އަމިއްލަ ދަނޑުގައި ނިއުކާސަލް އަތުން ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ޗެލްސީ ބަލިވެއްޖެ އެވެ. 

ޗެލްސީގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި ނިއުކާާސަލް އިން ވަނީ 1-0 އިން އެ ޓީމު ބަލިކޮށްފަ އެވެ. މެޗުގައި ނިއުކާސަލް އިން ލަނޑު ޖެހީ ވެސް ފުރަތަމަ ހާފުގަ އެވެ.

މެޗު ފަށައިގެން ޗެލްސީ އަށް ލިބުނު ކޯނަރެއްގައި ވެސްލޭ ފޮފާނާ ބޮލުން ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އޭގެ ފަހުން ޗެލްސީގެ ކޯލް ޕާމާ އަށް ލިބުނު ފުރުސަތެއްގައި އޭނާ ފޮނުވާލި ބާރު ހަމަލާ ގޯލާ އަމާޒެއް ނުވި އެވެ. 

އޭގެ ފަހުން މެޗުގެ ފުރަތަމަ ހާފުގެ 18 ވަނަ މިނެޓުގައި ނިއުކާސަލް އިން ވަނީ ލަނޑު ޖަހައި ލީޑު ނަގައިފަ އެވެ. ޗެލްސީގެ އޭރިޔާ ތެރެއިން ޖޯ ވިލޮކް ތަނަވަސްކޮށްދިން ފުރުސަތެއްގައި ނިއުކާސަލް އަށް ލީޑު ނަގައިދިނީ އެންތަނީ ގޯޑަން އެވެ.

މެޗުގައި ނިއުކާސަލް އިން ލީޑު ނެގި ފަހުން ޗެލްސީ އިން ނަތީޖާ ހަމަހަމަ ކުރުމަށް މަސައްކަތް ކުރި ނަމަވެސް، އެއްވެސް ފުރުސަތެއްގެ ބޭނުމެއް ނުކުރެވުނެވެ. އެގޮތުން ނިއުކާސަލްގެ ގޯލު ކުރިމަތިން ލިބުނު ފުރުސަތެއްގައި ޗެލްސީގެ ލިއަމް ޑެލަޕް ފޮނުވާލި ބޯޅަ ވެސް ގޯލާ އަމާޒެއް ނުވި އެވެ.

ނިއުކާސަލް އަތުން ބަލިވެ ޗެލްސީ އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް ލީގުގައި ޗެލްސީ އިން ކުޅެފައިވާ 30 މެޗުން 48 ޕޮއިންޓާ އެކު އެވެ. ޗެލްސީ އަށް ވުރެ އެއް މެޗު މަދުން ކުޅެގެން ހަތަރު ވަނައިގައި އެސްޓަން ވިލާ އަށް ލިބެނީ 51 ޕޮއިންޓެވެ.