ޓްރަމްޕްގެ އީރާން ހަނގުރާމަ ހުއްޓުވުމަށް، ރިޕަބްލިކަން ޕާޓީގެ މެމްބަރުން ތާއީދު ކުރުމަށް ޝުމާ ގޮވާލައްވައިފި

އީރާންއާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ކުރައްވަމުން ގެންދަވާ ހަނގުރާމަ ހުއްޓުވުމަށްޓަކައި، އިދިކޮޅު ޑިމޮކްރެޓިކް ޕާޓީގެ މެމްބަރުން ކުރަމުން އަންނަ މަސައްކަތަށް އެއްބާރުލުން ދިނުމަށް، ވެރިކަން ކުރާ ރިޕަބްލިކަން ޕާޓީގެ މެމްބަރުންނަށް އެމެރިކާގެ ސެނެޓަރު ޗަކް ޝުމާ ގޮވާލައްވައިފި އެވެ. 

ޝުމާ މިކަމަށް ގޮވާލައްވާފައި ވަނީ އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން އެމެރިކާގެ އިޤްތިޞާދަށް ލޮޅުން ތަކެއް އަރައި، ހަކަތައިގެ އަގު އިންތިހާ އަށް އުފުލެމުންދާ ދަނޑިވަޅެއްގަ އެވެ. 

އެކްސްގައި ކުރެއްވި ޕޯސްޓެއްގައި ޝުމާ ވިދާޅުވީ، ހަނގުރާމަ ހުއްޓާލުމަށް އެމެރިކާގެ ރައީސް ޓްރަމްޕް އިންކާރު ކުރައްވަމުން ގެންދަވާތީ، ތެލުގެ އަގު އުފުލި އެމެރިކާގެ ރައްޔިތުން މިހާރު 4.50 އެމެރިކާ ޑޮލަރަށް ވުރެ ބޮޑު ހޭދައެއް ކުރަން ޖެހިފައިވާ ކަމަށެވެ. އަދި ދިރިއުޅުމުގެ ޚަރަދުތައް ކުޑަ ކުރުމަށާއި، އެމެރިކާގެ ސިފައިންގެ ސަލާމަތަށް ރިޕަބްލިކަން ޕާޓީގެ މެމްބަރުން ކުޑަ ވެސް ސަމާލު ކަމެއް ދޭ ނަމަ، ހަނގުރާމަ ހުއްޓުވުމަށް ޑިމޮކްރެޓިކް ޕާޓީ އިން ހުށަހަޅާ، ވޯ ޕަވަރސް ރިޒޮލިއުޝަން އަށް ތާއީދު ކުރަން ޖެހޭ ކަމަށެވެ. 

މިއީ އީރާންއާ ދެކޮޅަށް ޓްރަމްޕް ކުރަމުން އަންނަ ހަނގުރާމަ ހުއްޓުވުމަށް ޑިމޮކްރެޓިކް ޕާޓީ އިން މަސައްކަތް ކުރާ ހަތް ވަނަ ފަހަރެވެ. ވޯ ޕަވަރސް ރިޒޮލިއުޝަން އަކީ ހަނގުރާމައެއް ފެށޭތާ 60 ދުވަސް ހަމަވުމަށް ފަހު، ކޮންގްރެސްގެ ހުއްދައާ ނުލައި ރައީސް އަށް ހަނގުރާމަ ކުރިއަށް ނުގެންދެވޭ ގޮތަށް ހެދުމަށް އެކުލަވާލާފައިވާ ޤާނޫނީ އުސޫލެކެވެ. 

މީގެ ކުރިން ވެސް ޤަރާރު ފާސް ކުރުމަށް ޑިމޮކްރެޓިކް ޕާޓީ އިން އެތައް ފަހަރެއްގެ މަތިން މަސައްކަތް ކޮށްފައިވެ އެވެ. ނަމަވެސް، ކޮންގްރެސްގެ އަޣުލަބިއްޔަތު ޑިމޮކްރެޓިކް ޕާޓީ އަށް ނެތުމުގެ ސަބަބުން، މިހާތަނަށް ނެގި ހުރިހާ ވޯޓެއްގައި ވެސް ވަނީ ސިޔާސީ ޕާޓީ ތަކުގެ މެދުގައި ބެހިގެން ގޮސްފަ އެވެ. މިކަމުގެ ސަބަބުން ހަނގުރާމަ ހުއްޓުވުމަށް ކުރާ މަސައްކަތް ތަކަށް ވަނީ ބޮޑެތި ހުރަސް ތަކެއް ކުރިމަތިވެފަ އެވެ.