އެމެރިކާގެ ރައްޔިތުން މިހާރުން މިހާރަށް އިރާގުން ފޭބުމަށް އަންގައިފި

ބަޣުދާދުގައި ހުންނަ އެމެރިކާގެ އެމްބަސީއަށް ހޮނިހިރު ދުވަހު ހަމަލާއެއް ދީފި ކަމަށް ސަލާމަތީ ބާރުތަކުން ބުނެފިއެވެ. މި ހަމަލާ ދީފައިވަނީ އިރާގުގެ ވެރިރަށް ބަޣުދާދުގައި އީރާނަށް ތާއީދުކުރާ ވަރުގަދަ ޖަމާއަތެއްގެ ތިން މެންބަރަކު މަރާލުމާ ގުޅިގެންނެވެ.

އެމެރިކާ އާއި އީރާނުގެ މެދުގައި ހިނގާ ކުރިމަތިލުންތަކުގެ މައިދާނަކަށް ވެފައިވާ އިރާގު، މެދުއިރުމަތީގެ ހަނގުރާމައިގެ ތެރެއަށް ވަދެފައި ވަނީ ފެބްރުއަރީ މަހުގެ 28 ވަނަ ދުވަހު އެމެރިކާއާއި އިޒްރޭލުން އީރާނަށް ދިން ހަމަލާތަކާ ގުޅިގެންނެވެ.

ހޮނިހިރު ދުވަހުގެ ހެނދުނު ބާރުގަދަ ގޮވުންތަކެއްގެ އަޑު އިވުމާއެކު، އެމެރިކާގެ އެމްބަސީ ހުންނަ ސަރަހައްދުން ކަޅު ދުން އަރަމުންދިޔަ މަންޒަރު ފެނިފައިވާ ކަމަށް އޭއެފްޕީގެ ނޫސްވެރިއަކު ވަނީ ރިޕޯޓުކޮށްފައެވެ.

ސަލާމަތީ ދާއިރާގެ ދެ އޮފިޝަލަކު އޭއެފްޕީއަށް މައުލޫމާތު ދެއްވި ގޮތުގައި، އެމެރިކާ އެމްބަސީގެ އިމާރާތަށް ހަމަލާދީފައިވަނީ ޑްރޯން ބޭނުންކޮށްގެންނެވެ.

މިއީ ހަނގުރާމަ ފެށުނު ފަހުން ބަޣުދާދުގައި ހުންނަ އެމެރިކާ އެމްބަސީއަށް ހަމަލާއެއް އަމާޒުވި ދެވަނަ ފަހަރެވެ.

ހޮނިހިރު ދުވަހުގެ ފަހުގެ ވަގުތެއްގައި އެމްބަސީން ވަނީ ސަލާމަތީ އިންޒާރު އާކޮށް، އެމެރިކާގެ ރައްޔިތުން މިހާރުން މިހާރަށް އިރާގުން ފޭބުމަށް އިލްތިމާސްކޮށްފައެވެ. އަދި އިރާގުގެ ވައިގެ ސަރަހައްދުގައި މިސައިލާއި ޑްރޯން އަދި ރޮކެޓް ހަމަލާތަކުގެ ނުރައްކާ އޮތުމުން، ބަޣުދާދުގައި ހުންނަ އެމްބަސީއަށް ނުވަތަ އަރްބީލްގައި ހުންނަ ކޮންސިއުލޭޓް ޖެނެރަލަށް ނުދިއުމަށް ވެސް ވަނީ އަންގާފައެވެ.

އެކްސްގައި އާންމުކުރި ބަޔާނެއްގައި އެމްބަސީން ބުނީ، އީރާނަށް ތާއީދުކުރާ ޓެރަރިސްޓް ހަނގުރާމަވެރި ޖަމާއަތްތަކުން ބަޣުދާދުގެ "އިންޓަނޭޝަނަލް ޒޯން" އަށް ތަކުރާރުކޮށް ހަމަލާދެމުންދާ ކަމަށެވެ.

މީގެ އިތުރުން އަރްބީލް އިންޓަނޭޝަނަލް އެއާޕޯޓް ހިމެނޭ ސަރަހައްދަށާއި، އެ ސިޓީގައި ހުންނަ ކޮންސިއުލޭޓް ޖެނެރަލަށް ވެސް ތަކުރާރުކޮށް ހަމަލާތައް އަމާޒުވަމުންދާ ކަމަށް އެ ބަޔާނުގައި ބުނެފައިވެއެވެ.

ވޮޝިންޓަނުން "ޓެރަރިސްޓް ޖަމާއަތްތަކުގެ" ގޮތުގައި ކަނޑައަޅާފައިވާ، އީރާނުގެ ތާއީދު އޮންނަ ހަނގުރާމަވެރި ޖަމާއަތްތައް ގުޅިގެން އުފައްދާފައިވާ "އިސްލާމިކް ރެސިސްޓެންސް އިން އިރާގު" އިން ގެންދަނީ އިރާގާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ކޮންމެ ދުވަހަކު ޑްރޯން އަދި ރޮކެޓް ހަމަލާތައް ދެމުންނެވެ.