ޗެލްސީ ބަލިކޮށް، އާސެނަލް އަށް ފަސް ޕޮއިންޓުގެ ލީޑެއް

އިނގިރޭސި ޕްރިމިއަރ ލީގުގައި ޗެލްސީއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ އެއް ވަަނައިގައި ފަސް ޕޮއިންޓުގެ ލީޑެއް ނަގައިފި އެވެ. 

އާސެނަލްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި އާސެނަލް އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީ އަށް ނަތީޖާ ހަމަހަމަ ވެސްވި އެވެ. ނަމަވެސް، ދެ ވަނަ ހާފުގައި ލަނޑު ޖަހައިގެން އާސެނަލް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 21 ވަނަ މިނެޓުގައި އާސެނަލް އަށް ލީޑު ނަގައިދިނީ ވިލިއަމް ސަލީބާ އެވެ. އެއީ ގަބްރިއެލް މަގާޅައެސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ނަމަވެސް، ފުރަތަމަ ހާފުގެ އިތުރު ވަގުތުގައި އާސެނަލްގެ ޕިއެރޯ ހިކަންޕީ އަތުން ބައި ކޮޅަށް ވަތް ލަނޑުން ޗެލްސީ އަށް ނަތީޖާ ހަމަހަމަވި އެވެ.

މެޗުގެ ދެ ވަނަ ހާފުގައި އާސެނަލް އިން ވަނީ ރަނގަޅަށް ކުޅެ އިތުރު ލަނޑު ޖަހަން މަސައްކަތް ކޮށްފަ އެވެ. މެޗުގެ 66 ވަނަ މިނެޓުގައި އާސެނަލްގެ ޔޫރިއެން ޓިމްބާ ވަނީ އެ ޓީމުގެ ދެ ވަނަ ލަނޑު ޖަހައި މެޗުން މޮޅު ކޮށްދީފަ އެވެ. އެ ލަނޑު ޖަހަން ސަލީބާ އަށް ފުރުސަތު ތަނަވަސްކޮށްދިނީ ޑެކްލަން ރައިސް އެވެ.

މޮޅާ އެކު އާސެނަލް އެއް ވަަނައިގައި އޮތީ މިހާތަނަށް އެ ޓީމު ކުޅެފައިވާ 29 މެޗުން 64 ޕޮއިންޓެވެ. އާސެނަލް އަށް ވުރެ އެއް މެޗު މަދުން ކުޅެގެން ދެ ވަަނައިގައި މެންޗެސްޓަރ ސިޓީ އަށް ލިބެނީ 59 ޕޮއިންޓެވެ.