ހަމަނުޖެހުން ތަކުގެ ތެރެއަށް އިރާގު ނުވަންނާތީ، މެކްރޮންގެ ތައުރީފު އެ ޤައުމުގެ ބޮޑު ވަޒީރަށް

އެމެރިކާ އާއި އިޒްރޭލް އިން އީރާން އަށް ދިން ހަމަލާތަކާ ގުޅިގެން، ދިފާއުގައި އީރާން އިން ދެމުން އަންނަ ހަމަލާ ތަކާ އެކު މެދު އިރުމަތީގެ ސަރަހައްދުގައި މިހާރު އޮތް ހަމަ ނުޖެހުން ތަކުގެ ތެރެއަށް އިރާގު ވަނަ ނުދީ ހިފެހެއްޓުމަށް އެ ޤައުމުގެ ބޮޑު ވަޒީރު މުޙައްމަދު ޝިއާ އަލް ސުދާނީ ކުރައްވަމުން ގެންދަވާ މަސައްކަތް ތަކަށް، ފްރާންސްގެ ރައީސް އިމަނުއެލް މެކްރޮން ތައުރީފު ކުރައްވައިފި އެވެ. 

ހުކުރު ދުވަހު އެކްސްގައި ކުރެއްވި ޕޯސްޓެއްގައި މެކްރޮން ވިދާޅުވީ، އިރާގުގެ ބޮޑު ވަޒީރު އަލް ސުދާނީ އަށް ފޯނުން ގުޅުއްވައި، މެދު އިރުމަތީގެ މަސްރަހާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވާ ކަމަށެވެ. މި މަޝްވަރާ ތަކުގައި ސަރަހައްދީ ހަނގުރާމައިގެ ތެރެއަށް އިރާގު ސޮއްސާލުމާ ދެކޮޅަށް ބޮޑު ވަޒީރު އަޅުއްވަމުން ގެންދަވާ ޚަރުދަނާ ފިޔަވަޅު ތަކަށް މެކްރޮން ވަނީ މަރުޙަބާ ވިދާޅުވެފަ އެވެ. 

އެ ޕޯސްޓުގައި އިތުރަށް މެކްރޮން ވިދާޅުވީ، އިރާގުގެ މިނިވަންކަމާއި ސިޔާދަތު ރައްކާތެރި ކުރުމަށާއި، ހަމަ ނުޖެހުން ތަކުން އެ ޤައުމު ދުރުހެލި ކުރުމަށް ބޮޑު ވަޒީރު ކުރައްވާ މަސައްކަތް ތަކަށް ފްރާންސްގެ ތާއީދު އެންމެ ފުރިހަމަ އަށް އޮންނާނެކަން ކަށަވަރު ކޮށްދެއްވާ ކަމަށެވެ. އަދި ސަރަހައްދީ ހަމަޖެހުން ޤާއިމު ކުރުމަށާއި، އިރާގުން އަދާ ކުރާ ދައުރު ފްރާންސް އިން ބަލައި ގަންނަ ކަމަށް ވެސް ވިދާޅުވެފައިވެ އެވެ. 

މެދު އިރުމަތީގެ މަސްރަހު ނުތަނަވަސް ވެފައިވާ ދަނޑިވަޅެއްގައި އިރާގުގެ ސަރުކާރުން ގެންގުޅެނީ އެއްވެސް ފަރާތަކަށް ނުޖެހި، ޤައުމުގެ މަސްލަހަތު އިސް ކުރުމުގެ ސިޔާސަތެކެވެ. މި ސިޔާސަތުގެ ދަށުން އަވަށްޓެރި ޤައުމު ތަކުގައި ހިނގަނުންދާ ހަނގުރާމަ ތަކުގެ އަސައު އިރާގަށް ފޯރިޔަ ނުދިނުމަށް ބޮޑު ވަޒީރު އަލް ސުދާނީގެ ސަރުކަރުން ޑިޕްލޮމެޓިކް ގޮތުން ގިނަ މަސައްކަތް ތަކެއް ކުރަމުންދާ ކަަމަށް ވަނީ ބުނެފަ އެވެ. 

ފްރާންސް އާއި އިރާގާ ދެމެދު އޮންނަ ގުޅުން މިފަހަކަށް އައިސް ވަނީ ވަރަށް ބޮޑަށް ބަދަހިވެފަ އެވެ. ޚާއްސަކޮށް ސަލާމަތީ ދާއިރާ އާއި، އިޤްތިޞާދީ ދާއިރާ އިން ދެ ޤައުމުގެ ދެމެދުގައި އޮންނަ އެއްބާރުލުން އިތުރު ކުރުމަށް ދެ ޤައުމުގެ ވެރިން ގެންދަނީ މަސައްކަތް ތަކެއް ކުރަމުންނެވެ.