ޗައިނާ އާއެކު އޮންނަ ގުޅުން ވަރުގަދަ ކުރުމަށް، ޚާއްސަ މަންދޫބަކަށް ޣަލިބާފް ހަމަޖައްސަަވައިފި

އީރާންގެ ފަރާތުން ޗައިނާާ އަށް ކަނޑައަޅުއްވާ ޚާއްސަ މަންދޫބުގެ މަގާމަށް، އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް އައްޔަން ކުރައްވައިފި އެވެ. 

އާދީއްތަ ދުވަހު މިކަން ހާމަ ކޮށްފައި ވަނީ، އީރާންގެ ދައުލަތުގެ މީޑިއާ ތަސްނީމް ނިއުސް އެޖެންސީ އިންނެވެ.

މި މަގާމަށް ޣަލިބާފް އައްޔަން ކުރައްވާފައި މި ވަނީ، މެދު އިރުމަތީގެ މަސްރަހު ނުތަނަވަސްވެ، ސަރަހައްދީ ހަނގުރާމައެއްގެ ބިރު ބޮޑުވެފައިވާ ދަނޑިވަޅެއްގަ އެވެ. އީރާންގެ ސިޔާސީ މަސްރަހުގައި ނުފޫޒު ގަދަ ބޭފުޅެއްގެ ގޮތުގައި ފާހަގަ ކުރެވޭ ޣަލިބާފް އަކީ، ޗައިނާ އާއެކު އޮންނަ ގުޅުން އިތުރަށް ބަދަހި ކުރުމަށް އީރާން އިން ކުރަމުން އަންނަ މަސައްކަތުގެ މުހިންމު ބައިވެރި އެކެވެ. 

މިފަހަކަށް އައިސް އީރާން އިން ބައިނަލްއަޤުވާމީ މައިދާނުގައި ކުރަމުން އަންނަ މަޝްވަރާ ތަކުގައި ޣަލިބާފް ވަނީ އިސް ދައުރެއް އަދާ ކުރައްވައިފަ އެވެ. ވަކިން ޚާއްސަކޮށް، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން އުފެދިފައިވާ ނުތަނަވަސްކަން ޙައްލު ކުރުމަށް ކުރިއަށް ގެންދާ މަޝްވަރާ ތަކުގައި ޣަލިބާފް ބައިވެރިވެ ވަޑައިގަންނަވަ އެވެ. ޕާކިސްތާން މެދުވެރި ވެގެން ކުރިއަށް ގެންދާ މި މަޝްވަރާ ތަކުގައި އީރާންގެ ފަރާތުން އެންމެ އިސްކޮށް ހުންނަވަނީ ޣަލިބާފް އެވެ. 

ޗައިނާ އަކީ އީރާންއާ ވަރަށް ގާތް ގުޅުމެއް ބާއްވަމުން އަންނަ ޤައުމަކަށްވާއިރު، ޣަލިބާފް ފަދަ މަތީ ފަންތީގެ ބޭފުޅަކު އެ ޤައުމުގެ ޚާއްސަ މަންދޫބަކަށް އައްޔަން ކުރުމަކީ ދެ ޤައުމުގެ ދެ މެދުގައި އޮތް އިސްތިރާތީޖީ ގުޅުން އައު ހަރުފަތަކަށް ގެންދިޔުމަށް ކުރެވޭ މަސައްކަތެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ. 

އީރާންގެ ޤާނޫނު ހަދާ މަޖިލީހުގެ ރައީސްގެ މަގާމުގައި ހުންނަވައިގެން ޣަލިބާފް މި އައު މަސްއޫލިއްޔަތު އަދާ ކުރައްވަން ފެއްޓެވުމާ އެކު، ބައިނަލްއަޤުވާމީ މައިދާނުގައި އީރާންގެ އަޑު އިއްވުމަށާއި، ޚާއްސަކޮށް ހުޅަނގުގެ ޤައުމުތަކާ އެކު އޮތް ނުތަނަވަސްކަން ކުޑަ ކުރުމަށް ޗައިނާ މެދުވެރިކޮށް ކުރާ މަސައްކަތްތައް އިތުރަށް ހަލުވި ވެގެން ދާނެ ކަމަށް ބެލެވެ އެވެ.