ބޮޑު ވަޒީރު ސްޓާމާގެ މުސްތަޤުބަލާ މެދު ނިންމަވަން ޖެހޭނީ އަމިއްލަ ނިންމުމެއް: މިނިސްޓަރު ނޭންޑީ

އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީގެ ލީޑާޝިޕް ކާމިޔާބު ކުރުމަށް ކުރިމަތި ލައްވާނެތޯ ނިންމަވާނީ ބޮޑު ވަޒީރު ކިއާ ސްޓާމާ އަމިއްލަފުޅަށް ކަމަށް އެ ޤައުމުގެ ކަލްޗަރ ސެކްރެޓަރީ ލީސާ ނޭންޑީ ވިދާޅުވެއްޖެ އެވެ.

ބީބީސީގެ "ސަންޑޭ ވިތު ލޯރާ ކޫންސްބާގް" ޕްރޮގްރާމްގައި ވާހަކަ ދައްކަވަމުން ނޭންޑީ ވިދާޅުވީ، ބޮޑު ވަޒީރު ސްޓާމާ އަކީ ގޮންޖެހުންތަކާ ކުރިމަތި ލައްވަން ކެރި ވަޑައިގަންނަވާ ބޭފުޅެއްކަން މީގެ ކުރިން ވެސް ސާބިތު ކޮށްދެއްވާފައިވާ ކަމަށެވެ. އެހެންކަމުން ބޮޑު ވަޒީރުގެ ސިޔާސީ މުސްތަޤުބަލާ މެދު އުންމީދު ކަނޑާ ނުލައްވާ ކަމަށް ވެސް އޭނާ ވިދާޅުވި އެވެ. 

ލޭބާ ޕާޓީގެ 90 އަށް ވުރެ ގިނަ މެމްބަރުން ވަނީ ބޮޑު ވަޒީރު ސްޓާމާ އިސްތިއުފާ ދެއްވުމަށް ގޮވާލައްވައިފަ އެވެ. އަނެއްކޮޅުން، ސަރުކާރުގެ ފަސް މިނިސްޓަރަކު ވެސް ވަނީ މަގާމުން އިސްތިއުފާ ދެއްވައިފަ އެވެ. ނަމަވެސް ބޮޑު ވަޒީރު ސްޓާމާ ވަނީ މަގާމުން އިސްތިއުފާ ނުދެއްވާނެ ކަމަށް ތަކުރާރުކޮށް ވިދާޅުވި އެވެ. 

ނޭންޑީ ވިދާޅުވީ ލޭބާ ޕާޓީގެ ލީޑާޝިޕް އިންތިޚާބެއް ބާއްވައިފި ނަމަ، އެ އިންތިޚާބުގައި ވާދަ ކުރައްވާނެ ކަމަށް ބޮޑު ވަޒީރު ވިދާޅުވެފައިވާ ކަމަށެވެ. ނޭންޑީ ފާހަގަ ކުރެއްވި ގޮތުގައި ސްޓާމާ އަކީ 2024 ވަނަ އަހަރުގެ އާންމު އިންތިޚާބުގައި ލޭބާ ޕާޓީ އަށް ބޮޑު ކާމިޔާބީއެއް ހޯއްދަވައި ދެއްވި ބޭފުޅާ އެވެ. 

މި ދަނޑިވަޅުގައި ގްރޭޓަރ މެންޗެސްޓަރގެ މޭޔަރު އެންޑީ ބާންހަމް އަލުން ޤާނޫނު ހަދާ މަޖިލީހަށް ވަޑައިގެންނެވުމަށް މަސައްކަތްް ކުރައްވާއިރު، ނޭންޑީ ވަނީ އެކަމަށް ވެސް ތާއީދު ކުރައްވައިފަ އެވެ. ބާންހަމް އަންނަނީ މޭކަރފީލްޑް ބައި އިލެކްޝަންގައި ވާދަ ކުރުމަށް ތައްޔާރު ވަމުންނެވެ. އޭނާ މި ގޮނޑި ކާމިޔާބު ކުރައްވައިފި ނަމަ، ޕާޓީގެ ލީޑާޝިޕް އަށް ވާދަ ކުރައްވާނެ ކަމަށް ބެލެވެ އެވެ. މީގެ އިތުުރުން މިދިޔަ ހަފުތާާގެ ތެރޭގައި ހެލްތު ސެކްރެޓަރީގެ މަގާމުން އިސްތިއުފާ ދެއްވި ވެސް ސްޓްރީޓިން ވަނީ، ލޭބާ ޕާޓީގެ ލީޑާޝިޕް އަށް ވާދަ ކުރައްވާނެކަން އިއުލާން ކުރައްވައިފަ އެވެ. 

އެންމެ ފަހުން އޮތް އިންތިޚާބުގައި ލޭބާ ޕާޓީ އަށް ލިބުނު ދަށް ނަތީޖާއާ ގުޅޭ ގޮތުން ނޭންޑީ ވިދާޅުވީ، ރައްޔިތުން ބޭނުން ވަނީ ޕާޓީ އިން މިހާރަށް ވުރެ ބޮޑަށް ވަކާލާތުކޮށް، މަސައްކަތް ވަރުގަދަ ކުރުމަށް ކަމަށެވެ. މޭކަރފީލްޑް ދާއިރާާ އަކީ 2024 ވަނަ އަހަރުގެ އިންތިޚާބުގައި ލޭބ ާ ޕާޓީ އިން 5339 ވޯޓުގެ އަޣުލަބިއްޔަތުން ކާމިޔާބު ކުރި ދާއިރާ އަކަށް ވީ ނަމަވެސް، އެ ސަރަހައްދުގައި ރިފޯމް ޔޫކޭގެ ތާއީދު މިހާރު ވަރަށް ބޮޑަށް އިތުރުވެފައިވެ އެވެ. ބައެއް މެމްބަރުން ސިފަ ކުރާ ގޮތުގައި މޭކަރފީލްޑް ބައި އިލެންޝަން އަކީ ލޭބާ ޕާޓީގެ މުސްތަޤުބަލާ ގުޅިފައިވާ މުހިންމު އިންތިޚާބަކަށް ވާނެ އެވެ. 

މީގެ އިތުރުން އިނގިރޭސިވިލާތް އަލުން ޔޫރަޕިއަން ޔޫނިއަން (އީޔޫ)އާ ގުޅުމުގެ މައުޟޫއަކީ ވެސް މިހާރު ލޭބާ ޕާޓީގެ ތެރޭގައި ބޮޑު ބަހުސް އަކަަށް ވެފައިވާ މައްސަލަ އެކެވެ. ސްޓްރީޓިން ވިދާޅުވި ގޮތުގައި، އީޔޫ އިން ވަކިވުމަކީ ހެދުނު ބޮޑު ގޯހެކެވެ. ނަމަވެސް ނޭންޑީ ވިދާޅުވީ، ރައްޔިތުންގެ ދިރިއުޅުމުގެ ފެންވަރު ދަށްވުމާއި، އިޤްތިޞާދީ މައްސަލަ ތަކަކީ ހަމައެކަނި އީޔޫއާ ގުޅިފައިވާ ކަންކަން ނޫން ކަމަށާއި، އެއީ ސަރުކާރު ތަކުން ސިނާއީ ދާއިރާ ތަކަށް ދޭން ޖެހޭ ސަމާލުކަން ނުދިނުމުގެ ނަތީޖާ ކަމަށެވެ. 

އިދިކޮޅު ކޮންޒަވޭޓިވް ޕާޓީގެ ލީޑަރު ކެމީ ބޭޑެނޮކް ވިދާޅުވީ، ލޭބާ ޕާޓީގެ ލީޑަރަކަށް ހުންނެވީ ކޮން ބޭފުޅެއްތޯ މުހިންމު ނޫން ކަމަށާއި، އަސްލު މައްސަލަ އަކީ މުޅި ލޭބާ ޕާޓީ ކަމަށެވެ.