ޕެޑްރޯ ނެޓޯގެ ހެޓްރިކް އިން މޮޅުވެ، ޗެލްސީ އެފްއޭ ކަޕްގެ ފަސް ވަނަ ބުރަށް

އިނގިރޭސި އެފްއޭ ކަޕްގެ ހަތަރު ވަނަ ބުރުގައި ހަލް ސިޓީއާ ދެކޮޅަށް ކުޅުނު މެޗުން މޮޅުވެ، ޗެލްސީ އިން މުބާރާތުގެ ފަސް ވަނަ ބުރުން ޖާގަ ހޯދައިފި އެވެ.

ހުކުރު ދުވަހުގެ ރޭ ކުޅުނު މެޗު ޗެެލްސީ އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ޗެލްސީ އިން އެއް ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 40 ވަނަ މިނެޓުގައި ޗެލްސީ އަށް ލީޑު ނަގައިދިނީ ޕެޑްރޯ ނެޓޯ އެވެ. އެ ލަނޑު ޖަހަން ނެޓޯ އަށް ފުރުސަތު ތަނަވަސްކޮށްދިނީ ލިއަމް ޑެލަޕް އެވެ. އޭގެ ފަހުން ދެ ވަނަ ހާފު ފަށައިގެން ހަ ވަނަ މިނެޓުގައި ނެޓޯ ވަނީ ދެ ވަނަ ލަނޑެއް ޖަހައި ޗެލްސީގެ ލީޑު ފުޅާ ކޮށްފަ އެވެ. 

އޭގެ އަށް މިނެޓު ފަހުން ޗެލްސީގެ ތިން ވަނަ ލަނޑު ޖެހީ އެސްޓެވާއޯ އެވެ. އެ ލަނޑު ޖަހަން އެސްޓެވާއޯ އަށް ވެސް ފުރުސަތު ތަނަވަސްކޮށްދިނީ ޑެލަޕް އެވެ. މެޗުގެ 71 ވަނަ މިނެޓުގައި ނެޓޯ ވަނީ ޗެލްސީގެ ހަތަރު ވަނަ ލަނޑު ޖަހައި މެޗުގައި އޭނާގެ ހެޓްރިކް ހަމަ ކޮށްފަ އެވެ. އެއީ ޑެލަޕް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާ އެކު ޗެލްސީ އިން ވަނީ އެފްއޭ ކަޕްގެ ފަސް ވަނަ ބުރުން ޖާގަ ހޯދައިފަ އެވެ. ޗެލްސީގެ ކޯޗުކަމާ ލިއަމް ރޮސެނިއާ ހަވާލުވީ ފަހުން އެ ޓީމުން އަންނަނީ ރަނގަޅު ނަތީޖާ ތަކެއް ނެރެމުންނެވެ. އޭނާގެ އިރުޝާދުގެ ދަށުން މިހާތަނަށް ކުޅުނު 11 މެޗުގެ ތެރެއިން، ނުވަ މެޗުން ޗެލްސީ ވަނީ މޮޅުވެފަ އެވެ.