ބޮޑު ވަޒީރު ސްޓާމާއާ ޗެލެންޖު ކުރެވޭ ވަރަށް ސޮއި ހަމަވާނެ އެހެން ކެންޑިޑޭޓަކު ނެތް ކަމަށް، ކެބިނެޓުގެ މިނިސްޓަރަކު ވިދާޅުވެއްޖެ

އިނގިރޭސިވިލާތުގެ ބޮޑު ވަޒީރު އަދި ލޭބާ ޕާޓީގެ ލީޑަރު ކިއާ ސްޓާމަ މަގާމުން ދުރު ކުރުމަށް ބޭނުންވާ އަދަދަށް ސޮއި ހަމަވާނެ އެހެން ކެންޑިޑޭޓަކު އެ ޕާޓީގައި ނެތް ކަމަށް، ސްޓާމާގެ ސަރުކާރުގައި ހިމެނޭ ކެބިނެޓު މިނިސްޓަރު ނިކް ތޯމަސް ސިމަންޑްސް ވިދާޅުވެއްޖެ އެވެ. 

ބީބީސީ ރޭޑިއޯ 4 ޕްރޮގްރާމްގައި ވާހަކަ ދައްކަވަމުން ތޯމަސް ސިމަންޑްސް ވިދާޅުވީ، އެއީ ތެދު ހަގީގަތެއް ކަމަށާއި، ލީޑާޝިޕްގެ ވާދަވެރި ކަމެއް ފެށުމަށް ބޭނުންވާ ސޮއި ހޯދުމުގެ ޤާބިލުކަން ލިބިފައިވާ އެހެން ކެންޑިޑޭޓަކު ނެތް ކަމަށެވެ. އޭނާ މިހެން ވިދާޅުވެފައިވާއިރު، ބޮޑު ވަޒީރު ކަމުން ސްޓާމާ ދުރު ކުރުމަށް ލޭބާ ޕާޓީގެ ތެރެއިން ވެސް އަންނަނީ މަސަައްކަތް ކުރަމުންނެވެ. 

ތޯމަސް ސިމަންޑްސް ވިދާޅުވީ، ފާއިތުވި ދުވަސް ތަކުގައި ބޮޑު ވަޒީރު ސްޓާމާގެ ސަރުކާރަށް ދަތި ތަކެއް ކުރިމަތިވި ކަމަށް ބުނެވިދާނެ ކަމަށެވެ. ނަމަވެސް، ސްޓާމާ ބަދަލު ކުރުމުގެ ވިސްނުން ހުރި ކަމަށް ދޭހަވާ ކަހަލަ އެއްވެސް ވާހަކައެއް ދެއްކެވި މިނިސްޓަރަކު ފާހަގަވާން ނެތް ކަަމަށް އޭނާ ވިދާޅުވި އެވެ. ތޯމަސް ސިމަންޑްސް މިހެން ވިދާޅުވި ނަަމަވެސް، ސްޓާމާގެ ސަރުކާރުން ހަތަރު މިނިސްޓަރަަކު ވަނީ އިސްތިއުފާ ވެސް ދެއްވައިފަ އެވެ. 

މީގެ އިތުރުން އޭނާ ވިދާޅުވީ، މިދިޔަ ހަފުތާގައި ބޭއްވި އިންތިޚާބު ތަކުގެ ނަތީޖާ އަކީ ސަރުކާރު ހަމަޖެހިލައިގެން ސަމާލުކަން ދޭން ޖެހޭ ކަމެއް ކަމަށެވެ. އަދި ރައްޔިތުންނަަށް ޚިދުމަތް ފޯރުކޮށްދިނުމުގެ މަސައްކަތުގައި އިތުރަށް ބާރު އަޅަން ޖެހޭ ކަމަށް ވެސް އޭނާ ވަނީ ވިދާޅޫވެފަ އެވެ. 

ސަރުކާާރުން މިހާރު ކުރަން ޖެހޭ އެންމެ މުހިންމު ކަމަކީ، އިންތިޚާބު ތަކުގެ ނަތީޖާ ތަކުން ލިބުނު މެސެޖު ތަކަށް ހިތްވަރުކޮށް، ރައްޔިތުންނަށް ވައުދުވެފައިވާ ކަންކަން ފުއްދައި ދިނުމަށް ވަރުގަދަ މަސައްކަތް ތަކެއް ކުރުން ކަމަށް ވެސް ތޯމަސް ސިމަންޑްސް ފާހަގަ ކުރެއްވި އެވެ. 

ލޭބާ ޕާޓީގެ ލީޑާޝިޕް ބަދަލު ކުރުމަށް، ނުވަތަ ލީޑާޝިޕްގެ ވާދަވެރި ކަމެއް ފެށުމަށް ބޭނުން ވަނީ އެ ޕާޓީގެ މެމްބަރުންގެ ތެރެއިން މަދުވެގެން 81 މެމްބަރުންގެ ސަޕޯޓެވެ. މި އަދަދު ހޯދުމަކީ ވަރަށް އުނދަގޫ ކަމެއް ކަމަށް ތަޖުރިބާކާރުން ފާހަގަ ކޮށްފައިވެ އެވެ. ނަމަވެސް، ސަރުކާރާ މެެދު އޮތް ހިތްހަމަ ނުޖެހުމުގެ ތެރެއިން، މި އަދަދު ހަމަ ކުރުމަކީ ވެސް ވެދާނެ ކަމެއް ކަމަށް ބައެއް ފަރާތް ތަކުން ދެކެ އެވެ. 

ލޭބާ ޕާޓީގެ ލީޑަރުގެ މަގާމަށް ސްޓާމާ ވަޑައިގެންފައި ވަނީ 2020 ވަނަ އަހަރު އެވެ. އޭނާގެ ލީޑާޝިޕްގެ ދަށުން ލޭބާ ޕާޓީ އިން ވަނީ އާންމު އިންތިޚާބުގައި ބޮޑު ކާމިޔާބެއް ހޯދައި، ސަރުކާރަށް އައިސްފަ އެވެ. ނަމަވެސް، އޭގެ ފަހުން އެކި ގޮން ޖެހުންތައް ދިމާވެ، ސްޓާމާ އަށް އަންނަނީ ޕްރެޝަރު ބޮޑުވަމުންނެވެ.