އީރާނުގެ ނިއުކްލިއާ ޕްރޮގްރާމް 20 އަހަރަށް މެދުކަނޑާލަން އެއްބަސްވުމުން ފުދޭނެ: ޓްރަމްޕް

އީރާނުގެ ނިއުކްލިއާ ޕްރޮގްރާމް 20 އަހަރު ދުވަހުގެ މުއްދަތަށް މެދުކަނޑާލުމަށް އެ ގައުމުން އެއްބަސްވާނަމަ، އެކަން ގަބޫލުކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. މިއީ އީރާނުގެ ނިއުކްލިއާ މަސައްކަތްތައް މުޅިން ހުއްޓާލުމަށް މީގެ ކުރިން އެމެރިކާއިން ކުރަމުން އައި ޑިމާންޑް ދޫކޮށްލައި، އެމެރިކާގެ ސިޔާސަތަށް އައި ބޮޑު ބަދަލެއްކަން ފާހަގަ ކުރެވެއެވެ.

ޓްރަމްޕް ވިދާޅުވީ އެއީ "ހަގީގީ 20 އަހަރަށް" ވާންޖެހޭނެ ކަމަށެވެ. މީގެ ކުރިން ޓްރަމްޕް ގޮވާލައްވަމުން ގެންދެވީ ނިއުކްލިއާ ހަތިޔާރު އުފެއްދުމުގެ މަރުހަލާއެއް ކަމަށްވާ ޔުރޭނިއަމް މުއްސަނދިކުރުން އީރާނުން ދާއިމީކޮށް ހުއްޓާލުމަށާއި، އެ ގައުމަށް ދުވަހަކުވެސް ނިއުކްލިއާ ހަތިޔާރު ހޯދުމުގެ ފުރުސަތު ނުދިނުމަށެވެ.

ނަމަވެސް، ދެ ގައުމުގެ ދެމެދުގައި ކުރިއަށްދާ މަޝްވަރާތަކުން އެދެވޭ ނަތީޖާއެއް ފެންނަން ނެތުމުން، އީރާނާ މެދު އޮތް ކެތްތެރިކަން ކޮޅުންލަމުންދާ ކަމަށްވެސް ޓްރަމްޕް ވިދާޅުވިއެވެ.

ފެބްރުއަރީ މަހުގެ 28 ވަނަ ދުވަހު އިޒްރޭލާއި އެމެރިކާގެ ސިފައިން ވަނީ އީރާނަށް ވަރުގަދަ ވައިގެ ހަމަލާތަކެއް ދޭން ފަށާފައެވެ. މިދިޔަ މަހުން ފެށިގެން މަޝްވަރާތަކަށް ފުރުސަތު ދިނުމުގެ ގޮތުން ހަމަލާ ބަދަލުކުރުން ހުއްޓާލާފައިވާއިރު، ދެފަރާތުގެ ދެމެދުގައި ބައެއް ކުރިމަތިލުންތައް ހިނގި ނަމަވެސް، އާންމުގޮތެއްގައި ހަމަލާ ބަދަލުކުރުން ހުއްޓާލުމުގެ އެއްބަސްވުމަށް ދަނީ އަމަލުކުރަމުންނެވެ.

މި މައްސަލައިގައި މެދުވެރިއެއްގެ ދައުރު އަދާކުރަމުންދަނީ ޕާކިސްތާނުންނެވެ.

އެހެންނަމަވެސް، ހަނގުރާމަ ހުއްޓާލުމަށް ދެފަރާތުން އެންމެ ފަހުން ހުށަހެޅި ހުށަހެޅުންތަކަށް ދެ ގައުމުންވެސް އިންކާރުކޮށްފައިވާތީ، ދެފަރާތުގެ ދެމެދުގައި އޮތް ހިޔާލުތަފާތުވުންތައް އަދިވެސް ބޮޑުކަމަށް ފެނެއެވެ.

އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި، ތެހެރާނުން ހުށަހެޅި ހުށަހެޅުމުގައި ހުރިހާ ފްރަންޓެއްގައި ކުރާ ހަނގުރާމަ ވަގުތުން ހުއްޓާލުން ހިމެނެއެވެ. މީގެ ތެރޭގައި ލުބުނާނުގައި ހަރަކާތްތެރިވާ އީރާނަށް މަދަދުވެރިވާ ހިޒްބުالله އަށް އިޒްރޭލުން ދޭ ހަމަލާތައް ހުއްޓާލުމާއި، އީރާނުގެ ބަނދަރުތަކަށް އެމެރިކާގެ ކަނޑުގެ ސިފައިން ކުރިމަތިކޮށްފައިވާ ބްލޮކޭޑް ނުވަތަ ބަންދުކުރުންތައް ނިމުމަކަށް ގެނައުމާއި، އަދި އީރާނަށް އިތުރު ހަމަލާއެއް ނުދޭނެކަމުގެ ޔަގީންކަން ދިނުން ހިމެނެއެވެ.

ޗައިނާގެ ރައީސް ޝީ ޖިންޕިންއާ އެކު ބެއިޖިންގައި ބޭއްވި ބައްދަލުވުމަށްފަހު އެއާ ފޯސް ވަންގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނަށް ނިއުކްލިއާ ހަތިޔާރު ހޯދުމުގެ ފުރުސަތު ދީގެން ނުވާނެ ކަމަށާއި، އަދި މިހާރު އީރާނުން ބަންދުކޮށްފައިވާހޮރްމޫޒް ކަނޑުއޮޅި އަލުން ހުޅުވާލަން ޖެހޭނެ ކަމަށް އެމެރިކާ އާއި ޗައިނާއިން އެއްބަސްވެފައިވާ ކަމަށެވެ.

އީރާނުގެ ނިއުކްލިއާ ޕްރޮގްރާމް 20 އަހަރަށް މެދުކަނޑާލުމަކީ ފުދޭވަރުގެ ކަމެއް ނޫން ކަމަށް ނޫސްވެރިއަކު ފާހަގަކުރުމުން ޓްރަމްޕް ވިދާޅުވީ، "20 އަހަރު ފުދޭނެ" ކަމަށާއި، ނަމަވެސް އެމީހުން ދޭ ޔަގީންކަމުގެ މިންވަރު، ނުވަތަ އެއީ ހަގީގީ 20 އަހަރަށް ވާންޖެހޭނެ ކަމަށެވެ. އެހެންނަމަވެސް އެކަމުގެ އިތުރު ތަފްސީލެއް ޓްރަމްޕް ނުދެއްވައެވެ.

އެމެރިކާގެ މީޑިއާތަކުން އޭޕްރީލް މަހު ރިޕޯޓްކޮށްފައިވާ ގޮތުގައި، ޕާކިސްތާނުގެ ވެރިރަށް އިސްލާމްއާބާދުގައި ބޭއްވި މަޝްވަރާތަކެއްގައި، ޔުރޭނިއަމް މުއްސަނދިކުރުން ފަސް އަހަރަށް ހުއްޓާލުމަށް އީރާނުން ހުށަހެޅި ހުށަހެޅުމަކަށް ރައްދު ދެއްވަމުން، އެމެރިކާގެ ނައިބު ރައީސް ޖޭޑީ ވޭންސް ވަނީ އެ މުއްދަތު މަދުވެގެން 20 އަހަރަށް ހަދަން ޖެހޭނެ ކަމަށް ބާރުއަޅުއްވާފައެވެ.

އެހެންނަމަވެސް، މިއީ 20 އަހަރުގެ މުއްދަތެއްގެ ވާހަކަ ޓްރަމްޕް އަމިއްލަފުޅަށް ވިދާޅުވި ފުރަތަމަ ފަހަރު ކަމަށް ބެލެވެއެވެ.

ޓްރަމްޕްގެ ފުރަތަމަ ރިޔާސީ ދައުރުގައި، އޮބާމާގެ ސަރުކާރުން 2015 ވަނަ އަހަރު އީރާނާއެކު ގާއިމުކުރި ނިއުކްލިއާ އެއްބަސްވުމުން އެމެރިކާ ވަނީ ވަކިވެފައެވެ. އެކަމުގެ ސަބަބެއްގެ ގޮތުގައި އޭރު ދެއްކެވި އެއް ސަބަބަކީ، އެ އެއްބަސްވުމުގައި ހިމެނޭ "ސަންސެޓް ކްލޯސަސް" ނުވަތަ ވަކި މުއްދަތަކަށްފަހު އީރާނަށް އަޅާފައިވާ ހުރަސްތައް އުވިގެންދާ މާއްދާތަކަށް ނުރުހުން ވުމެވެ.

ޓްރަމްޕްގެ މި ވާހަކަތަކާ ގުޅިގެން އިޒްރޭލުން އަދި މިހާތަނަށް އެއްވެސް އެއްޗެއް ބުނެފައެއް ނުވެއެވެ. ބޮޑުވަޒީރު ބެންޖަމިން ނަތަންޔާހޫ މީގެ ކުރިން ވިދާޅުވެފައިވަނީ، އީރާނާ ދެކޮޅަށް ކުރާ ހަނގުރާމަ ނިމުނު ކަމަށް ބެލެވޭނީ އެ ގައުމުގައި ހުރި ޔުރޭނިއަމް ނައްތާލުމުން ކަމަށެވެ.

ނަތަންޔާހޫ ވަނީ 2015 ވަނަ އަހަރުގެ ނިއުކްލިއާ އެއްބަސްވުމާ ވަރަށް ބޮޑަށް ދެކޮޅު ހައްދަވާފައެވެ. އޭނާ އެކަމާ ދެކޮޅު ހެއްދެވި އެއް ސަބަބަކީ، އެއްބަސްވުމުގެ މުއްދަތު ހަމަވުމުން އީރާނަށް ނިއުކްލިއާ ހަތިޔާރު ހޯދުމުގެ ފުރުސަތު ހުޅުވިގެން ގޮސް، އިޒްރޭލަށް އޮތް ނުރައްކާ ބޮޑުވެގެންދާނެ ކަމަށް ގަބޫލުކުރެއްވުމެވެ.