ވޯލްޑް ކަޕް އިން އީރާން ބޭރު ކުރުމުގެ ބާރު ޓްރަމްޕް އަށް ނެތް ކަމަށް ބުނެފި

މިއަހަރު އެމެރިކާ އާއި މެކްސިކޯ އަދި ކެނެޑާގައި އޮންނަ ފީފާ ވޯލްޑް ކަޕް އިން އީރާން ބޭރު ކުރުމަކީ އެމެރިކާގެ ރައީސް ޑޮނަލްޑް ޓްރަމްޕް އަށް ކުރެވޭނެ ކަމެއް ނޫން ކަމަށް އެ ޤައުމުން ބުނެފި އެވެ. 

އީރާން އިން މިހެން ބުނެފައި ވަނީ، މިއަހަރު އޮންނަ ވޯލްޑް ކަޕްގައި އީރާން ބައިވެރިވުމަކީ އެ ޤައުމުގެ ކުޅުންތެރިންގެ ފުރާނަ އަށާއި، ސަލާމަތަށް ނުރައްކާ ވެދާނެ ކަމެއް ކަމަށް ވިދާޅުވެ، ޓްރަމްޕް އިންޒާރެއް ދެއްވާފައި ވަނިކޮށެވެ. 

އީރާންގެ ޤައުމީ ޓީމުން އާންމު ކުރި ބަޔާނެއްގައި ބުނެފައި ވަނީ، މުބާރާތުގައި ބައިވެރިވާ ޓީމު ތަކުގެ ސަލާމަތާއި ރައްކާތެރިކަން ކަށަވަރުކޮށް ނުދެވޭނެ ނަމަ، އެމެރިކާ އަށް މުބާރާތް ބޭއްވުމުގެ ފުރުސަތު ދީގެން ނުވާނެ ކަމަށެވެ. ވޯލްޑް ކަޕް އަކީ ތާރީޚީ އަދި ބައިނަލްއަޤުވާމީ ޙަރަކާތެއް ކަމަށާއި، އެ މުބާރާތް ހިންގާ ބަޔަކީ ފީފާ ކަމަށް އީރާން އިން ބުނެފައިވެ އެވެ. އަދި އެއީ ވަކި ފަރުދަކަށް، ނުވަތަ ވަކި ޤައުމަކަށް ގޮތް ނިންމޭނެ ކަމެއް ނޫން ކަމަށް ވެސް ބަޔާނުގައި ބުނެފައިވެ އެވެ. 

އެމެރިކާގެ ރައީސް ޓްރަމްޕް އެހެން ވިދާޅުވެފައި ވަނީ، ފީފާގެ ރައީސް ޖިއާނީ އިންފަންޓީނޯއާ ބައްދަލު ކުރައްވައި، މެދު އިރުމަތީގައި ހިނގަމުންދާ ހަނގުރާމައާ އެކު ވެސް، އީރާންގެ ކުޅުންތެރިންނަށް މަރުޙަބާ ކިޔާނެ ކަމަށް ވިދާޅުވިތާ އެންމެ ދެ ދުވަސް ފަހުންނެވެ. ނަމަވެސް، ބުރާސްފަތި ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ އީރާންގެ ކުޅުންތެރިންނަށް މަރުޙަބާ ކިޔާ ނަމަވެސް، އެ ޤައުމުގެ ކުޅުންތެރިންގެ ފުރާނަ އަށާއި، ސަލާމަތަށްޓަކައި އެމެރިކާގައި އޮންނަ މުބާރާތަށް އެ ޓީމު އައުމަކީ އެންމެ އެކަށީގެންވާ ކަމެއް ކަމަށް ޤަބޫލު ނުކުރައްވާ ކަމަށެވެ. 

އެކަމާ ގުޅޭ ގޮތުން އީރާން އިން ބުނެފައި ވަނީ، އެ ޤައުމަކީ ކުޅަދާނަ ކުޅުންތެރިންގެ ހިތްވަރާ އެކު މުބާރާތަށް ކޮލިފައިވި އެންމެ ފުރަމަ ޓީމު ތަކުގެ ތެރޭގައި ހިމެނޭ ޓީމެއް ކަމަށެވެ. އަދި އީރާން މުބާރާތުން ބޭރު ކުރުމުގެ ބާރު އެއްވެސް ފަރާތަކަށް ލިބިގެން ނުވާ ކަމަށް އީރާން އިން ބުންޏެވެ. އެކަން ފާހަގަކޮށް އީރާން އިން ބުނީ، މުބާރާތުން ބޭރު ކުރަން ޖެހޭނީ ބައިނަލްއަޤުވާމީ މިފަދަ ބޮޑު ޙަރަކާތެއް ބާއްވާއިރު ޓީމު ތަކަށް ސަލާމަތީ ކަންކަން ފޯރުކޮށް ނުދެވޭ، މުބާރާތް ބާއްވާ ޤައުމު ކަމަށެވެ. 

މިދިޔަ ފެބްރުވަރީ މަހު އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން، މިއަހަރުގެ ވޯލްޑް ކަޕްގައި އީރާން ބައިވެރި ނުވާނެ ކަމަށް އެ ޤައުމުގެ ސްޕޯޓްސް މިނިސްޓަރު ވެސް ވަނީ ވިދާޅުވެފަ އެވެ. އެއާ އެކު، މުބާރާތުގައި އީރާން އިން ބައިވެރިވާނެ ކަމާ މެދު މިހާރު ވަނީ ސުވާލު ތަކެއް އުފެދިފަ އެވެ.