެ މަގާމުގައި ވެސް ހުންނެވި ގެޓޮލިޗް ވިދާޅުވެފައި ވަނީ، އެމެރިކާގެ ރައީސް ޓްރަމްޕްގެ އަމަލުތައް ހުންނަ ގޮތާއި، ބަސް މަގު ހުންނަ ގޮތުގެ ސަބަބުން، މިއަހަރުގެ ވާރލްޑް ކަޕް ބޮއިކޮޓް ކުރުމަށް ވިސްނާލުމުގެ ވަގުތު އައިސް ޖެހިފައިވާ ކަމަށެވެ. އެކަމާ ގުޅޭ ގޮތުން ޖަރުމަނުގެ ފުޓުބޯޅަ ފެޑެރޭޝަން އިން ބުނީ، ކުޅިވަރުގެ ސިޔާސަތުތަކާ ބެހޭ ބަހުސްތައް ކުރަން ވާނީ އެތެރޭގައި ކަމަށާއި، އެއީ އާންމުންގެ ތެރޭގައި ކުރަން ޖެހޭ ބަހުސެއް ނޫން ކަމަށެވެ. 

އެއާ އެކު، އެ ފެޑެރޭޝަން އިން ބުނެފައި ވަނީ މިހާރު ވާރލްޑް ކަޕް ބޮއިކޮޓް ކުރުމަކީ ވިސްނަމުންދާ ކަމެއް ނޫން ކަމަށެވެ. މިއަހަރުގެ ޖޫން މަހުގެ 11 ވަނަ ދުވަހުން ފެށިގެން، ޖުލައި މަހުގެ 19 ވަނަ ދުވަހާ ހަމައަށް ވާރލްޑް ކަޕް ކުޅުމަށް ހަމަޖެހިފައިވާއިރު، ޖަރުމަނުގެ ފުޓުބޯޅަ ފެޑެރޭޝަން އިން ބުނީ އެ މުބާރާތަށް ތައްޔާރުވުމުގެ ގޮތުން ސިޔާސީ ފަރާތްތަކާއި، ސަލާމަތީ ފަރާތްތަކާއި، ވިޔަފާރީގެ ފަރާތްތައް އަދި ކުޅިވަރުގެ ފަރާތްތަކާ ގުޅިގެން މަސައްކަތް ކުރަމުން ގެންދާ ކަމަށެވެ. 

ވާރލްޑް ކަޕް ބާއްވާ ޤައުމު ތަކުގެ ތެރޭގައި އެމެރިކާ ހިމެނޭއިރު، އެ ޤައުމުގެ ރައީސް ޓްރަމްޕްއާ މެެދު ދުނިޔޭގެ ގިނަ ބަޔަކު ވަނީ ނުރުހުންވެފަ އެވެ. ޚާއްސަކޮށް ގްރީންލޭންޑް ހޯދުމަށް ޓްރަމްޕް ކުރަމުން އަންނަ މަސައްކަތްތަކާއި، އެކަމާ ދެކޮޅު ހެދި ޔޫރަޕުގެ ޤައުމު ތަކަށް ޓެރިފް ނަގާނެ ކަމުގެ ބިރު ދެއްކުންތަކާ އެކު، ޔޫރަޕުގައި ވަނީ ނުތަނަވަސްކަން އުފެދިފަ އެވެ. މީގެ އިތުރުން ވެނެޒުއެލާއާ ދެކޮޅަށް އެމެރިކާ އިން ހިންގި އަސްކަރީ އޮޕަރޭޝަން އާއި، އެމެރިކާގެ އެކި ސިޓީ ތަކުގައި ކުރަމުން އަންނަ މުޒާހަރާ ތަކާ ދެކޮޅަށް އަޅާފައިވާ ފިޔަވަޅު ތަކުގެ ސަބަބުން ވެސް ކަންބޮޑުވުން ވަނީ އިތުރުވެފަ އެވެ. 

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ކުރީގެ ރައީސް ސެޕް ބްލެޓާ ވަނީ، މިއަހަރުގެ ވޯލްޑް ކަޕް ބަލަން ނުދިޔުމަށް ގޮވާލައްވައިފަ އެވެ. ނަމަވެސް، މީގެ ކުރިން ރަޝިޔާ އާއި ޔޫކްރެއިންއާ ދެމެދު އޮތް މައްސަލައިގެ ސަބަބުން، 2018 ވަނަ އަހަރު ރަޝިޔާގައި އޮތް ވާރލްޑް ކަޕް ބޮއިކޮޓް ކުރުމަށް ގިނަ ބަޔަކު ގޮވާލި ނަމަވެސް، ބްލެޓާ ވަނީ އެކަމާ ދެކޮޅު ހައްދަވައިފަ އެވެ. އެ ދުވަސްވަރު ބްލެޓާ ވިދާޅުވެފައި ވަނީ، އެއްވެސް ޤައުމެއްގައި ފުޓުބޯޅަ ބޮއިކޮޓް ކުރެވެން ނެތް ކަމަށެވެ.