ސީޒަން ނިމުމާ އެކު ސިޓީ ދޫކޮށްލާނެކަން ސިލްވާ އެ ކުލަބަށް އަންގައިފި

މެންޗެސްޓަރ ސިޓީ އަށް ކުޅެމުން އަންނަ ޕޯޗުގަލްގެ ބެނާޑޯ ސިލްވާ، އެ ކުލަބާ އެކު ސޮއި ކޮށްފައިވާ އެއްބަސްވުމުގެ މުއްދަތު ހަމަވުމުން ކުލަބު ދޫކޮށްލާނެ ކަމަށް އަންގައިފި އެވެ.

މީޑިއާ ތަކުގައި ބުނެފައިވާ ގޮތުން މި ހަފުތާގެ ތެރޭގައި ސިލްވާ ވަނީ އޭނާގެ ނިންމުން ސިޓީ އަށް އަންގައިފަ އެވެ. އެގޮތުން މީޑިއާ ތަކުގައި ބުނެފައި ވަނީ ސިޓީގެ އެސިސްޓެންޓް ކޯޗުގެ ފަރާތުން އެކަން ކަށަވަރު ވެފައިވާ ކަމަށެވެ. ސިޓީ ދޫކޮށްލަން ސިލްވާ ނިންމާފައިވާއިރު، އޭނާ ސިޓީ ދޫކޮށްލަން ވިސްނަމުން އަންނަ ކަމަށް މިދިޔަ ހަފުތާގެ ތެރޭގައި މީޑިއާ ތަކުގައި ވަނީ ރިޕޯޓު ކޮށްފަ އެވެ. 

އުމުރުން 31 އަހަރުގެ ސިލްވާ ސިޓީ އަށް ބަދަލުވެފައި ވަނީ 2017 ވަނަ އަހަރުގެ ތެރޭގަ އެވެ. ސިޓީ އާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު މިއަހަރުގެ ޖޫން މަހުގެ ނިޔަލަށް ހަމަވާނެ އެވެ. އެއާ އެކު، އެއްބަސްވުން އައު ކުރުމުގެ ބަދަލުގައި ސިލްވާ ބޭނުން ވަނީ ކުލަބު ދޫކޮށްލުމަށެވެ. އެގޮތުން ސިލްވާ އެހެން ކުލަބަކަށް ދެން ބަދަލު ވާނީ ހިލޭ ޓްރާންސްފާއެއްގެ ދަށުންނެވެ. 

ސިޓީ އާއެކު މިހާރު ސިލްވާ ހޭދަ ކުރަމުން ދަނީ އޭނާގެ ނުވަ ވަނަ ސީޒަން އެވެ. މިހާތަނަށް އޭނާ ވަނީ ސިޓީ އަށް ކުޅެދިން 450 މެޗުގައި 76 ލަނޑު ޖަހައިފަ އެވެ. އަދި ސިޓީ އާއެކު އޭނާ ވަނީ 19 ތަށްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު ހަ ފަހަރު ކާމިޔާބު ކުރުމުގެ އިތުރުން، ސިޓީގެ ތާރީޚުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރުން ވެސް ހިމެނެ އެވެ.

މީގެ އިތުރުން ސިލްވާ ވަނީ ސިޓީ އާއެކު އެފްއޭ ކަޕާއި، ކަރަބޯ ކަޕާއި، އެފްއޭ ކޮމިއުނިޓީ ޝީލްޑާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ވެސް ކާމިޔާބު ކޮށްފަ އެވެ. ސިޓީ ދޫކޮށްލަން ސިލްވާ ނިންމާފައިވާއިރު، އޭނާ ހޯދުމުގެ ޝައުޤުވެރިކަން ބައެއް ކުލަބު ތަކުން ގެން ގުޅޭ ކަމަށް ވަނީ ބުނެފަ އެވެ. އެގޮތުން ސައުދީ އަރަބިއްޔާގެ ބައެއް ކުލަބު ތަކުން އޭނާ އަށް ޝައުޤުވެރިވާ ކަމަށް ބުނެފައިވެ އެވެ.