ސްޓާމާ އޭނާގެ ވާދަވެރި ސްޓްރީޓިންއާ ބައްދަލު ކުރައްވައިފި، ހޭދަވީ އެންމެ 19 މިނެޓު
ސްޓާމާ އާއި ސްޓްރީޓިންގެ ބައްދަލުވުން ދެމިގެން ދިޔައީ އެންމެ 19 މިނެޓަށް. ސިޔާސީ ދާއިރާާގެ ތަޖުރިބާކާރުން ބުނާ ގޮތުގައި، އެންމެ މިނެޓަކީ މިފަދަ މުހިންމު ބައްދަލުވުމަކަށް ބަލާއިރު ވަރަށް މަދު ވަގުތު ކޮޅެއް ކަމަށް.
ބޮޑު ވަޒީރު ސްޓާމާއާ ބައްދަލު ކުރެއްވުމަށް ފަހު، ވެސް ސްޓްރީޓިން ޑައުނިން ސްޓްރީޓް އިން ނިކުމެ ވަޑައިގަންނަވަނީ. | ގެޓީ އިމޭޖަސް
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އާއި، ސަރުކާރުގެ ހެލްތު ސެކްރެޓަރީ ވެސް ސްޓްރީޓިން ބައްދަލު ކުރައްވައިފި އެވެ.
ވެރިކަން ކުރާ ލޭބާ ޕާޓީގެ އެތެރޭގައި އިންތިހާ އަށް ނުތަނަވަސްކަން ބޮޑުވެފައިވާއިރު، ސްޓާމާ އާއި ސްޓްރީޓިން ބައްދަލު ކުރެއްވީ ބުދަ ދުވަހު އެވެ. މި ބައްދަލުވުން ބާއްވާފައި ވަނީ، ބޮޑު ވަޒީރުގެ ރަސްމީ އޮފީސް ޑައުނިން ސްޓްރީޓްގަ އެވެ.
ސްޓްރީޓިންއާ ބައްދަލު ކުރައްވަން ބޮޑު ވަޒީރު ސްޓާމާ ބޭނުންފުޅުވި އެންމެ ބޮޑު އެއް ސަބަބަކީ، ލޭބާ ޕާޓީގެ މެމްބަރުން ބޮޑު ވަޒީރުގެ އިސްތިއުފާ އަށް ގޮވާލަމުން އައުމެވެ. އަނެއްކޮޅުން، ސްޓްރީޓިން އަކީ ސްޓާމާއާ ދެކޮޅަށް، ލޭބާ ޕާޓީގެ ލީޑަރު ކަމަށް ވާދަ ކުރައްވާނެ ކަމަށް އެންމެ ބޮޑަށް ބެލެވޭ އެއް ބޭފުޅާ އެވެ.
ބައްދަލުވުމަށް ވަޑައިގެންނެވިތާ މާ ގިނައިރު ތަކެއް ނުވެ ސްޓްރީޓިން ވަނީ، ބޮޑު ވަޒީރުގެ އޮފީހުން ނިކުންނަވައިފަ އެވެ. ސްޓާމާ އާއި ސްޓްރީޓިންގެ ބައްދަލުވުން ދެމިގެން ދިޔައީ އެންމެ 19 މިނެޓަށެވެ. ސިޔާސީ ދާއިރާާގެ ތަޖުރިބާކާރުން ބުނާ ގޮތުގައި، އެންމެ މިނެޓަކީ މިފަދަ މުހިންމު ބައްދަލުވުމަކަށް ބަލާއިރު ވަރަށް މަދު ވަގުތު ކޮޅެއް ކަމަށެވެ.
ސްޓާމާ އާއި ސްޓްރީޓިންގެ މި ބައްދަލުވުމާ ގުޅޭ ގޮތުން މިހާތަނަށް އިތުރު ތަފްސީލެއް ހާމަ ކޮށްފައި ނުވެ އެވެ. ބޮޑު ވަޒީރުގެ އޮފީހުން ނިކުމެ ވަޑައިގެން، ސްޓްރީޓިން މީޑިއާ ތަކާ ވެސް ވާހަކަ ދައްކަވާފައި ނުވެ އެވެ. ނަމަވެސް ކުޑަ ވަގުތު ކޮޅެއްގެ ބައްދަލުވުމަކަށް ފަހު އޭނާ އެނބުރި ވަޑައިގެންފައިވާއިރު، ލޭބާ ޕާޓީގެ އެތެރޭގައި އޮތް ނުތަނަވަސްކަން ބޮޑުވުމުގެ ފުރުސަތު އެބަ އޮތެވެ.
މަސްދަރު: ބީބީސީ
