އެފްއޭ ކަޕް: އިތުރު ވަގުތު ކުޅެ މޮޅުވެގެން، ޗެލްސީ ކުއާޓާ ފައިނަލް އަށް

އިނގިރޭސި އެފްއޭ ކަޕްގެ ގަދަ 16 ވަނަ ބުރުގައި ވްރެކްސްހެމްއާ ދެކޮޅަށް ކުޅުނު މެޗުން މޮޅުވެ، ޗެލްސީ އިން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.

ހޮނިހިރު ދުވަހުގެ ރޭ ކުޅުނު މެޗު ޗެލްސީ އިން ކާމިޔާބު ކުރީ 4-2 އިންނެވެ. މެޗުގައި ވްރެކްސްހެމް އިން ދެ ފަހަރެއްގެ މަތިން ލީޑު ނެގިއިރު ވެސް، ޗެލްސީ އިން ނަތީޖާ ހަމަހަމަ ކުރި އެވެ. މެޗުން ޗެލްސީ މޮޅުވެފައި ވަނީ އިތުރު ވަގުތުގެ ގޮތުގައި ކުޅުނު ދެ ހާފުގައި ލަނޑު ޖަހައިގެންނެވެ.

މެޗު ފަށައިގެން 18 ވަނަ މިނެޓުގައި ވްރެކްސްހެމް އަށް ލީޑު ނަަގައިދިނީ ސެމް ސްމިތު އެވެ. އޭގެ ފަހުން ފުރަތަމަ ހާފުގެ 40 ވަނަ މިނެޓުގައި ޗެލްސީ އަށް ނަތީޖާ ހަމަހަމަވީ ވްރެކްސްހެމްގެ ގޯލު ކީޕަރު އާތުރް އޮކޮންކްވޯ އަތުން ބައި ކޮޅަށް ވަތް ލަނޑުންނެވެ.

މެޗުގެ ދެ ވަނަ ހާފުގެ 78 ވަނަ މިނެޓުގައި ދެ ވަނަ ފަހަރަކަށް ވްރެކްސްހެމް އަށް ލީޑު ނަގައިދިނީ ކަލުމް ޑޮއީލް އެވެ. ނަމަވެސް މެޗުގެ ފުރިހަމަ ވަގުތު ހަމަވާން އަށް މިނެޓަށް ވެފައި ވަނިކޮށް ޗެލްސީ އަށް ނަތީޖާ ހަމަހަމަ ކޮށްދިނީ ޖޯޝުއާ އަޗީމްޕޮންގް އެވެ. 

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމުން، އިތުރު ވަގުތުގެ 15 މިނެޓުގެ ދެ ހާފު ވަނީ ކުޅެފަ އެވެ. މެޗުން ޗެލްސީ މޮޅުވެފައި ވަނީ އެ ހާފުގައި ލަނޑު ޖަހައިގެންނެވެ. އަލެހާންދްރޯ ގާނާޗޯގެ ލަނޑުން ޗެލްސީ ލީޑު ނެގިއިރު، ލީޑު ފުޅާ ކޮށްދިނީ ޔާއޯ ޕެޑްރޯ އެވެ. 

ޗެލްސީގެ ކޯޗުކަމާ ލިއަމް ރޮސެނިއާ ހަވާލުވި ފަހުން އެ ޓީމުން އަންނަނީ ރަނގަޅު ނަތީޖާ ތަކެއް ނެރެމުންނެވެ.