ޑްރޯން ހަމަލާއެއްގައި އިރާގުގައި ތިބި ފަރަންސޭސި ސިފައިންގެ މީހަކު މަރުވެ، އިތުރު ސިފައިންތަކެއް ޒަޚަމްވެއްޖެ
އިރާގުގައި ހަރަކާތްތެރިވާ ފަރަންސޭސި ސިފައިންނަށް އަމާޒުކޮށް ދިން ހަމަލާއެއްގައި އެ ގައުމުގެ އޮފިސަރަކު މަރުވެ، އިތުރު ބަޔަކަށް އަނިޔާވުމާ ގުޅިގެން ރައީސް މެކްރޮން ވަނީ ހިތާމަ ފާޅުކުރައްވާފައި. އައިއެސްއާ ދެކޮޅަށް މަސައްކަތްކުރާ މި ސިފައިންނަށް ދިން ހަމަލާއަކީ އީރާނުގެ ހަނގުރާމައާ ގުޅުވައިގެން ދިން ހަމަލާއެއް ނަމަވެސް، އެއީ މިފަދަ އަމަލެއް ހިންގުމަށް އޮތް އުޒުރެއް ނޫން ކަމަށް އެމަނިކުފާނު ވިދާޅުވި.
އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ހަމަލާ ދިނުމުގައި ބޭނުން ކުރާ ޑްރޯންގެ މަންޒަރެއް. | ތަސްނީމް ނިއުސް އޭޖެންސީ
އިރާގުގެ އުރުބީލް ސަރަހައްދުގައި ދިން ޑްރޯން ހަމަލާއެއްގައި ފަރަންސޭސިވިލާތުގެ ޗީފް ވޮރަންޓް އޮފިސަރަކު މަރުވެ، އިތުރު ސިފައިންތަކަކަށް އަނިޔާވެފައިވާކަން އެ ގައުމުގެ ރައީސް އިމަނުއަލް މެކްރޮން އިއުލާން ކުރައްވައިފިއެވެ. ރައީސް މެކްރޮން ވަނީ މި ހަމަލާއަކީ އީރާނާއެކު ހިނގަމުންދާ ހަނގުރާމައާ ގުޅުންހުރި ހަމަލާއެއްކަމަށް ވިދާޅުވެފައެވެ.
އެކްސްގައި ކުރެއްވި ޕޯސްޓެއްގައި މެކްރޮން ވިދާޅުވީ، މަރުވި ސިފައިންގެ މީހާގެ އާއިލާއަށާއި އޭނާއާއެކު މަސައްކަތްކުރި ސިފައިންނަށް، މުޅި ގައުމުގެ ފަރާތުން ހަމްދަރުދީއާއި ތައުޒިޔާ ފޮނުއްވާ ކަމަށެވެ.
މީގެ އިތުރުން، މި ހަމަލާގައި ފަރަންސޭސިވިލާތުގެ އިތުރު ސިފައިންތަކަކަށް އަނިޔާވެފައިވާ ކަމަށާއި، ފަރަންސޭސި ސަރުކާރު އޮތީ އެ ސިފައިންނާއި އެމީހުންގެ އާއިލާތަކާއެކު ކަމަށްވެސް ރައީސް މެކްރޮން ވިދާޅުވިއެވެ.
ފަރަންސޭސި ސިފައިން އިރާގުގައި ތިބެނީ ހަރުކަށި ފިކުރުގެ އައިއެސް ޖަމާއަތާ ދެކޮޅަށް ކުރާ މަސައްކަތުގެ ތެރެއިން ކަމަށް ރައީސް މެކްރޮން ފާހަގަކުރެއްވިއެވެ.
ރައީސް މެކްރޮން އިތުރަށް ވިދާޅުވީ، އީރާނުގައި ހިނގަމުންދާ ހަނގުރާމައަކީ މިފަދަ ހަމަލާތަކެއް ދިނުމަށް އޮތް އުޒުރެއް ނޫން ކަމަށެވެ.
