އިރާގުގައި އޮތް ދެ ތެޔޮ ޓޭންކަރަށް ހަމަލާދިނީ އީރާނުގެ އުޅަނދުތަކުން: އިރާގު
އިރާގުގެ އަލް-ފައު ބަނދަރުގައި އޮތް ބޭރުގެ ދެ ތެޔޮ ޓޭންކަރަކަށް ދިން ނުރައްކާތެރި ހަމަލާއެއްގައި އެކަކު މަރުވެ، ގިނަ ބަޔަކު ވަނީ ސަލާމަތްކޮށްފައި. މި ހަމަލާއާ ގުޅިގެން ދެ އުޅަނދުގައި އަލިފާން ރޯވެފައިވާއިރު، މިއީ އިރާގުގެ އިސްތިގުލާލަށް އަރައިގަތުމުގެ ފިނޑި އަމަލެއްގެ ގޮތުގައި އެ ގައުމުގެ އަސްކަރިއްޔާއިން ވަނީ ސިފަކޮށްފައި.
އިރާގުގެ ބަނދަރުގައި އޮތް ތެޔޮ ޓޭންކަރަކަށް ހަމަލާ އަމާޒުވެފައި. | އެކްސް
އިރާގުގެ އަލް-ފައު ބަނދަރުގައި އޮތް ބޭރުގެ ދެ ތެޔޮ ޓޭންކަރަކަށް ހަމަލާދީފި އެވެ.
އިރާގުގެ ކަނޑުގެ ސަރަހައްދުގައި އޮތް ތެޔޮ ޓޭންކަރުތަކަށް ދިން ހަމަލާތަކުގެ ފަހަތުގައި ވަނީ ގޮވާތަކެތި ބަރުކޮށްފައިވާ އީރާނުގެ އުޅަނދުތަކެއް ކަމަށް، ފުރަތަމަ ހޯދި ހޯދުންތަކުން އެނގޭ ކަމަށް އިރާގުގެ ސަލާމަތީ އޮފިޝަލަކު ރޮއިޓާސް ނިއުސް އެޖެންސީއަށް ވަނީ މައުލޫމާތު ދީފައެވެ.
މި ހަމަލާތަކާ ގުޅިގެން ދެ އުޅަނދުގައިވެސް އަލިފާން ރޯވެފައިވާއިރު، ކަމާބެހޭ ފަރާތްތަކުން ވަނީ ވަގުތުން ކުއްލި ހާލަތުގައި ހަރަކާތްތެރިވާން ފަށާފައެވެ. އިރާގުގެ އަލް-ފައު ބަނދަރުގައި އޮތް ބޭރުގެ ދެ ތެޔޮ ޓޭންކަރަށް ދިން މި ހަމަލާގައި އެކަކު މަރުވެފައިވާ ކަމަށާއި، އިތުރު 38 މީހަކު ސަލާމަތްކޮށްފައިވާ ކަމަށް އިރާގުގެ އަސްކަރިއްޔާގެ ތަރުޖަމާނު ވިދާޅުވިއެވެ.
އިރާގު ނިއުސް އެޖެންސީ (އައި.އެން.އޭ) އިން ރިޕޯޓްކޮށްފައިވާ ގޮތުގައި، ލެފްޓިނަންޓް ޖެނެރަލް ސާދު މާން ވިދާޅުވީ، ދެ ތެޔޮ ޓޭންކަރަށް ދީފައިވަނީ ފިނޑި، ފަނާކުރަނިވި ހަމަލާއެއް ކަމަށެވެ. އަދި މި ހަމަލާ ދީފައިވަނީ އިރާގުގެ ސަރަހައްދީ ކަނޑުގެ ތެރޭގައި ކަމަށްވުމުން، މިއީ އިރާގުގެ އިސްތިގުލާލަށް އަރައިގަތުން ކަމަށްވެސް އޭނާ ވިދާޅުވިއެވެ.
މީގެ އިތުރުން، މި މައްސަލައިގައި ގާނޫނީ ފިޔަވަޅު އެޅުމުގެ ހައްގު އިރާގަށް ލިބިގެންވާ ކަމަށްވެސް އޭނާ ވިދާޅުވިއެވެ.
