އެވަޓަން އަތުން ޗެލްސީ އަށް ލަދުވެތި ބައްޔެއް

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން ޗެލްސީ އަށް ލަދުވެތި ބައްޔަކާ ކުރިމަތިލާން ޖެހިއްޖެ އެވެ.

އެވަޓަންގެ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 3-0 އިން ޗެލްސީ ބަލިކޮށްފަ އެވެ. މެޗުގެ ފުރަތަމަ ހާފުގައި އެވަޓަން އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި އެވަޓަން އަށް ލީޑު ނަގައިދިނީ ބެޓޯ އެވެ. އެއީ ޖޭމްސް ގާނާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ ދެ ވަނަ ހާފުގެ 62 ވަނަ މިނެޓުގައި ބެޓޯ ވަނީ އެވަޓަންގެ ދެ ވަނަ ލަނޑު ވެސް ޖަހައި ލީޑު ފުޅާ ކޮށްފަ އެވެ. މެޗުގައި އެވަޓަންގެ ތިން ވަނަ ލަނޑު 76 ވަނަ މިނެޓުގައި ޖެހީ އިލިމާން ނިޑާޔޭ އެވެ.

މިއީ ޗެލްސީގެ ކޯޗުކަމާ ލިއަމް ރޮސެނިއާ ހަވާލުވީ ފަހުން ޕްރިމިއާ ލީގުގައި އެ ޓީމު ބަލިވި ތިން ވަނަ މެޗެވެ. އަނެއްކޮޅުން އޭނާގެ އިރުޝާދުގެ ދަށުން މިހާ ފަރަގު ބޮޑު ނަތީޖާ އަކުން ޗެލްސީ ބަލިވި ފުރަތަމަ މެޗެވެ. އޭނާގެ އިރުޝާދުގެ ދަށުން ޗެލްސީ އިން މިހާތަނަށް 19 މެޗު ކުޅެފައިވާއިރު، 10 މެޗުން ވަނީ މޮޅުވެފަ އެވެ. ހަތް މެޗުން ބަލިވެފައިވާއިރު، ދެ މެޗުން ވަނީ އެއްވަރުވެފަ އެވެ. 

މެޗުން ބަލިވެ ޗެލްސީ އޮތީ ލީގު ތާވަލްގެ ހަ ވަނަ މަގާމުގަ އެވެ. އެއީ މިހާތަނަށް ލީގުގައިި ކުޅެފައިވާ 31 މެޗުން 48 ޕޮއިންޓާ އެކު އެވެ.