ސްޓާމާއާ ދެކޮޅަށް ވާދަ ކުރައްވާނެކަން، ސަރުކާރުން އިސްތިއުފާ ދެއްވި ސްޓްރީޓިން އިއުލާން ކުރައްވައިފި
އިނގިރޭސިވިލާތުގެ ލަންޑަންގައި ކުރިއަށް ދިޔަ ޙަރަކާތެއްގައި ވާހަކަ ދައްކަވަމުން ސްޓްރީޓިން ވިދާޅުވީ، އެންމެ ރަނގަޅު ކެންޑިޑޭޓުން ބައިވެރިވާ އިންތިޚާބެއް ބޭނުންވާ ކަމަށާއި، އެފަދަ އިންތިޚާބެއްގައި އޭނާ ވެސް ވާދަ ކުރައްވާނެ ކަމަށް.
އިނގިރޭސިވިލާތުގައި އޮތް ޙަރަކާތެއްގައި ބައިވެރިވެ ވަޑައިގެން، ސްޓްރީޓިން ވާހަކަ ދައްކަވަނީ. ސަރުކާރުގެ ހެލްތު ސެކްރެޓަރީގެ މަގާމުން އޭނާ އިސްތިއުފާ ދެއްވީ ބުރާސްފަތި ދުވަހު. | ގެޓީ އިމޭޖަސް
އިނގިރޭސިވިލާތުގައި ވެރިކަން ކުރާ ލޭބާ ޕާޓީގެ ލީޑަރުގެ މަގާމަށް ވާދަ ކުރައްވާނެކަން، ކުރީގެ ހެލްތު ސެކްރެޓަރީ ސްޓްރީޓިން ވެސް އިއުލާން ކުރައްވައިފި އެވެ.
އިނގިރޭސިވިލާތުގެ ލޯކަލް ކައުންސިލް ތަކުގެ އިންތިޚާބުގައި ލޭބާ ޕާޓީ އަށް ލިބުނު ނާކާމިޔާބާ ގުޅިގެން ބޮޑު ވަޒީރު ސްޓާމާ އަށް އަންނަނީ ފާޑު ކިޔުން އަމާޒުވަމުންނެވެ. އެ ނުތަނަވަސްކަމުގެ ތެރޭގައި، ސްޓާމާގެ ސަރުކާރުގެ ހެލްތު މިނިސްޓަރުގެ މަގާމުގައި ހުންނެވި ސްޓްރީޓިން ވަނީ މަގާމުން އިސްތިއުފާ ދެއްވައިފަ އެވެ. އޭނާގެ އިތުރުން، ހަތަރު މިނިސްޓަރަކު ވެސް މަގާމުން އިސްތިއުފާ ދެއްވި އެވެ.
ބޮޑު ވަޒީރު ސްޓާމާ އަށް އިތުބާރު ގެއްލިފައިވާ ކަމަށް ވިދާޅުވެ، ހެލްތު ސެކްރެޓަރީ ސްޓްރީޓިން އިސްތިއުފާ ދެއްވައިފި
މަގާމުން އިސްތިއުފާ ދެއްވިތާ އެއް ދުވަސް ފަހުން ސްޓްރީޓިން ވަނީ، ބޮޑު ވަޒީރު ސްޓާމާއާ ދެކޮޅަށް އޭނާ ނިކުންނަވާނެކަން ރަސްމީކޮށް އިއުލާން ކުރައްވައިފަ އެވެ. އެގޮތުން ސްޓްރީޓިން ވިދާޅުވީ، ލޭބާ ޕާޓީގެ ލީޑަރުގެ މަގާމަށް އޭނާ ވާދަ ކުރައްވާނެ ކަމަށެވެ. އިނގިރޭސިވިލާތުގެ ލަންޑަންގައި ކުރިއަށް ދިޔަ ޙަރަކާތެއްގައި ވާހަކަ ދައްކަވަމުން ސްޓްރީޓިން ވިދާޅުވީ، އެންމެ ރަނގަޅު ކެންޑިޑޭޓުން ބައިވެރިވާ އިންތިޚާބެއް ބޭނުންވާ ކަމަށާއި، އެފަދަ އިންތިޚާބެއްގައި އޭނާ ވެސް ވާދަ ކުރައްވާނެ ކަމަށެވެ.
ހޮނިހިރު ދުވަހު ސްޓްރީޓިން މިކަން އިއުލާން ކުރައްވާފައިވާއިރު، މީގެ ދެ ދުވަސް ކުރިން ގްރޭޓާ މެންޗެސްޓަރގެ މޭޔަރު އެންޑީ ބާންހަމް ވަނީ ޤާނޫނު ހަދާ މަޖިލީހަށް ވާދަ ކުރައްވާނެ ކަމަށް އިއުލާން ކުރައްވައިފަ އެވެ. އޭނާ އަކީ ވެސް ސްޓާމާއާ ދެކޮޅަށް، ލޭބާ ޕާޓީގެ ލީޑަރުގެ މަގާމަށް ވާދަ ކުރައްވާނެ ކަމަށް ބެލެވޭ ބޭފުޅެކެވެ.
ބާންހަމް އަށް ޤާނޫނު ހަދާ މަޖިލީހުގެ ބައި އިލެކްޝަން ކާމިޔާބު ވެއްޖެ ނަމަ، ލޭބާ ޕާޓީގެ ލީޑަރުގެ މަގާމަށް ވާދަ ކުރުމުގެ ފުރުސަތު އޭނާ އަށް ވެސް ލިބިގެންދާނެ އެވެ. ނަމަވެސް ސްޓާމާއާ ދެކޮޅަށް، ލޭބާ ޕާޓީގެ ލީޑަރުގެ މަގާމަށް ވާދަ ކުރައްވާނެކަން މިހާތަނަށް ރަސްމީކޮށް އިއުލާން ކުރެއްވި ފުރަތަމަ ބޭފުޅަކީ ސްޓްރީޓިން އެވެ.
ބޮޑު ވަޒީރު ސްޓާމާގެ ސަރުކާރުގައި ހެލްތު ސެކްރެޓަރީގެ މަގާމު އަދާ ކުރެއްވި ސްޓްރީޓިން އަކީ އާންމުންގެ މެދުގައި ވަރަށް މަޤުބޫލު ބޭފުޅެކެވެ. ޚާއްސަކޮށް ޞިއްޙީ ދާއިރާ އަށް އޭނާ ގެނެސްދެއްވާފައިވާ ބަދަލު ތަކުގެ ސަބަބުން ގިނަ ބައެއްގެ ތާއީދު އޭނާ އަށް އޮވެ އެވެ. އޭގެ އިތުރުން ލޭބާ ޕާޓީގެ އެތެރޭގައި ވެސް ސްޓްރީޓިން އަކީ މަޤުބޫލު ބޭފުޅެކެވެ.
މަސްދަރު: އޭއެފްޕީ
