ޗެލްސީ ބަލިކޮށް، ޕީއެސްޖީ އިން ފުރުސަތު ބޮޑު ކޮށްފި

ޔުއެފާ ޗެމްޕިއަންސް ލީގުގައި ޗެލްސީއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ކުއާޓާ ފައިނަލްގެ ފުރުސަތު ބޮޑު ކޮށްފި އެވެ.

ޕީއެސްޖީގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 5-2 އިންނެވެ. މެޗުގައި ޕީއެސްޖީ އިން ދެ ފަަހަރު ލީޑު ނެގިއިރު ވެސް، ޗެލްސީ އިން ނަތީޖާ ހަމަހަމަ ކުރި އެވެ. އޭގެ ފަހުން ޕީއެސްޖީ އިން ވަނީ އިތުރު ތިން ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން 10 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ބްރާޑްލޭ ބާކޮލާ އެވެ. އޭގެ ފަހުން މެޗުގެ 28 ވަނަ މިނެޓުގައި މަލޯ ގުސްޓާ ވަނީ ޗެލްސީ އަށް ނަތީޖާ ހަމަހަމަ ކޮށްދީފަ އެވެ. މެޗުގެ ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް، ދެ ވަނަ ފަހަރަށް ޕީއެސްޖީ އަށް ލީޑު ނަގައިދިނީ އޮސްމާން ޑެމްބެލޭ އެވެ. ނަމަވެސް، ދެ ވަނަ ހާފު ފަށައިގެން 12 ވަނަ މިނެޓުގައި އެންޒޯ ފެނާންޑޭޒް ވަނީ ޗެލްސީ އަށް ނަތީޖާ ހަމަހަމަ ކޮށްދީފަ އެވެ.

ތިން ވަނަ ފަހަރަށް ޕީއެސްޖީ އިން މެޗުގައި ލީޑު ނެގީ 74 ވަނަ މިނެޓުގައި ވިޓީނިއާ ޖެހި ލަނޑުންނެވެ. އޭގެ ފަހުން މެޗުގެ 86 ވަނަ މިނެޓުގައި ކްވިޗާ ކްވަރެޝްކޭލިއާ ވަނީ ޕީއެސްޖީގެ ހަތަރު ވަނަ ލަނޑު ޖަހައި ލީޑު ފުޅާ ކޮށްފަ އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ކްވަރެޝްކޭލިއާ ވަނީ ޕީއެސްޖީގެ ފަސް ވަނަ ލަނޑު ޖަހައި، މެޗުން ފުރިހަމަ މޮޅެއް ހޯދައިދީފަ އެވެ.

މި މޮޅާ އެކު ޕީއެސްޖީ އިން މުބާރާތުގެ ކުއާޓާ ފައިނަލްގެ ފުރުސަތު ބޮޑު ކޮށްފައިވާއިރު، މި ދެ ޓީމު ކުޅޭ ދެ ވަނަ ލެގުގެ މެޗު އޮތީ ޗެލްސީގެ އަމިއްލަ ދަނޑުގަ އެވެ. މުބާރާތުގެ ކުއާޓާ ފައިނަލްގެ ފުރުސަތު ހޯދުމަށް، ޗެލްސީ އަށް ޖެހޭނީ ހަތަރު ލަނޑުގެ ތަފާތުން އެ މެޗުގައި ޕީއެސްޖީ ބަލި ކުރާށެވެ.