އެތެރޭގެ ޕްރެޝަރު ބޮޑުވެ، ބޮޑު ވަޒީރު ސްޓާމާ އާއި ހެލްތު ސެކްރެޓަރީ ބައްދަލު ކުރައްވަނީ

އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީގެ ތެރޭގައި އުފެދިފައިވާ ބޮޑު ޚިޔާލު ތަފާތުވުންތަކާ އެކު، ބޮޑު ވަޒީރު ކަމުން ކިއާ ސްޓާމާ ދުރު ކުރުމުގެ މަސައްކަތް އެ ޕާޓީގެ މެމްބަރުން ފަށާފައި ވަނިކޮށް، ހެލްތު ސެކްރެޓަރީ ވެސް ސްޓްރީޓިންއާ ބައްދަލު ކުރައްވަން ބޮޑު ވަޒީރު ނިންމަވައިފި އެވެ. 

ހެލްތު ސެކްރެޓަރީ ސްޓްރީޓިން އަކީ، ސްޓާމާއާ ދެކޮޅަށް ލޭބާ ޕާޓީގެ ލީޑަރުގެ މަގާމަށް ވާދަ ކުރައްވާނެ ކަމަށް ބެލެވޭ އެއް ބޭފުޅާ އެވެ. މި ބައްދަލުވުން ބާއްވަން ބޮޑު ވަޒީރު ނިންމަވާފައިވާއިރު، ސަރުކާރުގައި ހިމެނޭ ހަތަރު މިނިސްޓަރަކު ވެސް ވަނީ އިސްތިއުފާ ދެއްވައިފަ އެވެ.

މަގާމުން އިސްތިއުފާ ދެއްވި ބޭފުޅުންގެ ތެރޭގައި ސޭފްގާޑިން މިނިސްޓަރު ޖެސް ފިލިޕްސް އާއި، ސްޓްރީޓިންއާ ގާތް ގުޅުމެއް އޮންނަ ޒުބައިރު އަޙުމަދު ވެސް ހިމެނިވަޑައިގަންނަވަ އެވެ. 

މީގެ އިތުރުން ލޭބާ ޕާޓީގެ ޤާނޫނު ހަދާ މަޖިލީހުގެ މެމްބަރުންގެ ތެރެއިން، 80 އަށް ވުރެ ގިނަ މެމްބަރުން ވަނީ ބޮޑު ވަޒީރު ކަމުން ސްޓާމާ އިސްތިއުފާ ދެއްވުމަށް ގޮވާލައްވައިފަ އެވެ. ނަމަވެސް، ބޮޑު ވަޒީރުގެ ދިފާއުގައި ކެބިނެޓުގެ މިނިސްޓަރުންނާއި، ޤާނޫނު ހަދާ މަޖިލީހުގެ 100 އަށް ވުރެ ގިނަ މެމްބަރުން ވަނީ ތެދުވެފަ އެވެ. މި މެމްބަރުން ބުނެފައި ވަނީ، މިވަގުތު ލީޑާޝިޕްގެ ބަދަލު ކުރުމުގެ އިންތިޚާބަކަށް ދިޔުމަކީ ރަނގަޅު ގޮތެއް ނޫން ކަމަށެވެ. 

ބޮޑު ވަޒީރު ސްޓާމާ އާއި ސްޓްރީޓިން ބައްދަލު ކުރައްވަނީ އިނގިރޭސިވިލާތުގެ ޤާނޫނު ހަދާ މަޖިލީހުގެ އައު ދައުރު ފެށުމުގެ ގޮތުން ރަސްގެފާނު އިއްވަވާ ތަޤުރީރަށް ތައްޔާރު ވަމުން އަންނަ ވަގުތެއްގަ އެވެ. ލޭބާ ޕާޓީގެ ޤަވާއިދު ބުނެފައިވާ ގޮތުން އެ ޕާޓީގެ ލީޑަރަކު މަގާމުން ދުރު ކުރެވޭނީ އެ ބޭފުޅަކު އަމިއްލަ އަށް އިސްތިއުފާ ދެއްވުމުންނެވެ. ނުވަތަ ޕާޓީގެ މެމްބަރުންގެ 20 އިންސައްތަ މެމްބަރުން ސޮއިކޮށް އިތުބާރު ނެތް ކަމަށް ހުށަހެޅުމުންނެވެ. އެއީ 81 މެމްބަރުންނެވެ. 

މަގާމުން އިސްތިއުފާ ދެއްވި ޖެސް ފިލިޕްސް ފޮނުއްވި ސިޓީގައި ވިދާޅުވީ، ސްޓާމާާ އަކީ ރަނގަޅު ބޭފުޅެއް ނަމަވެސް ޤައުމަށް ބޭނުންވާ ބަދަލުތައް ގެނައުމަށް އެކަން އެކަނި ނުފުދޭ ކަމަށެވެ. އަދި ބަހުސް ތަކުން އެއްކިބާވުމަށް ބޮޑު ވަޒީރު ގެންގުޅުއްވާ ސިޔާސަތުގެ ސަބަބުން، ޤައުމުގެ ކުރިއެރުމަށް ހުރަސް އެޅޭ ކަމަށް އޭނާ ފާހަގަ ކުރެއްވި އެވެ. ފިލިޕްސްގެ އިތުުން، މިއާޓާ ފާންބުލޭ، އެލެކްސް ޑޭވިސް ޖޯންސް އަދި ޒުބައިރު އަޙުމަދު ވެސް ވަނީ ސްޓާމާ އަށް އޮތް އިތުބާާރު ގެއްލިފައިވާ ކަަމަށް ވިދާޅުވެ، އިސްތިއުފާ ދެއްވައިފަ އެވެ. 

އިނގިރޭސިވިލާތުގެ ބޮޑު ވަޒީރު ސްޓާމާ އަށް ޕްރެޝަރު ބޮޑުވެފައި މި ވަނީ، މިދިޔަ ހަފުތާގައި ބޭއްވި އިންތިޚާބުގައި ލޭބާ ޕާާޓީ އަށް ލިބުނު ދަށް ނަތީޖާގެ ސަބަބުންނެވެ.