އެއްބަސްވުން ހަމަވުމުން، ސިޓީ ދޫކޮށްލަން ސިލްވާ ވިސްނަނީ

މެންޗެސްޓަރ ސިޓީ އަށް ކުޅެމުން އަންނަ ޕޯޗުގަލްގެ ބެނާޑޯ ސިލްވާ، އެ ކުލަބާ އެކު ސޮއި ކޮށްފައިވާ އެއްބަސްވުމުގެ މުއްދަތު ހަމަވުމުން ކުލަބު ދޫކޮށްލަން ވިސްނަމުން އަންނަ ކަމަށް ރިޕޯޓުތައް ބުނެފި އެވެ.

އުމުރުން 31 އަހަރުގެ ކުޅުންތެރިޔާ ސިޓީ އަށް ބަދަލުވެފައި ވަނީ 2017 ވަނަ އަހަރު އެވެ. ސިޓީ އާއެކު ސިލްވާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. ނަމަވެސް، މިހާތަނަށް ސިޓީގެ އެއްބަސްވުން އައު ކުރުމާ މެދު ސިލްވާ ވަކި ނިންމުމެއް ނިންމާފައި ނުވާ ކަމަށް ރިޕޯޓު ތަކުގައި ފާހަގަ ކޮށްފައިވެ އެވެ.

މީޑިއާ ތަކުގައި ބުނެފައި ވަނީ، އެއްބަސްވުމުގެ މުއްދަތު ހަމަވުމާ އެކު އެ ކުލަބު ދޫކޮށްލަން ސިލްވާ ވިސްނަމުން އަންނަ ކަމަށެވެ. އެގޮތުން ހިލޭ ޓްރާންސްފާ އެއްގައި ސިޓީ ދޫކޮށްލުމަށް ފަހު އެހެން ކުލަބަކަށް ބަދަލުވާން ސިލްވާ ވިސްނަމުން އަންނަ ކަމަށް ބުނެފައިވެ އެވެ. ނަމަވެސް، އެކަމާ މެދު ސިލްވާ ފައިނަލް ނިންމުމެއް ނިންމާފައި ނުވާ ކަމަށާއި، އެއްބަސްވުމުގެ ކަންތަކާ ގުޅޭ ގޮތުން އޭނާ ސިޓީ އާއެކު މަޝްވަރާ ކުރާނެ ކަމަށް ފާހަގަ ކޮށްފައިވެ އެވެ.

މީގެ އިތުރުން މީޑިއާ ތަކުގައި ބުނެފައިވާ ގޮތުން، ސިލްވާ ހޯދުމަށް ގިނަ ކުލަބު ތަކަކުން އޮތީ ޝައުޤުވެރި ވެގެންނެވެ. އޭގެ ތެރޭގައި ޔޫރަޕުގެ ކުލަބު ތަކުގެ އިތުރުން، ސައުދީ އަރަބިއްޔާގެ ބައެއް ކުލަބު ތަކުން ވެސް ސިލްވާ އަށް ފާރަލަމުން އަންނަ ކަމަށް ބުނެފައިވެ އެވެ.

ސިޓީ އާއެކު މިހާރު ސިލްވާ ހޭދަ ކުރަމުން ދަނީ އޭނާގެ ނުވަ ވަނަ ސީޒަން އެވެ. މިހާތަނަށް އޭނާ ވަނީ ސިޓީ އަށް ކުޅެދިން 449 މެޗުގައި 76 ލަނޑު ޖަހައިފަ އެވެ. އަދި ސިޓީ އާއެކު އޭނާ ވަނީ 19 ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު ހަ ފަހަރު ކާމިޔާބު ކުރުމުގެ އިތުރުން، ސިޓީގެ ތާރީޚުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރުން ވެސް ހިމެނެ އެވެ.

މީގެ އިތުރުން ސިލްވާ ވަނީ ސިޓީ އާއެކު އެފްއޭ ކަޕާއި، ކަރަބޯ ކަޕާއި، އެފްއޭ ކޮމިއުނިޓީ ޝީލްޑާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ވެސް ކާމިޔާބު ކޮށްފަ އެވެ.