އީރާނުން އެމެރިކާ އާއި އިޒްރޭލުގެ ރާޑަރު ނިޒާމުތަކުގެ ބޮޑު ބައެއް ހަލާކުކޮށްލައިފި
11 މާރިޗު 2026 | ބުދަ 02:39އެމެރިކާއާއި އިޒްރޭލުގެ ރާޑަރު ނިޒާމުތަކުގެ ބޮޑު ބައެއް ހަލާކުކޮށްލުމާ ގުޅިގެން، އީރާނުގެ ޑްރޯންތަކަށް ދުޝްމަނުންގެ ވައިގެ ދިފާއީ ނިޒާމުތައް ފޫއަޅުވާލުމުގެ ފުރުސަތު ބޮޑުވެފައިވާ ކަމަށް އެ ގައުމުގެ އަސްކަރިއްޔާއިން ވަނީ ބުނެފައި. ދުޝްމަނުންގެ ހަތިޔާރުގެ ރިޒާވްގެ 75 އިންސައްތަ ބޭނުންކޮށްފައިވާތީ ހަތިޔާރުގެ ދަތިކަމެއް ކުރިމަތިވެފައިވާ ކަމަށާއި، މި ހުސްކަން ފޫބެއްދުމަށް އެމެރިކާއިން އެހެން ސަރަހައްދުތަކުން މިސައިލް ޑިފެންސް ސާމާނު މެދުއިރުމައްޗަށް ބަދަލުކުރަމުންދާ ކަމަށްވެސް އީރާނުން ހާމަކުރޭ. މީގެއިތުރުން، ބައިނަލްއަގުވާމީ ގާނޫނުތަކާ ޚިލާފަށް އިރާގުގެ ވައިގެ ސަރަހައްދު ބޭނުންކުރާ ކުރުން ކުށްވެރިކޮށް، ކޮންމެ އުދުވާނަކަށް ވަރުގަދަ ރައްދެއް ދޭނެ ކަމުގެ އިންޒާރު އީރާނުން ވަނީ ދީފައި.
ކުވެއިތުގައި ހުންނަ އަލީ އަލް ސާލިމް އެއާ ބޭސް. | ޕްރެސްޓީވީ
އެމެރިކާއާއި އިޒްރޭލުގެ ރާޑަރު ނިޒާމުތަކުގެ ބޮޑު ބައެއް ހަލާކުކޮށްލައިފި ކަމަށް އީރާނުގެ އަސްކަރިއްޔާއިން ބުނެފިއެވެ. އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން އެމެރިކާއާއި އިޒްެރޭލުގެ ރާޑަރުގެ ގާބިލުކަމުގެ ބޮޑު ބައެއް ކާމިޔާބުކަމާއެކު ނައްތާލާފައިވާ ކަމަށާއި، މީގެ ސަބަބުން އިޒްރޭލުގެ އަސްކަރީ މަރުކަޒުތަކަށް އަމާޒުކޮށް ދޭ ހަމަލާތަކަށް އެ ތަންތަން އިތުރަށް ހުށަހެޅިފައިވާ ކަމަށް އަސްކަރީ ތަރުޖަމާނަކު ވިދާޅުވިއެވެ.
އީރާނުގެ އަސްކަރިއްޔާގެ ބްރިގޭޑިއާ ޖެނެރަލް މުޙައްމަދު އަކްރަމީނިއާ އަންގާރަ ދުވަހު ވިދާޅުވީ، ދުޝްމަނުންގެ ފާރަވެރިވާ ނިޒާމުތައް ހަލާކުކޮށްލުމުގެ ސަބަބުން، އީރާނުގެ ކުރިއަރާފައިވާ ޑްރޯންތަކަށް ކުރިއަށްވުރެ ފަސޭހަކަމާއެކު ވައިގެ ދިފާއީ ނިޒާމުތައް ފޫއަޅުވާލުމުގެ ފުރުސަތު ލިބިފައިވާ ކަމަށެވެ.
ޖެނެރަލް އަކްރަމީނިއާ ވިދާޅުވީ، އީރާނުގެ އަސްކަރިއްޔާއިން އަމިއްލައަށް އުފައްދާފައިވާ، ޒަމާނީ ޓެކްނޮލޮޖީއާއި އާ ފަންނުތަކުގެ މައްޗަށް ބިނާވެފައިވާ ޑްރޯންތަކުން ދުޝްމަނުންގެ މަރުކަޒުތައް ނައްތާލުމުގައި ވަރަށް ފުރިހަމަ ނަތީޖާއެއް ހޯދާފައިވާ ކަމަށެވެ.
އޭނާ އިތުރަށް ވިދާޅުވީ، ދުޝްމަނުންގެ "އާލީ ވޯނިންގް" ނުވަތަ ދުރާލާ އިންޒާރުދޭ ނިޒާމުތައް ބަލިކަށިވުމާ ގުޅިގެން، އީރާނުގެ އަސްކަރިއްޔާއާއި އައި.އާރް.ޖީ.ސީ އިން މިހާރު ދުޝްމަނުންގެ އަމާޒުތަކަށް މާ ސީދާކޮށް ހަމަލާދެމުންދާ ކަމަށެވެ. އީރާނުގެ މީޑިއާތަކުން އާންމުކޮށްފައިވާ އިންޓެލިޖެންސް ރިޕޯޓުތަކަށް ބަލާއިރު، އެ ސަރަހައްދުގައި އެމެރިކާއާއި އިޒްރޭލުން ބޭނުންކުރާ ރާޑަރު ނިޒާމުތަކުގެ ގާތްގަނޑަކަށް ދެބައިކުޅަ އެއްބައި ވަނީ ހަލާކުކޮށްލާފައެވެ. އަދި ބާކީ ހުރި ނިޒާމުތަކަށް ބޮޑެތި ބުރޫތަކެއް އަރައި، އޮޕަރޭޝަނަލް ގޮތުން ބޮޑެތި ބަލިކަށިކަމެއް ކުރިމަތިވެފައިވާ ކަމަށް ރިޕޯޓުތައް ބުނެއެވެ.
އަސްކަރީ މަސްދަރުތަކާ ހަވާލާދީ އެ ރިޕޯޓުތަކުގައި ބުނެފައިވަނީ، ދުޝްމަނުންގެ އަތުގައި ހުރި ހަތިޔާރުގެ ރަސްމީ ރިޒާވްގެ 75 އިންސައްތަ ބޭނުންކޮށްފައިވާތީ، ހަތިޔާރުގެ ބޮޑު ދަތިކަމެއް އެ ފަރާތްތަކަށް މިހާރު ކުރިމަތިވެފައިވާ ކަމަށެވެ.
ވައިގެ ދިފާއީ ނިޒާމަށް އައިސްފައިވާ މި ހުސްކަން ފޫބެއްދުމަށްޓަކައި، އެމެރިކާއިން އިރުމަތީ އޭޝިއާގައި ހުރި މިސައިލް ޑިފެންސް ސާމާނުތައް މެދުއިރުމައްޗަށް ބަދަލުކުރަން ފަށާފައިވާ ކަމަށް ވެސް ރިޕޯޓުތައް ބުނެއެވެ.
ޖެނެރަލް އަކްރަމީނިއާގެ ވާހަކަފުޅުގައި، އެމެރިކާއާއި ޒަޔަނިސްޓު ބާރުތަކުން އިރާގުގެ ވައިގެ ސަރަހައްދު ބޭނުންކުރަމުންދާ ދިއުން ވަނީ ވަރަށް ބޮޑަށް ކުށްވެރިކުރައްވާފައެވެ.
އޭނާ ވިދާޅުވީ، އިރާގު ސަރުކާރުން އެކަމާ ދެކޮޅު ހަދަމުންދަނިކޮށް، ބައިނަލްއަގުވާމީ ގާނޫނުތަކާ ޚިލާފަށް އީރާނާ ދެކޮޅަށް އުދުވާނީ އަމަލުތައް ހިންގުމަށް އެމެރިކާއާއި އިޒްރޭލުން އަދިވެސް އިރާގުގެ ވައިގެ ސަރަހައްދު ބޭނުންކުރަމުންދާ ކަމަށެވެ.
އީރާނުގެ އަސްކަރިއްޔާގެ ތަރުޖަމާނު ވިދާޅުވީ، އީރާނުގެ އިސްލާމީ ޖުމްހޫރިއްޔާގެ އަސްކަރިއްޔާއިން ކޮންމެ އުދުވާނަކަށް ނުވަތަ ނުރައްކަލަކަށް، އެކަމާ އެކަށީގެންވާ ފަދަ ހަލުވި އަދި ވަރުގަދަ ރައްދު ހަމަލާއެއް ދޭނެ ކަމަށެވެ.
