ވާދަވެރިންނަށް ބޮޑު ވަޒީރު ސްޓާމާގެ ވަރުގަދަ އިންޒާރެއް!

އިނގިރޭސިވިލާތުގެ ބޮޑު ވަޒީރު އަދި ލޭބާ ޕާޓީގެ ލީޑަރު ކިއާ ސްޓާމާގެ މުސްތަޤުބަލާ މެދު ސުވާލު ތަކެއް އުފެދިފައި ވަނިކޮށް، ވާދަވެރި ފަރާތް ތަކަށް ބޮޑު ވަޒީރު ވަރުގަދަ އިންޒާރެއް ދެއްވައިފި އެވެ. 

ބުދަ ދުވަހު ބޮޑު ވަޒީރު ސްޓާމާ ވިދާޅުވެފައި ވަނީ، ލޭބާ ޕާޓީގެ ލީޑާޝިޕްގެ ވާދަވެރި ކަމެއް މިވަގުތު ފެށިއްޖެ ނަމަ، ބޮޑު ކަންތައް ގަނޑެއް ކުރިމަތި ވާނެ ކަމަށެވެ. ބޮޑު ވަޒީރު ސްޓާމާ މިހެން ވިދާޅުވެފައިވާއިރު، އޭނާގެ ސަރުކާރުގައި ހިމެނޭ ހެލްތު ސެކްރެޓަރީ ވެސް ސްޓްރީޓިން، ލޭބާ ޕާޓީގެ ލީޑާޝިޕް އަށް ނިކުންނަވާނެ ކަމުގެ އަޑު ތަކެއް ވަނީ ފެތުރިފަ އެވެ. 

މިދިޔަ ހަފުތާގައި އިނގިރޭސިވިލާތުގެ ލޯކަލް އިންތިޚާބު ތަކާއި، ސްކޮޓްލޭންޑް އަދި ވޭލްސްގެ އިންތިޚާބު ތަކުގައި ބޮޑު ނާކާމިޔާބެއް ކުރިމަތިވެފައިވާއިރު، ބޮޑު ވަޒީރު ސްޓާމާގެ ސަރުކާރުން ހަތަރު މިނިސްޓަރަކު ވަނީ އިސްތިއުފާ ދެއްވައިފަ އެވެ. އަނެއްކޮޅުން، ލޭބާ ޕާޓީގެ ގިނަ މެމްބަރުން ތަކެއް އަންނަނީ ބޮޑު ވަޒީރު ސްޓާމާގެ އިސްތިއުފާ އަށް ވެސް ގޮވާލަމުންނެވެ. 

ސްޓްރީޓިން އަށް ތާއީދު ކުރާ ފަރާތް ތަކުން ބުނެފައި ވަނީ، ބޮޑު ވަޒީރު ސްޓާމާއާ ދެކޮޅަށް ވާދަ ކުރައްވާނެ ކަމަށް އިއުލާން ކުރެއްވުމުގެ ފުރުސަތު ވަރަށް ބޮޑެވެ. ލޭބާ ޕާޓީގެ ޤަވާއިދުގައި ބުނެފައިވާ ގޮތުން، ލީޑާޝިޕްގެ ވާދަވެރި ކަމެއް ފެށުމަށް 81 މެމްބަރުންގެ ތާއީދު ބޭނުން ވާނެ އެވެ. ބައެއް ފަރާތް ތަކުން ބުނެފައި ވަނީ، ކުރިއަށް އޮތް ވަގުތު ތަކުގެ ތެރޭގައި ސްޓްރީޓިން އެކަން އިއުލާން ކުރައްވާނެ އެވެ. 

ނުތަނަވަސްކަން ބޮޑުވެފައި ވަނިކޮށް، ބުދަ ދުވަހު ސްޓްރީޓިން ވަނީ ބޮޑު ވަޒީރު ސްޓާމާއާ ބައްދަލު ކުރައްވައިފަ އެވެ. ބޮޑު ވަޒީރުގެ ރަސްމީ އޮފީސް، ޑައުނިން ސްޓްރީޓްގައި ކުރިއަށް ދިޔަ އެ ބައްދަލުވުމަށް ހޭދަވެފައި ވަނީ އެންމެ 19 މިނެޓެވެ. ނަމަވެސް، އެ ބައްދަލުވުމާ ގުޅޭ އިތުރު ތަފްސީލެއް ހާމަ ކޮށްފައި ނުވެ އެވެ. 

ބޮޑު ވަޒީރުގެ ތަރުޖަމާނު ވިދާޅުވީ، ބޮޑު ވަޒީރުގެ ފުރިހަމަ އިތުބާރު ސްޓްރީޓިން އަށް އެބަ އޮތް ކަމަށެވެ. ނަމަވެސް، ބޮޑު ވަޒީރު ސްޓާމާ އާއި، ސްޓްރީޓިންގެ ބައްްދަލުވުމާ ގުޅޭ އިތުރު ތަފްސީލެއްގެ ކޮމެންޓު ދެއްވަން ބޭނުން ނުވާ ކަމަށް ވެސް އޭނާ ވަނީ ވިދާޅުވެފަ އެވެ. 

ބުދަ ދުވަހު ލޭބާ ޕާޓީގެ ޤާނޫނު ހަދާ މަޖިލީހުގެ މެމްބަރުންނާއި، މިނިސްޓަރުންނާ ބައްދަލު ކުރައްވައި ބޮޑު ވަޒީރު ސްޓާާމާ ވިދާޅުވީ، ލީޑާޝިޕްގެ ވާދަވެރި ކަމެއް ފެށި، ލޭބާ ޕާޓީ ބޮޑު ކާރިސާއެއްގެ ތެރެއަށް ވައްޓާލަން ދޫކޮށްލެވެން ނެތް ކަަމަށެވެ. ބޮޑު ވަޒީރު ވިދާޅުވީ، މިވަގުތު ވާދަވެރި ކަމެއް ފެށިއްޖެ ނަމަ، 100 އިންސައްތަ އެހެން ކަންތައް ވާނެ އެވެ. 

ބޮޑު ވަޒީރުގެ މުސްތަޤުބަލާ މެދު ގިނަ ސުވާލު ތަކެއް އުފެދިފައި ވަނިކޮށް، ބުދަ ދުވަހު ބޮޑު ވަޒީރު ވަނީ ސްޓޭޓް މިނިސްޓަރުންނާ ވަކިން ބައްދަލު ކުރައްވައިފަ އެވެ. އަދި ދަށު ދަރަޖައިގެ މިނިސްޓަރުންނާ ވެސް ވަކިން ބައްދަލު ކުރައްވާފައިވާ ކަމަށް ވަނީ ރިޕޯޓު ކޮށްފަ އެވެ. އެ ބައްދަލުވުންތައް ދެމިގެން ގޮސްފައި ވަނީ 15 މިނެޓުގެ ވަގުތު ކޮޅަކަށެވެ.