އީރާން ހަނގުރާމައިގެ ތެރޭގައި ނަތަންޔާހޫ ސިއްރިޔާތުގައި ޔޫއޭއީ އަށް ވަޑައިގެންނެވި ކަމަށް ހާމަ ކޮށްފި

އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ކުރަމުން ގެންދިޔަ ދުވަސްވަރު، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ސިއްރިޔާތުގައި އެކުވެރި އަރަބި އިމާރާތް (ޔޫއޭއީ) އަށް ވަޑައިގެންނެވި ކަމަށް ހާމަ ކޮށްފި އެވެ. 

އެކަން ހާމަ ކޮށްފައި ވަނީ އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫގެ އޮފީހުންނެވެ. އެ އޮފީހުން ބުނެފައި ވަނީ، އީރާންގެ ހަނގުރާމައިގެ ތެރޭގައި ނަތަންޔާހޫ ޔޫއޭއީ އަށް ވަޑައިގެންނެވި ކަމަށާއި، އަދި އެ ޤައުމުގެ ރައީސްއާ ބައްދަލު ވެސް ކުރެއްވި ކަމަށެވެ. 

ބޮޑު ވަޒީރުގެ އޮފީހުން ބުނެފައި ވަނީ، އިޒްރޭލް އިން އީރާންއާ ދެކޮޅަށް ހިންގި ލަޔަންސް ރޯރް އޮޕަރޭޝަންގެ ތެރޭގައި ބޮޑު ވަޒީރު ނަތަންޔާހޫ، ޔޫއޭއީ އަށް ވަޑައިގެންނެވީ ސިއްރުން ކަމަށެވެ. އެ ދަތުރުފުޅުގައި ޔޫއޭއީގެ ރައީސް ޝައިޚް މުޙައްމަދު ބިން ޒާޔިދާ ބައްދަލު ކުރެއްވި ކަމަށް ވެސް ބުނެފައިވެ އެވެ. 

ނަތަންޔާހޫގެ އެ ދަތުރުފުޅުގެ ސަބަބުން އިޒްރޭލް އާއި ޔޫއޭއީއާ ދެމެދުގައި އޮތް ގުޅުމަށް ތާރީޚީ ކުރިއެރުމެއް ލިބިފައިވާ ކަމަށް އެ ބަޔާނުގައި ބުނެފައިވެ އެވެ. އިޒްރޭލް އާއި ޔޫއޭއީއާ ދެމެދު ރަސްމީކޮށް ގުޅުން ޤާއިމު ކޮށްފައި ވަނީ 2020 ވަނަ އަހަރު އަބްރަހަމް އެކޯޑްސް ނަމުގައި ހެދި އެއްބަސްވުމުގެ ދަށުންނެވެ. އޭގެ ފަހުން ދެ ޤައުމުގެ ދެ މެދުގައި ވިޔަފާރީގެ ގުޅުމާއި، ސިޔާސޫ ގުޅުން ވަަރަށް ބޮޑަށް ވަނީ ބަދަހިވެފަ އެވެ. 

ނަމަވެސް، ފަލަސްޠީނުގެ ޣައްޒާގައި އިޒްރޭލް އިން ހިންގަން ފެށި ހަނގުރާމައިގެ ސަބަބުން ދެ ޤައުމުގެ ދެ މެދުގައި އޮތް ގުޅުމަށް ބުރޫ އަރާފައިވާ ކަމަަށް ބުނެފައިވެ އެވެ. މި ދަތުރުފުޅަކީ އެ ފަދަ ކަންބޮޑުވުންތައް ދުރުކޮށް، ދެ ޤައުމުގެ ގުޅުން އިތުރަށް ވަރުގަދަ ކުރުމަށް ކުރެވުނު މަސައްކަތެއް ކަމަށް ފާހަގަ ކޮށްފައިވެ އެވެ. 

މީގެ އިތުރުން ނަތަންޔާހޫގެ އޮފީހުން ބުނެފައި ވަނީ އެ ދަތުރުފުޅުގެ ތަފްސީލު އިތުރަށް ހާމަ ނުކުރާ ކަމަށާއި، ސަލާމަތީ ސަބަބު ތަކަށްޓަކައި އެ ދަތުރުފުޅުގެ ބައެއް މައުލޫމާތު ސިއްރު ކުރަން ނިންމާފައިވާ ކަމަށެވެ. 

ނަތަންޔާހޫގެ އޮފީހުން އެހެން ބުނި ފަހުން، ޔޫއޭއީ އިން ވަނީ އެ ވާާހަކަ ދޮގު ކޮށްފަ އެވެ. ޔޫއޭއީ އިން ބުނެފައި ވަނީ އިޒްރޭލް އާއެކު ގުޅުން ބާއްވަމުން އަންނަނީ ކަނޑައެޅިފައިވާ އެއްބަސްވުމުގެ ދަށުން ކަމަށެވެ. އޭގެ ބޭރުން އެއްވެސް ގުޅުމެއް ނުބާއްވާ ކަމަށާއި، ނަތަންޔާހޫ އެއްވެސް ސިއްރު ދަތުރުފުޅެއް ކުރައްވާފައި ނުވާ ކަމަށް ޔޫއޭއީ އިން ވަނީ ބުނެފަ އެވެ.