އޮސަސޫނާ ބަލިކޮށް، ބާސެލޯނާ އިން ލީގު ޗެމްޕިއަންކަން ހޯދުމާ ގާތަށް ޖެހިލައިފި

ސްޕެނިޝް ލީގުގައި އޮސަސޫނާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން ލީގު ޗެމްޕިއަންކަން ދިފާއު ކުރުމާ ގާތަށް ޖެހިލައިފި އެވެ.

އޮސަސޫނާގެ އަމިއްލަ ދަނޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗު ބާސެލޯނާ އިން ކާމިޔާބު ކުރީ 2-1 އިންނެވެ. މެޗުގައި ބާސެލޯނާ އިން އެ ޓީމުގެ ދެ ލަނޑު ވެސް ދެ ވަނަ ހާފުގައި ޖެހިއިރު، އޮސަސޫނާ އިން ވެސް ވަނީ ލަނޑެއް ޖަހައިފަ އެވެ. 

މެޗުގެ ފުރަތަމަ ހާފުގައި ވެސް ބާސެލޯނާ އިން ވަނީ ރަނގަޅަށް ކުޅެ، ލަނޑު ޖަހަން މަސައްކަތް ކޮށްފަ އެވެ. ނަމަވެސް، އެ ޓީމަށް ލިބުނު އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ. ފުރަތަމަ ހާފުގައި ބާސެލޯނާގެ ރޮބާޓް ލެވަންޑޯސްކީ އާއި ފާމިން ލޮޕޭޒް އަށް ވެސް ލަނޑު ޖަހަން ފުރުސަތު ލިބުނެވެ.

މެޗުގެ ފަހު ދިހަ މިނެޓުގެ ތެރޭގައި ބާސެލޯނާ އަށް ލީޑު ނަގައިދިނީ ލެވަންޑޯސްކީ އެވެ. އެއީ މާކަސް ރަޝްފޯޑު ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަަސް މިނެޓު ފަހުން ފެރާން ޓޮރޭސް ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން ޓޮރޭސް އަށް ފުރުސަތު ތަނަވަސްކޮށްދިނީ ލޮޕޭޒް އެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، އޮސަސޫނާގެ ހަމައެކަނި ލަނޑު ޖެހީ ރައުލް ގާސިއާ އެވެ.

މެޗުން މޮޅުވެ ބާސެލޯނާ އެއް ވަަނައިގައި އޮތީ، 34 މެޗުން 88 ޕޮއިންޓާ އެކު އެވެ. ދެ ވަނައިގައި ރެއާލް މެޑްރިޑް އޮތީ 33 މެޗުން 74 ޕޮއިންޓާ އެކު އެވެ. ލީގުގައި އާދީއްތަ ދުވަހުގެ ރޭ އެސްޕަންޔޯލްގެ ދަނޑުގައި ކުޅޭ މެޗުން ރެއާލް މޮޅު ނުވެއްޖެ ނަމަ، ބާސެލޯނާ އަށް ލީގު ޗެމްޕިއަންކަން ލިބޭނެ އެވެ. ރެއާލް މޮޅުވެއްޖެ ނަމަ، އަންނަ އާދީއްތަ ދުވަހުގެ ރޭ ރެއާލްއާ ދެކޮޅަށް ކުޅޭ މެޗުން ބަލި ނުވެ ބާސެލޯނާ އަށް ލީގު ޗެމްޕިއަންކަން ލިބޭނެ އެވެ. 

ބާސެލޯނާ އިން ވަނީ މިހާތަނަށް 29 ފަހަރެއްގެ މަތިން ސްޕެނިޝް ލީގު ކާމިޔާބު ކޮށްފަ އެވެ. ރެއާލް އިން 36 ފަހަރެއްގެ މަތިން ސްޕެނިޝް ލީގު ކާމިޔާބު ކޮށްފައިވާއިރު، ރެއާލް އަކީ އެންމެ ގިނައިން ސްޕެނިޝް ލީގު ކާމިޔާބު ކޮށްފައިވާ ޓީމެވެ.