ބޮޑު ވަޒީރު ސްޓާމާގެ ސަރުކާރުން ހަތަރު މިނިސްޓަރަކު އިސްތިއުފާ ދެއްވައިފި

އިނގިރޭސިވިލާތުގެ ބޮޑު ވަޒީރު ކިއާ ސްޓާމާގެ ސަރުކާރުން މިނިސްޓަރަކު އިސްތިއުފާ ދެއްވުމާ އެކު، ސަރުކާރުގެ ތެރޭގައި ނުތަނަވަސްކަން ބޮޑުވެއްޖެ އެވެ. 

ހަތަރު މިނިސްޓަރަކު މަގާމުން އިސްތިއުފާ ދެއްވާފައި މި ވަނީ، ބޮޑު ވަޒީރު ސްޓާމާ އަށް ލޭބާ ޕާޓީގެ ތެރެއިން ޕްރެޝަރު ބޮޑުވެ، އިސްތިއުފާ ދެއްވުމަށް ބައެއް މެމްބަރުން ގޮވާލަމުން އަންނަ ވަގުތެއްގަ އެވެ.

ނަމަވެސް، ބޮޑު ވަޒީރުގެ އޮފީސް، ޑައުނިން ސްޓްރީޓް އިން ވަނީ އިސްތިއުފާ ދެއްވި މިނިސްޓަރުންގެ ބަދަލުގައި އެހެން ބޭފުޅުން މަގާމަށް އައްޔަން ކުރައްވާފައިކަން އިއުލާން ކޮށްފަ އެވެ. އެގޮތުން ސަރުކާރުގެ އައު މަގާމު ތަކަށް ވަނީ ޖުމުލަ ހަތް ބޭފުޅުން އައްޔަން ކޮށްފަ އެވެ. 

ހައުސިން ކޮމިއުނިޓީޒް އެންޑް ލޯކަލް ގަވަމަންޓް މިނިސްޓްރީގެ ޕާލަމެންޓްރީ އަންޑަރ ސެކްރެޓެރީގެ މަގާމަށް އައްޔަން ކުރައްވާފައި ވަނީ، ނެސިލް ކަލިސްކަން އެވެ. ހޯމް އޮފީހުގެ ޕާލަމެންޓްރީ އަންޑަރ ސެކްރެޓަރީގެ މަގާމަށް އައްޔަން ކުރައްވާފައި ވަނީ ނަޓަލީ ފްލީޓް އެވެ. 

ޖަސްޓިސް މިނިސްޓްރީގެ އަންޑަރ ސެކްރެޓަރީ އޮފް ސްޓޭޓްގެ މަގާމަށް އައްޔަން ކުރައްވާފައި ވަނީ ކެތުރިން އެޓްކިންސަން އެވެ. ޑިޕާޓްމަންޓް އޮފް ހެލްތު އެންޑް ސޯޝަލް ކެއާގެ ޕާލަމެންޓްރީ އަންޑަރ ސެކްރެޓަރީގެ މަގާމަށް އައްޔަން ކުރައްވާފައި ވަނީ ޕްރީތު ކައުރު ގިލް އެވެ. 

މީގެ އިތުރުން ކޮންޓްރޯލަރ އޮފްް ހިޒް މެޖެސްޓީޒް ހައުސްހޯލްޑްގެ މަގާމަށް އައްޔަން ކުރައްވާފައި ވަނީ ޖެން ކިޗަން އެވެ. ޖޫނިއާ ލޯޑް އޮފް ދަ ޓްރެޒަރީގެ މަގާމަށް ސަރުކާރުގެ ވިޕެއްގެ ގޮތުގައި އައްޔަން ކުރައްވާފައި ވަނީ ޑިއާޑްރީ ކޮސްޓިގަން އެވެ. ހަމަ އެހެންމެ ހައުސް އޮފް ކޮމަންސްގެ އެސިސްޓެންޓް ވިޕެއްގެ ގޮތުގައި އައްޔަން ކުރައްވާފައި ވަނީ ޝޯން ޑޭވިސް އެވެ. 

މި އައު މަގާމު ތަކަށް މިނިސްޓަރުން އައްޔަން ކުރެއްވީ، ސަރުކާރުން ކުއްލި ގޮތަކަށް ހަތަރު މިނިސްޓަރުން އިސްތިއުފާ ދެއްވުމާ ގުޅިގެންނެވެ. އިސްތިއުފާ ދެއްވި މިނިސްޓަރަކުންނަކީ ޒުބައިރު އަޙުމަދު، މިއައްތާ ފަހުންބުލްލެހް، ޖެސް ފިލިޕްސް އަދި އެލެކްސް ޑޭޥިސް ޖޯންސް އެވެ. 

މިއީ ބޮޑު ވަޒީރު ސްޓާމާގެ ސަރުކާރަށް ގެނައި ވަރަށް މުހިންމު ބަދަލު ތަކެއް ކަމަށް ފާހަގަ ކޮށްފައިވެ އެވެ.