ޗެލްސީގެ ދަނޑުގައި ވެސް ކުރި ހޯދައި، ޗެމްޕިއަން ޕީއެސްޖީ ކުއާޓާ ފައިނަލަށް.

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ވެސް ޗެލްސީ ބަލިކޮށް، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ކުއާޓާ ފައިނަލުން ޖާގަ ކަށަވަރު ކޮށްފި އެވެ.

ޕީއެސްޖީގެ ދަނޑުގައި މި ދެ ޓީމު ބައްދަލު ކުރި ފުރަތަމަ ލެގު އެ ޓީމުން ކާމިޔާބު ކުރީ 5-2 އިންނެވެ. އެހެންވެ ދެ ވަނަ ލެގާ ކުރިމަތިލީއިރު ވެސް، ޕީއެސްޖީ އިން ވަނީ ކުއާޓާ ފައިނަލްގެ ފުރުސަތު ބޮޑު ކޮށްފަ އެވެ. ޗެލްސީގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު ދެ ވަނަ ލެގު ޕީއެސްޖީ އިން ކާމިޔާބު ކުރީ 3-0 އިންނެވެ.

މެޗު ފަށައިގެން ހަ ވަނަ މިނެޓުގައި ޕީއެސްޖީ އަަށް ލީޑު ނަގައިދިނީ ކްވިޗާ ކްވަރެޝްކޭލިއާ އެވެ. އޭގެ ފަހުން މެޗުގެ 15 ވަނަ މިނެޓުގައި ބްރާޑްލޭ ބާކޮލާ ވަނީ ޕީއެސްޖީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އަޝްރަފް ހަކީމީ އެވެ.

މެޗުގައި ޕީއެސްޖީ އިން ރަނގަޅު ކުޅުމެއް ދެއްކިއިރު، އެ ޓީމުން ތިން ވަނަ ލަނޑެއް ޖެހީ ދެ ވަނަ ހާފުގަ އެވެ. އެގޮތުން މެޗުގެ 62 ވަނަ މިނެޓުގައި އެ ލަނޑު ޕީއެސްޖީ އަަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ސެނީ މާޔުލް އެވެ. 

މި މޮޅާ އެކު ޕީއެސްޖީ އިން ކުއާޓާ ފައިނަލްގެ ފުރުސަތު ހޯދީ އެގްރިގޭޓް ނަތީޖާ 8-2 އިންނެވެ.