ސްޓްރީޓިން އިސްތިއުފާ ދެއްވުމާ އެކު، ހެލްތު ސެކްރެޓަރީ އަށް މުރޭ އައްޔަން ކުރައްވައިފި

އިނގިރޭސިވިލާތުގެ ހެލްތު ސެކްރެޓަރީ ވެސް ސްޓްރީޓިން މަގާމުން އިސްތިއުފާ ދެއްވުމާ އެކު، އެ މަގާމަށް ޖޭމްސް މުރޭ އައްޔަން ކުރައްވައިފި އެވެ. 

ހެލްތު ސެކްރެޓަރީގެ މަގާމުން މުރޭ އިސްތިއުފާ ދެއްވާފައި ވަނީ، ބޮޑު ވަޒީރު ކިއާ ސްޓާމާގެ ލީޑާޝިޕާ މެދު ސުވާލު ތަކެއް އުފެދިފައި ވަނިކޮށެވެ. އަދި ސްޓާާމާއާ ދެކޮޅަށް، ލޭބާ ޕާޓީގެ ލީޑާޝިޕް އަށް ސްޓްރީޓިން ވާދަ ކުރައްވާނެ ކަމުގެ އަޑުތައް ވެސް ފެތުރިފައި ވަނިކޮށެެވެ. 

ހެލްތު ސެކްރެޓަރީގެ މަގާމަށް އައްޔަން ކުރެއްވި މުރޭ އަކީ، 2019 ވަނަ އަހަރުން ފެށިގެން ޤާނޫނު ހަދާ މަޖިލީހުގައި އީލިން ނޯތު ތަމްސީލު ކުރަމުން އަންނަ މެމްބަރެވެ. ހެލްތު ސެކްރެޓަރީގެ މަގާމަށް އައްޔަން ކުރެއްވުމުގެ ކުރިން ވެސް، މުރޭ ވަނީ ސަރުކާރުގެ މުހިންމު މަގާމުތައް އަދާ ކުރައްވައިފަ އެވެ. 

މީގެ ކުރިން މުރޭ ވަނީ 2025 ވަނަ އަހަރުގެ ސެޕްޓެމްބަރު މަހުގެ ފުރަތަމަ ދުވަހުން ފެށިގެން، 2026 ވަނަ އަހަރުގެ މެއި މަހުގެ 14 ވަަނަ ދުވަހުގެ ނިޔަލަށް ޓްރެޒަރީ ޗީފް ސެކްރެޓަރީގެ ގޮތުގައި ހުންނަވައިފަ އެވެ. އޭގެ ކުރިން އެކްސްޗެކާ ސެކްރެޓަރީ ޓު ދަ ޓްރެޒަރީގެ މަގާމުގައި ވެސް އޭނާ ހުންނެވި އެވެ. 

މުރޭ އަކީ ލޭބާ އަދި ކޯއޮޕަރޭޓިވް ޕާޓީގެ މެމްބަރެކެވެ. އޭނާ ވަނީ 2016 ވަނަ އަހަރުން ފެށިގެން، 2019 ވަނަ އަހަރުގެ ނިޔަލަށް ލަންޑަންގެ ޑެޕިއުޓީ މޭޔަރުގެ މަގާމު ވެސް އަދާ ކުރައްވައިފަ އެވެ. އެ މަގާމުގައި ހުންނެވިއިރު އޭނާ ވަނީ، ހައުސިން އަދި ރެޒިޑެންޝަލް ޑިވެލޮޕްމަންޓްގެ މަސައްކަތްތައް ބައްލަވައިފަ އެވެ. 

ޑެޕިއުޓީ މޭޔަރުގެ މަގާމަށް ހަމަޖެއްސެވުމުގެ ކުރިން މުރޭ ވަނީ ދިހަ އަހަރު ވަންދެން ކައުންސިލަރެއްގެ ގޮތުގައި މަސައްކަތް ކުރައްވައިފަ އެވެ. 2010 ވަނަ އަހަރުން ފެށިގެން 2016 ވަނަ އަހަރުގެ ނިޔަަލަށް އޭނާ ވަނީ ހައުސިން އެންޑް ޑިވެލޮޕްމަންޓްގެ އެގްޒެކެޓިވް މެމްބަރުގެ ގޮތުގައި ހަ އަހަރު ވަންދެން މަސައްކަތް ކުރައްވައިފަ އެވެ.