ސިޓީ އާއި ރެއާލް ވާދަކުރަން ޖެހުނުއިރު، ޗެމްޕިއަން ޕީއެސްޖީ އާއި ޗެލްސީގެ ކުރިމަތިލުމެއް.

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި މެންޗެސްޓަރ ސިޓީ އާއި، ރެއާލް މެޑްރިޑު ވާދަ ކުރަން ޖެހުނުއިރު، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އާއި ޗެލްސީ ވާދަކުރަން ޖެހިއްޖެ އެވެ.

ޗެމްޕިއަންސް ލީގުގެ ފޯމެޓު ރޭވިފައި އޮތް ގޮތުން، ލީގު ބުރުގެ ގަަދަ އަށް ޓީމަށް ގަދަ 16 އިން ސީދާ ޖާގަ ވަނީ ލިބިފަ އެވެ. ބާކީ އަށް ޖާގަ ލިބުނީ ލީގު ތާވަލްގެ ނުވަ ވަނަ އާއި، 24 ވަނައާ ދެމެދު އޮތްް ޓީމު ތަކުގެ މެދުގައި ކުޅުނު ޕްލޭ އޮފްގެ މެޗު ތަކުން މޮޅުވި ޓީމު ތަކަށެވެ.

މިފަހަރުގެ ޗެމްޕިއަންސް ލީގުގެ ގަދަ 16 ވަނަ ބުރުގައި އެންމެ ފޯރި ގަދަ ވާނެ ކަމަށް ބެލެވެނީ، ސިޓީ އާއި ރެއާލް ބައްދަލު ކުރާ މެޗެވެ. މި ދެ ޓީމު ވަނީ މިދިޔަ އަހަރު ތަކުގައި ވެސް ޗެމްޕިއަންސް ލީގުގައި ބައްދަލު ކޮށްފަ އެވެ. މީގެ އިތުރުން، އެންމެ ފަހުގެ ޗެމްޕިިއަން ޕީއެސްޖީ އާއި، ޗެލްސީ ބައްދަލު ކުރާ މެޗު ވެސް ފޯރިގަދަ ވާނެ އެވެ.

ހަމަ އެއާއެކު މުބާރާތުގެ ގަދަ 16 އިގެ ބުރުގައި ލިވަޕޫލް ބައްދަލު ކުރަން ޖެހިފައި ވަނީ ގަލަސަތަރާއި އާ އެވެ. ޖަރުމަނުގެ ބަޔާން މިއުނިކް އިން ވާދަ ކުރަން ޖެހިފައި ވަނީ އެޓަލަންޓާއާ އެވެ. ސްޕެއިންގެ ބާސެލޯނާ އާއި ނިއުކާސަލް ޔުނައިޓެޑު ބައްދަލު ކުރަން ޖެހުނުއިރު، އެތުލެޓިކޯ މެޑްރިޑު ނިކުންނާނީ ޓޮޓެންހަމްއާ ދެކޮޅަށެވެ.

އެންމެ ފަހުގެ ރަނައަޕް ޓީމު އިންޓަރ މިލާން ކަޓުވާލައި ގަދަ 16 އިން ޖާގަ ހޯދި ބޯޑޯ ގްލިމް، ވާދަ ކުރަން ޖެހެނީ ސްޕޯޓިންއާ އެވެ. މީގެ އިތުރުން އާސެނަލް ނިކުންނާނީ ޖަރުމަނުގެ ބަޔާ ލެވަކޫސަންއާ ދެކޮޅަށެވެ.