އިރާގުގައި ވެއްޓުނު އެމެރިކާގެ އަސްކަރީ މަތިންދާބޯޓުގައި ތިބި ހަ ސިފައިން މަރުވެއްޖެ
އިރާގުގެ ހުޅަނގުގައި އެމެރިކާގެ އަސްކަރީ ބޯޓެއް ވައްޓާލި ހާދިސާގައި ހަ ސިފައިން މަރުވެފައިވާކަން އެމެރިކާގެ ސެންޓްކޮމްއިން ކަށަވަރުކޮށްދީފި. މި ބޯޓު ވައްޓާލާފައިވަނީ ރެސިސްޓެންސް ފްރަންޓުން ފޮނުވާލި މިސައިލަކުން ކަމަށް އީރާނުން ބުނި ނަމަވެސް، އެމެރިކާއިން ވަނީ އެއީ ހަމަލާއަކުން ހިނގި ކަމެއް ނޫން ކަމަށް ބުނެފައި. މި ހާދިސާއަކީ އެ ސަރަހައްދުގައި އެމެރިކާގެ ވައިގެ ބާރުވެރިކަމަށް ލިބުނު ބޮޑު ނާކާމިޔާބީއެއްގެ ގޮތުގައި މަސްރަޙު ދިރާސާކުރާ ފަރާތްތަކުން ސިފަކުރޭ.
2003 ވަނަ އަހަރުގެ ޑިސެމްބަރު މަހުގެ 29 ވަނަ ދުވަހު، ހާމަކޮށްފައިނުވާ ވައިގެ ސަރަހައްދެއްގައި ކޭސީ-135 ސްޓްރެޓޯޓޭންކަރެއް އިސްވެ އޮވެ، އެފް-15 ސްޓްރައިކް އީގަލް އަކާއި، ދެ އެފް-16 ފައިޓިންގ ފެލްކަންގެ އިތުރުން އިނގިރޭސިވިލާތުގެ ދެ ޖީއާރު4 ޓޯނޭޑޯ ހިމެނޭހެން ޖެޓް ފްލައިޓްތަކެއް ފޯމޭޝަނެއްގައި ދަތުރުކުރަނީ. | ގެޓީ އިމޭޖަސް
ޢިރާޤުގެ ހުޅަނގުގައި ހަރަކާތްތެރިވާ ރެސިސްޓެންސް ގްރޫޕްތަކުން އެމެރިކާގެ އަސްކަރީ މަތިންދާބޯޓެއް ވައްޓާލުމާ ގުޅިގެން، އެ ބޯޓުން ދަތުރުކުރި އެމެރިކާގެ އެއަރ ފޯސްގެ ހަ ސިފައިން މަރުވެފައިވާކަން ކަށަވަރުވެއްޖެއެވެ. ތެޔޮ އެޅުމަށް ބޭނުންކުރާ މި މަތިންދާބޯޓު ވައްޓާލާފައިވަނީ މިދިޔަ ބުރާސްފަތި ދުވަހުއެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހުކުރު ދުވަހު އެކްސްގައި ކުރި ޕޯސްޓެއްގައި މި ހަ މީހުން މަރުވިކަން ކަށަވަރުކޮށްދީފައިވަނީ، ކޭ.ސީ-135 މަރުކާގެ މި ބޯޓު އިރާގުގެ ހުޅަނގަށް ވެއްޓިފައިވާ ކަމަށް ރިޕޯޓްކުރިތާ މަދު ގަޑިއިރުތަކެއްގެ ތެރޭގައެވެ.
މި ހާދިސާ ހިނގި ވަގުތު ސެންޓްކޮމްއިން ބުނެފައިވަނީ ބޯޓުގައި ތިބި ހަ ފަޅުވެރިންގެ ތެރެއިން މަރުވީ ހަތަރު މީހުން ކަމަށެވެ.
މީގެ އިތުރުން ސެންޓްކޮމްއިން ބުނެފައިވާ ގޮތުގައި، މި މަތިންދާބޯޓު ވެއްޓުނީ ދީފައިވާ ހަމަލާއަކުން ނުވަތަ އޮޅިގެން ދެވުނު ހަމަލާއަކުންނެއް ނޫނެވެ.
ނަމަވެސް، އީރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާސްއިން ބުރާސްފަތި ދުވަހުގެ ރޭ ނެރުނު ބަޔާނެއްގައި ބުނެފައިވަނީ، ޢިރާޤުގެ ހުޅަނގުގައި ހަރަކާތްތެރިވާ ރެސިސްޓެންސް ފްރަންޓުން ފޮނުވާލި މިސައިލަކުން އެ މަތިންދާބޯޓަށް ހަމަލާދީ ވައްޓާލާފައިވާ ކަމަށެވެ.
މިކަމާ ގުޅިގެން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ނެރުނު ވަކި ބަޔާނެއްގައި ބުނެފައިވަނީ، މި ބޯޓު ހުއްޓުވައި ހަލާކުކޮށްލާފައިވަނީ "އުދުވާނީ ފައިޓަރ ޖެޓަކަށް" ތެޔޮ އެޅުމުގެ މަސައްކަތުގައި އުޅެނިކޮށް ކަމަށެވެ.
ފެބްރުއަރީ 28 ވަނަ ދުވަހު އެމެރިކާއާއި އިޒްރޭލުން އީރާނާ ދެކޮޅަށް ފެށި ހަނގުރާމައާ ގުޅިގެން، ޕެންޓަގަންގެ ތަފާސްހިސާބުތަކުން ދައްކާ ގޮތުގައި މިހާތަނަށް އެމެރިކާގެ މަދުވެގެން 13 ސިފައިން ވަނީ މަރުވެފައެވެ.
މި ހަނގުރާމަ ފެށުނީއްސުރެ، ޢިރާޤުގެ ރެސިސްޓެންސް ގްރޫޕްތަކުން ދަނީ އިރާގާއި އެ ސަރަހައްދުގެ އެކި ކަންކޮޅުތަކުގައި ހުރި އެމެރިކާގެ އަސްކަރީ ވަސީލަތްތަކަށް ކޮންމެ ދުވަހަކު ހަމަލާދެމުންނެވެ.
ކޭ.ސީ-135 މަރުކާގެ މި ބޯޓަކީ އީރާނާއެކު ކުރަމުންދާ ހަނގުރާމައިގައި އެމެރިކާއަށް ގެއްލުނުކަން އެނގިފައިވާ ހަތަރުވަނަ އަސްކަރީ މަތިންދާބޯޓެވެ.
މީގެ އިތުރުން ކުވެއިތު މަތިން އެމެރިކާގެ އެފް-15 މަރުކާގެ ތިން މަތިންދާބޯޓެއް ވެސް ވަނީ ބަޑިޖަހައި ވައްޓާލާފައެވެ.
މަސްރަޙު ދިރާސާކުރާ ގިނަ ފަރާތްތަކުން ދެކޭ ގޮތުގައި، މި ފަހުގެ ހާދިސާއަކީ އެމެރިކާގެ އަސްކަރިއްޔާއަށް ލިބުނު ވަރަށް ބޮޑު ނާކާމިޔާބީއެކެވެ.
ދިރާސާކުރާ ފަރާތްތަކުން ބުނާ ގޮތުގައި، ތެޔޮ އަޅާ ބޯޓަށް ހަމަލާދިނުމުން ރެސިސްޓެންސް ފްރަންޓުން އެ ހަމަލާދިނީ އެމެރިކާގެ ވައިގެ އޮޕަރޭޝަންތަކުގެ މައިބަދައަށެވެ. މީގެއިން ސާބިތުވަނީ އެ ސަރަހައްދުގެ ވައިގެ ބާރުވެރިކަން އެމެރިކާއަށް އެކަނި މިހާރު ކޮންޓްރޯލް ނުކުރެވޭނެ ކަމެވެ.
