އިތުރު އެއް އަހަރަށް، ސަންޓޯސްގެ އެއްބަސްވުން ނޭމާ އައު ކޮށްފި

ބްރެޒިލްގެ ސަންޓޯސް އަށް ކުޅެމުން އަންނަ، އެ ޤައުމުގެ ތަރި ނޭމާ ޖޫނިއާ، އެ ކުލަބާ އެކު ސޮއި ކޮށްފައިވާ އެއްބަަސްވުން އައު ކޮށްފި އެވެ. 

އުމުރުން 33 އަހަރުގެ ނޭމާ ސަންޓޯސް އަށް ބަދަލުވީ 2025 ވަނަ އަހަރުގެ ކުރީ ކޮޅު އެވެ. ސަންޓޯސް އަކީ ނޭމާ އޭނާ ގެ ސީނިއާ ކެރިއަރު ފެށި ކުލަބު ކަމަށްވާއިރު، ދެ ވަނަ ފަހަރަށް ސަންޓޯސް އަށް ބަދަލުވީ ހަ މަސް ދުވަހުގެ އެއްބަސްވުމެއްގެ ދަށުންނެވެ. ނަމަވެސް ޖޫން މަހުގެ ތެރޭގައި ސަންޓޯސް އިން ވަނީ، އެ އަހަރުގެ ޑިސެމްބަރު މަހުގެ ނިޔަލަށް ނޭމާގެ އެއްބަސްވުން އައު ކޮށްފަ އެވެ. 

އެ އެއްބަސްވުމުގެ މުއްދަތު ހަމަވާން ދިޔައިރު، އޭނާ ގެ މުސްތަޤުބަލާ މެދު އޮތީ ގިނަ ސުވާލު ތަކެއް އުފެދިފަ އެވެ. އެގޮތުން ކަކުލުގެ އަނިޔާއެއްގައި ނޭމާ އުޅުނުއިރު، އޭނާ އަލުން އެނބުރި ޔޫރަޕުގެ ކުލަބަކަށް ބަދަލުވާާން އުޅުނު ކަމުގެ އަޑުތައް ވެސް އޮތީ ފެތުރިފަ އެވެ. ނޭމާ މިހާރު އަންނަނީ ކަކުލުގެ ސާޖަރީއެއް ކުރުމަށް ފަހު، މުޅިން ފިޓު ވުމަށް މަސައްކަތް ކުރަމުންނެވެ.

ނޭމާގެ މުސްތަޤުބަލާ މެދު ގިނަ ސުވާލު ތަކެއް އުފެދިފައި އޮއްވާ، ސަންޓޯސް އިން ވަނީ އޭނާ ގެ އެއްބަސްވުން އައު ކޮށްފައިވާ ކަމަށް އިއުލާން ކޮށްފަ އެވެ. އެގޮތުން ނޭމާ ވަނީ، އެއް އަހަރު ދުވަހަށް ސަންޓޯސްގެ އެއްބަސްވުން އައު ކޮށްފަ އެވެ. އެހެންކަމުން، މި ފެށުނު 2026 ވަނަ އަހަރުގެ ޑިސެމްބަރު މަހުގެ ނިޔަލަށް ނޭމާ ސަންޓޯސްގައި މަޑު ކުރާނެ އެވެ. އެ ކުލަބުން ނޭމާގެ އެއްބަސްވުން އައު ކުރަން ބޭނުންވީ، އެ ކުލަބުގައި އޭނާ ރަނގަޅު ކުޅުމެއް ދައްކާފައިވާތީ އެވެ.

އެންމެ ފުރަތަމަ ނޭމާ ސަންޓޯސް އަށް ކުޅެފައި ވަނީ 2009 ވަނަ އަހަރުން، 2013 ވަނަ އަހަރަށެވެ. އެ މުއްދަތުގެ ތެރޭގައި ނޭމާ ވަނީ ސަންޓޯސް އަށް ކުޅެދިން 225 މެޗުގައި 136 ލަނޑު ޖަހައިފަ އެވެ. އޭގެ ފަހުން ނޭމާ ބާސެލޯނާ އަށް ބަދަލުވީއިރު، ދެން ބަދަލުވީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށެވެ. ޕީއެސްޖީ ދޫކޮށްލުމަށް ފަހު އަލް ޙިލާާލް އަށް ބަދަލުވި ނަމަވެސް، އަނިޔާގެ ސަބަބުން ނޭމާ އަށް އެކަށީގެންވާ ކުޅުމެއް ނުދެއްކުނުއިރު، ދެން އޭނާ ބަދަލުވީ ސަންޓޯސް އަށެވެ.

ދެ ވަނަ ފަހަރަށް ސަންޓޯސް އަށް ބަދަލުވެ ނޭމާ ވަނީ، އެ ކުލަބަށް ކުޅެދިން 28 މެޗުގައި 11 ލަނޑު ޖަހައިފަ އެވެ. ސަންޓޯސް އާއެކު ނޭމާ ވަނީ މީގެ ކުރިން ހަ ތައްޓެއް ވެސް ކާމިޔާބު ކޮށްފަ އެވެ. މިފަހަކަށް އައިސް ނޭމާ އަށް ވަނީ އަނިޔާގެ ގިނަ މައްސަލަތަކާ ކުރިމަތިލާން ޖެހިފަ އެވެ. އެކަމުގެ ސަބަބުން ނޭމާ އަށް އޭނާ ގެ އެކަށީގެންވާ ކުޅުން ވެސް ނުދެއްކެ އެވެ.

ސަންޓޯސްގައި މަޑު ކުރަން ނޭމާ ނިންމާފައިވާއިރު، އޭނާ ބޭނުން ވަނީ މިއަހަރު އޮންނަ ފީފާ ވޯލްޑް ކަޕްގައި ބްރެޒިލްގެ ސްކޮޑުން ޖާގަ ހޯދުމަށެވެ. ބްރެޒިލް އަށް އިރުޝާދު ދެމުން އަންނަ ކާލޯ އަންޗެލޮޓީ ވަނީ، ބްރެޒިލްގެ ޓީމުން ނޭމާ އަށް ފުރުސަތު އޮންނާނެ ކަމަށް ހާމަ ކޮށްފަ އެވެ. އެހެންކަމުން ބްރެޒިލްގެ ޓީމުގައި ހިމެނި، މިއަހަރުގެ ވޯލްޑް ކަޕް ކުޅުމަކީ ނޭމާގެ އެންމެ ބޮޑު އަމާޒު ކަމަށް ވަނީ ވެފަ އެވެ.