ސުލްޙައިގެ މަޝްވަރާ ތަކަށް މަގު ފަހި ކުރުމަށް، ޕާކިސްތާންގެ އިންޓީރިއާ މިނިސްޓަރު އީރާން އަށް

އެމެރިކާ އާއި އީރާންއާ ދެމެދު ކުރިއަށް ގެންދިޔަ ސުލްޙައިގެ މަޝްވަރާތައް މެދު ކެނޑިފައިވާއިރު، މަޝްވަރާތައް އަލުން ފެށުމަށް މަގު ފަހި ކުރުމަށްޓަކައި، ޕާކިސްތާންގެ އިންޓީރިއާ މިނިސްޓަރު މުހުސިން ނަގްވީ އީރާން އަަށް ވަޑައިގެންފި އެވެ. 

ހޮނހިރު ދުވަހު މުހުސިން ނަގްވީ ވަނީ އީރާންގެ ވެރި ރަށް ތެހެރާން އަށް ވަޑައިގެންފަ އެވެ. އީރާންގެ ދައުލަތުގެ މީޑިއާ އިން ރިޕޯޓު ކޮށްފައިވާ ގޮތުގައި، ދެ ދުވަހުގެ ރަސްމީ ދަތުރުފުޅެއްގައި މުހުސިން ނަގްވީ އީރާން އަށް ވަޑައިގެންނެވީ ސަރަހައްދީ ސުލްހަ ޤާއިމު ކުރުމަށް ޕާކިސްތާން އިން ކުރަމުން އަންނަ މަސައްކަތް ތަކުގެ ދަށުންނެވެ. ޕާކިސްތާން އަކީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުަމަށް މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. 

އީރާންގެ ވެރި ރަށް ތެހެރާން އިން މުހުސިން ނަގްވީ އަށް މަރުޙަބާ ދެންނެވީ، އީރާންގެ އިންޓީރިއާ މިނިސްޓަރު އެސްކަންދަރު މޯމެނީ އެވެ. މި ދަތުރުފުޅަކީ ޕާކިސްތާންގެ ނުފޫޒު ގަދަ އސްކަރީ ވެރިޔާ ފީލްޑް މާޝަލް އާސިމް މުނީރު އީރާން އަށް ކުރެއްވި ދަތުރުފުޅަށް ފަހ، ކުޑަ ދުވަސް ކޮޅެއްގެ ތެރޭގައި ކުރެވޭ ދަތުރުފުޅެކެވެ. އަލް އަރަބިއްޔާ ނޫހަށް މައުލޫމާތު ދިން ޕާކިސްތާންގެ މަސްދަރު ތަކުން ބުނާ ގޮތުގައި، މުހުސިން ނަގްވީގެ މި ދަތުރުފުޅުގެ މައިގަނޑު ބޭނުމަކީ ސުލްޙައިގެ ވަކި އޮނި ގަނޑަކަށް އެއްބަސްވުމަކަށް އައުމެވެ. 

އެމެރިކާ އިން ވަނީ، އެ ޤައުމުން ހުށަހަޅާފައިވާ ބައެއް ކަންކަމަށް އީރާން އިން ޖަވާބުދާރީވުމަށް އެދިފަ އެވެ. އަދި ހޮރްމޫޒް ކަނޑުއޮޅިއާ ގުޅޭ ކަންކަމުގައި ކުރިއެރުން ތަކެއް ލިބިފައިވާ ކަމަށާއި، އެމެރިކާ އާއި އީރާންއާ ދެމެދު ވަގުތީ އެއްބަސްވުމަކަށް އައުން ނޫން އެހެން ގޮތެއް މިވަގުތު ނެތް ކަމަށް ވެސް މަސްދަރު ތަކުން ބުނެ އެވެ. ޕާކިސްތާން އިން ދަނީ މި ދެ ޤައުމުގެ ދެ މެދުގައި މެދުވެރިއެއްގެ ދައުރު ވަރަށް ޙަރަކާތްތެރިކޮށް އަދާ ކުރަމުންނެވެ. އެގޮތުން މިދިޔަ މަހު ވެސް ޕާކިސްތާން އިން ވަނީ، ދެ ޤައުމުގެ މަންދޫބުންގެ މެދުގައި މުހިންމު ބައްދަލުވުމެއް ބާއްވައިފަ އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ދިން ހަމަލާތަކާ ގުޅިގެން ފެށުނު ހަނގުރާމަ މެދު ކެނޑިފައި ވަނީ، އޭޕްރީލް މަހުގެ އަށް ވަނަ ދުވަހުން ފެށިގެން ވަގުތީ ސުލްޙައިގެ އެއްބަސްވުމެއް ޤާއިމު ކުރުމުންނެވެ. އީރާާންގެ ފޮރިން މިނިސްޓަރު އައްބާސް އަރާގްޗީ ހުކުރު ދުވަހު ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން މަޝްވަރާތައް ކުރިއަށް ގެންދަން ބޭނުންވާ ކަމުގެ މެސެޖު ތަކެއް ލިބިފައިވާ ކަމަށެވެ. 

ނަމަވެސް، އީރާންގެ ޤާނޫނު ހަދާ މަޖިލީހުގެ ރައީސް އަދި މަޝްވަރާ ތަކުގައި އީރާންގެ ފަރާތުން އިސްކޮށް ޙަރަކާތްތެރިބވާ މުޙައްމަދު ބާގިރު ޣަލިބާފް އަންގާރަ ދުވަހު ވިދާޅުވީ، އީރާން އިން ހުށަހަޅާފައިވާ 14 ނުކުތާގެ ސުލްޙައިގެ ހުށަހެޅުމަށް އެމެރިކާ އިން އެއްބަސްވާން ޖެހޭނެ އެވެ. އީރާންގެ ރައްޔިތުންގެ ހައްގުތައް ހިމެނޭ މި ހުށަހެޅުން ޤަބޫލު ނުކޮށްފި ނަމަ، އެމެރިކާ އަށް ކުރިމަތިލާން ޖެހޭނީ ނާކާމިޔާބީއާ ކަމުގެ އިންޒާރު އޭނާ ވަނީ ދެއްވައިފަ އެވެ. މީގެ ކުރިން ޓްރަމްޕް ވަނީ އީރާން އިން ހުށަހެޅި ބައެއް ކަންކަމަށް އިންކާރު ކުރައްވައި، މިހާރު އޮތް ސުލްޙައިގެ އެއްބަސްވުން ނާޒުކު ފައްތަރަކަށް އައިސްފައިވާ ކަމަށް ވިދާޅުވެފަ އެވެ.