ބޮޑު ވަޒީރު ސްޓާމާ އަށް އިތުބާރު ގެއްލިފައިވާ ކަމަށް ވިދާޅުވެ، ހެލްތު ސެކްރެޓަރީ ސްޓްރީޓިން އިސްތިއުފާ ދެއްވައިފި

އިނގިރޭސިވިލާތުގެ ހެލްތު ސެކްރެޓަރީ އަދި ބޮޑު ވަޒީރު ސްޓާމާއާ ވާދަވެރި ވާނެ ކަމަށް ބެލެވޭ ހެލްތު ސެކްރެޓަރީ ވެސް ސްޓްރީޓިން ސަރުކާން އިސްތިއުފާ ދެއްވައިފި އެވެ.

ބޮޑު ވަޒީރު ސްޓާމާ އަށް ފޮނުއްވި ސިޓީއެއްގައި ސްޓްރީޓިން ވިދާޅުވީ، ބޮޑު ވަޒީރުގެ ހިތްވަރު އަދި ދައުލަތް ހިންގުމުގެ ހުނަރަށް އިޙްތިރާމް ކުރި ނަމަވެސް، ޤައުމަށް ތަސައްވުރެއް ބޭނުން ވެފައިވާ ދަނޑިވަޅެއްގައި ސަރުކާރުގެ ތެރޭގައި އޮތީ ހުސް ކަމެއް ކަމަށެވެ.

ސްޓްރީޓިން އިސްތިއުފާ ދެއްވުމާ ގުޅިގެން، އޭގެ ޖަވާބުގައި ފޮނުވި ސިޓީގައި ސްޓާމާ ވިދާޅުވެފައި ވަނީ ސްޓްރީޓިން އިސްތިއުފާ ދެއްވުމަކީ ހިތާމަ ކުރާ ކަމެއް ކަމަށެވެ. ނަމަވެސް، މިދިޔަ އާންމު އިންތިޚާބުގައި ރައްޔިތުން ދެކޮޅު ހެދި ކަންކަމަށް ބަދަލު ގެނެސް، ރައްޔިތުންނަށް ވެފައިވާ ވައުދުތައް ފުއްދަވަން ޖެހޭނެ ކަމަށް ބޮޑު ވަޒީރު ސްޓާމާ ވިދާޅުވެފައިވެ އެވެ. 

މަގާމުން އިސްތިއުފާ ދެއްވިކަން އިއުލާން ކުރައްވަމުން ސްޓްރީޓިން ވިދާޅުވީ، ހެލްތު އެންޑް ސޯޝަލް ކެއާ މިނިސްޓަރުގެ މަގާާމާ ހަވާލުވެ ވަޑައިގަތްއިރު، ކަނޑައެޅި ހުރިހާ އަމާޒު ތަކެއް ހާސިލުވެފައިވާ ކަމަށެވެ. އެގޮތުން ޞިއްޙީ ދާއިރާގެ މުވައްޒަަފުން ހަޅުތާލު ކުރަމުން އައި ނަމަވެސް، ބަލި މީހުން ގިނަ ވަގުތު މަޑު ކޮށްގެން ތިބެން ޖެހޭ މައްސަލަ ހައްލު ކުރުމަށް ކަނޑައެޅި އަމާޒު ހާސިލުވެފައިވާ ކަމަށް އޭނާ ވިދާޅުވި އެވެ. 

އެގޮތުން މިއަހަރުގެ މާޗު މަހު އެކަނި ވެސް، ވެއިޓިން ލިސްޓުން 110،000 މީހުން މަދު ކުރެވިފައިވާ ކަމަށާއި، މިއީ 2008 ވަނަ އަހަރަށް ފަހު ކޮވިޑުގެ ދުވަސްވަރު ފިޔަވައި އެއް މަސް ދުވަހުގެ ތެރޭގައި ލިސްޓުން މިހާ ގިނަ އަދަދެއްގެ މީހުން މަދު ކުރެވުނު ފުރަތަމަ ފަހަރު ކަމަށް ސްޓްރީޓިން ފާހަގަ ކުރެއްވި އެވެ. 

ބޮޑު ވަޒީރު ސްޓާމާގެ ސަރުކާރުން ސްޓްރީޓިން އިސްތިއުފާ ދެއްވާފައިވާއިރު، ލޭބާ ޕާޓީގެ ލީޑާޝިޕް އަށް އޭނާ ވާދަ ކުރަައްވާނެ ކަމުގެ އަޑުތައް ވަނީ ފެތުރިފަ އެވެ. ބޮޑު ވަޒީރު ސްޓާމާއާ ދެކޮޅަށް ސްޓްރީޓިން ނިކުންނަވާނެ ކަމުގެ އަޑުތަކާ އެކު، ބުދަ ދުވަހު ސްޓާމާ ވަނީ ސްޓްރީޓިންއާ ބައްދަލު ވެސް ކުރައްވައިފަ އެވެ. ނަމަވެސް، އެ ބައްދަލުވުމުގެ ތަފްސީލެއް ހާމަ ކޮށްފައި ނުވެ އެވެ. ސްޓްރީޓިން އިސްތިއުފާ ދެއްވީ އޭގެ ފަހުންނެވެ.