ރެއާލްގެ ކޯޗުކަމުން ވަކި ކުރި އަލޮންސޯ، ޗެލްސީގެ ކޯޗަކަށް ހަމަޖައްސަނީ

ސްޕެއިންގެ ރެއާލް މެޑްރިޑުގެ ކޯޗު ކަމުގެ މަގާމުން ވަކި ކުރި ޒަބީ އަލޮންސޯ، ޗެލްސީގެ ކޯޗު ކަމުގެ މަގާމަށް ހަމަޖައްސަން ނިންމާފައިވާ ކަމަށް ރިޕޯޓުތައް ބުނެފި އެވެ.

އުމުރުން 44 އަހަރުގެ އަލޮންސޯ ރެއާލްގެ ކޯޗުކަމުން ވަކި ކޮށްފައި ވަނީ މިއަހަރުގެ ޖަނަވަރީ މަހުގެ ތެރޭގަ އެވެ. މަގާމާ ހަވާލުވިތާ އެންމެ އަށް ދުވަހުގެ ތެރޭގައި އަލޮންސޯ މަގާމުން ވަކި ކޮށްފައި ވަނީ، އޭނާގެ އިރުޝާދުގެ ދަށުން ރެއާލްގެ ނަތީޖާތައް ދަށްވުމުގެ ސަބަބުންނެވެ. ރެއާލްގެ ކޯޗުކަމުން ވަކި ކުރިތާ ހަތަރު މަސް ފަހުން، ޗެލްސީގެ ކޯޗުކަމަށް އަލޮންސޯ ހަމަޖައްސަން މިހާރު ވަނީ ނިންމައިފަ އެވެ.

ޗެލްސީގެ ވަގުތީ ކޯޗު ކަމުގެ މަގާމުގައި މިހާރު ހުރީ ކަލުމް މެކްފާލޭން އެވެ. އެ މަގާމަށް އޭނާ ހަމަޖެއްސީ ކުރިން އެ މަގާމުގައި ހުރި ލިއަމް ރޮސަނިއާ މަގާމުން ވަކި ކުރުމަށް ފަހު އެވެ. ނަމަވެސް، އަންނަ ސީޒަނަށް ޗެލްސީ އިން ދާއިމީ ކޯޗެއް ހޯދުމަށް ކުރި މަސައްކަތުގައި، އެ ކުލަބުން ވަނީ އަލޮންސޯ ގެންނަން ނިންމައިފަ އެވެ. 

މީޑިއާ ތަކުގައި ބުނެފައިވާ ގޮތުން ޗެލްސީގެ ކޯޗަކަށް އަލޮންސޯ ހަމަޖައްސާފައިވާކަން ވަރަށް އަވަހަށް އިއުލާން ކުރާނެ އެވެ. އަދި ޗެލްސީ އާއެކު އަލޮންސޯ ސޮއި ކުރާނީ ހަތަރު އަހަރު ދުވަހުގެ އެއްބަސްވުމެއްގައި ކަމަށް ވެސް ރިޕޯޓުތައް ބުނެ އެވެ. އެހެންކަމުން، އެ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ. ހަމަ އެހެންމެ، ޗެލްސީ އިން އެ ޓީމުގެ ކޯޗަކަށް އަލޮންސޯ ގެންނަން މަޝްވަރާ ކުރިއިރު، އަލޮންސޯ ވަނީ އެ މަގާމާ ހަވާލުވާން އެއްބަސްވެފަ އެވެ.

ޗެލްސީ ވާނީ އަލޮންސޯގެ ކޯޗިން ކެރިއަރުގައި އޭނާ އިރުޝާދު ދޭނެ ސީނިއާ ތިން ވަނަ ކުލަބަށެވެ. އަލޮންސޯ އޭނާގެ ސީނިއާ ކޯޗިން ކެރިއަރު ފެށީ ޖަރުމަނުގެ ބަޔާ ލެވަކޫސަން އިންނެވެ. އެ ކުލަބުގައި އަލޮންސޯ ވަނީ ކާމިޔާބު މަސައްކަތް ތަކެއްކޮށް، އެ ކުލަބަށް ތަށި ތަކެއް ހޯދައިދީފަ އެވެ. އެގޮތުން އަލޮންސޯގެ އިރުޝާދުގެ ދަށުން ލެވަކޫސަން އިން ވަނީ ޖުމުލަ ތިން ތައްޓެއް ކާމިޔާބު ކޮށްފަ އެވެ. ލެވަކޫސަން އަށް ފަހު އަލޮންސޯ ހަވާލުވީ ރެއާލް މެޑްރިޑާ އެވެ. 

އަލޮންސޯގެ އިރުޝާދުގެ ދަށުން ރެއާލް އިން 34 މެޗު ކުޅުނުއިރު، އޭގެ ތެރެއިން 24 މެޗުން މޮޅުވެފައިވެ އެވެ. ހަތަރު މެޗު އެއްވަރުވެފައިވާއިރު، އަނެއް ހަ މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ރެއާލް އަށް ރަނގަޅު ނަތީޖާ ތަކެއް ނުނެރެވި، ކާމިޔާބީ ތަކެއް ނުހޯދުމުން ރެއާލް އިން ވަނީ އޭނާ ވަކި ކޮށްފަ އެވެ.